ខេត្តកំពង់ចាម ៖ បន្ទាប់ពីបានរកឃើញពលរដ្ឋចំនួន៥នាក់ មានផ្ទុកជំងឺកូវីដ-១៩ ដើម្បីបញ្ចៀសការឆ្លងបន្តទៅអ្នកដទៃ ។ នាល្ងាច ថ្ងៃទី២៨ មីនា ២០២១…
ខេត្តកំពង់ចាម ៖ បន្ទាប់ពីបានរកឃើញពលរដ្ឋចំនួន៥នាក់ មានផ្ទុកជំងឺកូវីដ-១៩ ដើម្បីបញ្ចៀសការឆ្លងបន្តទៅអ្នកដទៃ ។ នាល្ងាច ថ្ងៃទី២៨ មីនា ២០២១ ឯកឧត្តមអ៊ុន ចាន់ដា អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ១៩ បានដឹកនាំមន្ត្រីក្រោមឱវាទចុះបាញ់ថ្នាំសម្លាប់មេរោគនៅផ្សារធំកំពង់ចាម និងផ្សារសាមគ្គីក្នុងក្រុងកំពង់ចាម ដើម្បីសម្លាប់មេរោគ ។
សូមបញ្ជាក់ថា កិច្ចប្រជុំដឹកនាំដោយឯកឧត្តម អ៊ុន ចាន់ដា អភិបាលខេត្ត ព្រមទាំងមានការចូលរួមពីសមាជិកសមាជិកានៃគណៈកម្មការប្រយុទ្ធប្រឆាំងនឹងជំងឺកូវីដក្នុងខេត្ត រួមនឹងមន្ត្រីពាក់ព័ន្ធជាច្រើនរូបទៀត កាលពីព្រឹកថ្ងៃទី២៨ មីនា ធ្វើឡើងនៅសាលាខេត្ត ដើម្បីរិះរកមធ្យោបាយទប់ស្កាត់ជំងឺ covid ។
ឯកឧត្តមអភិបាលខេត្តមានប្រសាសន៍ដោយគូសបញ្ជាក់ថា ដើម្បីទប់ស្កាត់ការរីករាលដាលនៃជំងឺកូវីដ-១៩ ដែលកំពុងផ្ទុះឡើងត្រូវបានរកឃើញចំនួន៥នាក់ នៅក្នុងខេត្តកំពង់ចាម ។ តាមរយៈកម្លាំងជំនាញសុខាភិបាលរួមជាមួយនឹងអាជ្ញាធរបានចុះស្រាវជ្រាវជាបន្ទាន់ សម្រេចបិទជាបណ្ដោះអាសន្នមួយរយៈនូវទីតាំងចំនួន១៣កន្លែង ដែលមានការពាក់ព័ន្ធនឹងអ្នកវិជ្ជមានកូវីដ-១៩ ក្នុងនោះរួមមាន ៖
១- គ្លីនិក ម៉ី មុនីបូរិន្ទ នៅក្នុងសង្កាត់វាលវង់ ក្រុងកំពង់ចាម ។
២-គ្លីនិកពេទ្យគា ស្ថិតនៅសង្កាត់វាលវង់ ក្រុងកំពង់ចាម ។
៣- តូបចំនួន៦ ក្នុងផ្សារធំ ក្រុងកំពង់ចាម។
៤- មណ្ឌលសុខភាពខ្ពបតាងួន ស្ថិតនៅឃុំខ្ពបតាងួន ស្រុកស្ទឹងត្រង់
ដែលមានព្រំប្រទល់ជាប់ជាមួយស្រុកព្រែកប្រសព្វខេត្ដក្រចេះ ព្រមទាំងកន្លែងពាក់ព័ន្ធផ្សេងទៀត …។
លោកវេជ្ជបណ្ឌិត គីមសួរ ភីរុណ ប្រធានមន្ទីរសុខាភិបាលខេត្តកំពង់ចាម មានប្រសាសន៍ឲ្យដឹងដែរថា÷ អ្នកដែលមានផ្ទុកវិជ្ជមានកូវីដ-១៩ទាំង៥ នាក់រួមមាន÷
១- ឈ្មោះ ជួប សារ៉េត ភេទស្រី អាយុ ៤៥ ឆ្នាំ នៅភូមិ សង្កេត ឃុំ សំបូរ ស្រុកបាធាយ ខេត្តកំពង់ចាម ចូលចត្តាឡីស័កថ្ងៃទី២៥មីនា ២០២១ (ឆ្លងពីកូននៅភ្នំពេញ)។
២- វណ្ណា ហ្សារីន (កូនរបស់លោក វ៉ាន់ណាក្រូ ប្រធានការិយាល័យសុខាភិបាលនៃស្នងការដ្ឋាននគរបាលខេត្តត្បូងឃ្មុំ លើ) ភេទស្រី អាយុ ១៨ខែ។
៣- វណ្ណា ឡូស៉ិច (កូនរបស់ វ៉ាន់ ណាក្រូ) ភេទប្រុស អាយុ ៨ឆ្នាំ។
