រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យនិងអាជ្ញាធរសង្កាត់ចោមចៅទី៣ ដឹកនាំដោយលោកអភិបាលខណ្ឌ ហែម ដារិទ្ធិ រួមជាមួយមន្ត្រីសុខាភិបាលបានចុះទៅបិទផ្អាកអាជីវកម្មជាបណ្ដោះអាសន្ននូវមន្ទីរសម្រាកព្យាបាលនិងសម្ភព«ឡាំ ប៊ុនថន» បន្ទាប់ពីរកឃើញបុរសម្នាក់វិជ្ជមានCOVID-19 ចូលទៅសម្រាកព្យាបាលជម្ងឺទីនោះកាលពី៤ថ្ងៃមុនកន្លងមកនេះ។
មន្ទីរសម្រាកព្យាបាលនិងសម្ភព«ឡាំ ប៊ុនថន» មានទីតាំងស្ថិតនៅតាមបណ្ដោយផ្លូវជាតិលេខ៤ ត្រង់ចំណុចខាងលិចផ្សារជម្ពូវ័ន ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញនិងត្រូវបានអាជ្ញាធរចុះបិទនាវេលាព្រឹកថ្ងៃទី២៦ ខែមិនា ឆ្នាំ២០២១ ។
អាជ្ញាធរបានឲ្យដឹងថា បុរសដែលរកឃើញមានវិជ្ជមានCOVID-19 នោះឈ្មោះ ជា ប៊ុនធឿន អាយុ៣៩ឆ្នាំ មុខរបរបុគ្គលិករោចក្រ ផលិតក្រដាសយីហោ« ហ៊ីយុនដាយ ភែកឃីជីង»ដែលមានទីតាំងស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍ សែនជ័យ ។ កាលពីថ្ងៃទី២២ ខែមីនា ឆ្នាំ២០២១ បុរសខាងលើមានអាការៈពុំស្រួលខ្លួនហើយគាត់ក៏បានចូលទៅកាន់មន្ទីរសម្រាកព្យាបាលនិងសម្ភព«ឡាំ ប៊ុនថន» ដើម្បីពិនិត្យសុខភាពខណៈនោះពុំទាន់ដឹងថាគាត់មានជម្ងឺអ្វីនៅឡើយ។
តាមប្រភពដដែលបានឲ្យដឹងបន្តទៀតថា លុះដល់ថ្ងៃទី២៥ ខែមិនា ឆ្នាំ២០២១ អាការៈជម្ងឺនៅតែមិនបានធូរស្រាល ទើបក្រុមគ្រូពេទ្យបានធ្វើតេស្តលើកទី១រកជម្ងឺCOVID-19 រកឃើញថា បុរសរូបនោះមានវិជ្ជមានកូវីដ១៩ ក្រោយមកក្រុមគ្រូពេទ្យបានទទួលយកបុរសនេះទៅសម្រាកព្យាបាលជម្ងឺនៅមន្ទីរពេទ្យមិត្តភាពខ្មែ-សូវៀត ហៅមន្ទីរពេទ្យរុស្ស៊ី ។ មិនតែប៉ុណ្ណោះក៏បានយកសំណាកមនុស្សចំនួន១១នាក់ទៀតដែលជាអ្នកធ្វើការជាមួយបុរសខាងលើដើម្បីធ្វើតេស្តរកមេរោគកូវីដនេះផងដែរ ប៉ុន្តែលទ្ធផលនូវពុំទាន់ដឹងនៅឡើយ។
ប្រភពខាងលើបានបញ្ជាក់បន្ថែមទៀតថា បន្ទាប់ពីរកឃើញអ្នកមានវិជ្ជមានCOVID-19 ចូលទៅពិនិត្យពិគ្រោះជម្ងឺនៅក្នុងមន្ទីរសម្រាកព្យាបាលនិងសម្ភព«ឡាំ ប៊ុនថន» បែបនេះ ទើបអាជ្ញាធរសម្រេចចុះទៅបិទជាបណ្ដោះអាសន្នដើម្បីទប់ស្កាត់ការរីករាលដាលនៃការឆ្លងពីមេរោគកាចសាហាវមួយនេះ ។ ទន្ទឹមនិងនេះដែរអាជ្ញាធរជាពិសេសក្រុមគ្រូពេទ្យជំនាញបានអំពាវនាវសុំឲ្យអ្នកដែលធ្លាប់ប្រាស្រ័យទាក់ទងជាមួយលោកជា ប៊ុនធឿន កន្លងមកសូមអញ្ជើញទៅធ្វើតេស្តឲ្យបានឆាប់ដើម្បីសុវត្ថិភាពផ្ទាល់ខ្លួនឯងផងនិងអ្នកដទៃ ព្រមទាំងសង្គមទាំងមូលផងដែរ៕
ចែករំលែកព័តមាននេះ