៤-ឈ្មោះ លាង សុធារី (ប្រពន្ធ វ៉ាន់ ណាក្រូ) ភេទស្រី អាយុ ២៧ឆ្នាំ នៅភូមិអូឬស្សី ឃុំអូឬស្សី ក្រុង ក្រចេះ ខេត្តក្រចេះ។
៥- ឈ្មោះ លាង ញ៉ (ឪពុកក្មេក វ៉ាន់ ណាក្រូ) ភេទប្រុស អាយុ ៧៥ឆ្នាំ នៅភូមិទីមួយ សង្កាត់វាលវង់ ក្រុងកំពង់ចាម ខេត្តកំពង់ចាម។
លោកប្រធានមន្ទីរសុខាភិបាលខេត្តបន្តថា ចំពោះអ្នកវិជ្ជមានកូវីដ-១៩ ទាំង៥នាក់ ត្រូវបានក្រុមគ្រូពេទ្យបញ្ជូនពីមណ្ឌលចត្តាឡីស័កមកព្យាបាលជំងឺដាក់នៅបន្ទប់ដាច់ដោយឡែកនៅមន្ទីរពេទ្យខេត្តកំពង់ចាម។
សូមបញ្ជាក់ជូនថា លោក វ៉ាន់ ណាក្រូ ជាមន្ត្រីនរគបាលនៅខេត្តត្បូងឃ្មុំ បានមកសម្រាកព្យាបាលជំងឺនៅមន្ទីរពេទ្យខេត្តកំពង់ចាម ហើយបានបន្តចម្លងជំងឺនេះ ដល់ឪពុកក្មេក ប្រពន្ធ និងកូនពីរនាក់បន្ថែមទៀត ។ មកដល់ព្រឹកថ្ងៃទី២៩ មិនា សុខភាពរបស់លោកម៉ាក្រូ បានប្រសើរគ្រាន់បើដោយសារតែក្រុមគ្រូពេទ្យយកចិត្តទុកដាក់ព្យាបាល ។
លោក ចាន់ ផល្លី អភិបាលក្រុងកំពង់ចាម មានប្រសាសន៍ឲ្យដឹងដែរថា នៅល្ងាចថ្ងៃទី២៨ មីនា ២០២១ ឯកឧត្តមអ៊ុនចាន់ដា អភិបាលខេត្តបានដឹកនាំកម្លាំងជំនាញរបស់មន្ទីរសុខាភិបាលខេត្តដោយចុះមកបាញ់ថ្នាំសម្លាប់មេរោគកូវីដនៅផ្សារធំកំពង់ចាម និងបានបាញ់បន្តសម្លាប់មេរោគនៅផ្សារសាមគ្គី ក្នុងក្រុងកំពង់ចាម ។ ចំពោះមូលហេតុដែលជំនាញបាញ់ថ្នាំសម្លាប់មេរោគនេះដោយសារសមាជិកក្រុមគ្រួសាររបស់លោកម៉ាក្រូ ជាប្រធានការិយាល័យសុខាភិបាលនៃស្នងការដ្ឋាននគរបាលខេត្តត្បូងឃ្មុំមិនស្រួលខ្លួនមកសម្រាកព្យាបាលនៅមន្ទីរពេទ្យខេត្តកំពង់ចាម សមាជិកក្រុមគ្រួសារបាននាំគ្នាចូលផ្សារធំកំពង់ចាមទិញរបស់របរប្រើប្រាស់ បន្ទាប់មកតាមរយៈការយកសំណាកទៅពិនិត្យនៅវិទ្យាស្ថានប៉ាស្ទើ ឃើញថា លោកម៉ាក្រូវិជ្ជមានជំងឺ covid ។ ហើយត្រូវបានអាជ្ញាធរខេត្តសម្រេចបិទតូបលក់ដូរមួយចំនួននៅក្នុងផ្សារធំ ចំណែកនៅផ្សារសាមគ្គីក៏មានការពាក់ព័ន្ធផងដែរទើបកម្លាំងជំនាញចុះបាញ់ថ្នាំសម្លាប់មេរោគនៅផ្សារទាំងពីរ ។
ដើម្បីធានាបាននូវសុវត្ថិភាពក្នុងនាមអាជ្ញាធរក្រុងកំពង់ចាម សូមអំពាវនាវដល់គណ:អាជីវករផ្សារទាំងពីរត្រូវអនុវត្តដោយតម្រូវឲ្យអ្នកចូលផ្សារទាំងអស់ត្រូវតែលាងដៃនឹងអាកុលពាក់ម៉ាស់ជាដើម រួមនិងអនុវត្តឲ្យបានជាប់ជាប្រចាំនៅវិធានការរបស់ប្រមុខរាជរដ្ឋាភិបាល គឺ៣កុំ និង៣ការពារ ឲ្យបានជាប់លាប់ប្រៀបបានដូចជា អាវក្រោះសម្រាប់ការពារខ្លួនយ៉ាងដូច្នោះ ៕
ចែករំលែកព័តមាននេះ