ខេត្តសៀមរាប ៖ លោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប បានមានប្រសាសន៍ប្រាប់នៅនៅរសៀលថ្ងៃទី២៤ នេះថា បន្ទាប់ពីទទួលបានសេចក្ដីណែនាំរបស់…
ខេត្តសៀមរាប ៖ លោក វណ្ណ ប៊ុនណា ប្រធានមន្ទីរធម្មការ និងសាសនាខេត្តសៀមរាប បានមានប្រសាសន៍ប្រាប់នៅនៅរសៀលថ្ងៃទី២៤ នេះថា បន្ទាប់ពីទទួលបានសេចក្ដីណែនាំរបស់ ក្រសួងធម្មការ និងសាសនា ស្តីពីការវាយគង ជួង រគាំង ទូងស្គរ តាមវត្តអារាម ដើម្បីចូលរួមទប់ស្កាត់ការរាលដាលនៃជំងឺកូវីដ-១៩ ក្នុងសហគមន៍ នៃព្រឹត្តិការណ៍២០កុម្ភៈ កាលពីល្ងាចថ្ងៃទី២៣ ខែមីនា ឆ្នាំ២០២១ម្សិលមិញរួចមក លោកក៏បានណែនាំបន្តដល់ព្រះគ្រូ ព្រះអនុគណក្រុង ស្រុក ក្នុងទូទាំងខេត្តសៀមរាប ឲ្យគ្រប់វត្តទាំងអស់ត្រូវអនុវត្តចាប់ពីម៉ោង៥ទាបភ្លឺ ថ្ងៃទី២៤ ខែមីនា ឆ្នាំ២០២១នេះ រហូតដល់បញ្ចប់ព្រឹត្តិការណ៍សហគមន៍ ២០កុម្ភៈ ហើយព្រឹកមិញនេះ លោកក៏បានទទួលសេចក្ដីរាយការណ៍ពីព្រះអនុគណក្រុង ស្រុកមួយចំនួនថា បានអនុវត្ត ហើយលោកនឹងតាមដាននូវការងារនេះជាបន្តទៀត។
ព្រះតេជគុណ វន ឡាំ គ្រូសូត្រឆ្វេង វត្តស្វាយរមៀត មានសង្ឃដីកាថា ក្រោយពីទទួលបានសេចក្ដីណែនាំរបស់ក្រសួងធម្មការ និងសាសនា ស្តីពីការវាយ គង ជួង រគាំង ទូងស្គរ តាមវត្តអារាម ដើម្បីចូលរួមទប់ស្កាត់ការរាលដាលនៃជំងឺកូវីដ-១៩ ក្នុងសហគមន៍ នៃព្រឹត្តិការណ៍២០កុម្ភៈ កាលពីល្ងាចថ្ងៃទី២៣ ខែមីនា ឆ្នាំ២០២១រួចមក នៅព្រឹកថ្ងៃទី២៤ ខែមីនា ឆ្នាំ២០២១នេះ នៅតាមវត្តអារាមនានាក្នុងខេត្តសៀមរាប បានចាប់ផ្តើមអនុវត្តចាប់ពីម៉ោង៥ទាបភ្លឺ ថ្ងៃទី២៤ ខែមីនា ឆ្នាំ២០២១នេះ រហូតដល់បញ្ចប់ព្រឹត្តិការណ៍សហគមន៍ ២០ កុម្ភៈ។ បន្ទាប់ពីទទួលបានសេចក្ដីណែនាំនេះហើយ នៅវេលាម៉ោង៥ទៀបភ្លឺនេះ វត្តស្វាយរមៀត បានអនុវត្តដោយការវាយគងផង វាយជួងផង និងទូងស្គរផង ដើម្បីចូលរួមរាជរដ្ឋាភិបាលកម្ពុជា ក្នុងការក្រើនរំលឹកដល់ពុទ្ធបរិស័ទគ្រប់ៗរូបឱ្យបង្កើនការប្រុងប្រយ័ត្នចំពោះការឆ្លងរីករាលដាលនៃមេរោគកូវីដ-១៩ ដោយអនុវត្តនូវវិធានការ «៣ការពារ» និង «៣កុំ»។
ព្រះតេជគុណបន្តថា ជាទំនៀមទម្លាប់ខ្មែរពីបុរាណមកដល់បច្ចុប្បន្ននេះ ការវាយជួង និងទូងស្គរតាមវត្តអារាមនានានៅតែជាជំនឿមួយដែលព្រះសង្ឃ និងប្រជាពុទ្ឋបរិស័ទតែងតែជឿ និងអនុវត្តតៗមក ដើម្បីពញ្ញាក់ស្មារតីអ្នកភូមិស្រុក បានដឹងពីហេតុការណ៍មិនល្អ គ្រោះភ័យចោរចូលភូមិ ឬមានបញ្ហាអ្វីផ្សេងៗ រួមទាំងការអបអរសាទរនូវសមិទ្ធផលនានា ឬក៏ជោគជ័យផ្សេងៗក្នុងមូលដ្ឋានស្រុកភូមិ និងទីអារាមនានាផងដែរ។ ព្រះតេជគុណបន្តថា ដើម្បីទប់ស្កាត់ ការឆ្លងរីករាលដាលនៃមេរោគកូវីដ-១៩នេះ នៅវត្តស្វាយរមៀតតែងតែបានណែនាំឱ្យព្រះសង្ឃក៏ដូចជាពុទ្ធបរិស័ទ្ធអនុវត្តជាប្រចាំនូវវិធានការ «៣ការពារ» និង «៣កុំ»។
គួររំលឹកថា កាលពីល្ងាចថ្ងៃទី២៣ ខែមីនា ឆ្នាំ២០២១ ម្សិលមិញនេះ យោងតាមអនុសាសន៍ណែនាំរបស់សម្តេចតេជោ នាយករដ្ឋមន្ត្រី ហ៊ុន សែន នៅព្រឹកថ្ងៃទី២៣ ខែមីនា ឆ្នាំ២០២១ ក្រសួងធម្មការ និងសាសនា បានចេញសារាចរណែនាំ ស្តីពីការវាយគង ជួង រគាំង ទូងស្គរ តាមវត្តអារាម ដើម្បីចូលរួមទប់ស្កាត់ការរាលដាលនៃជំងឺកូវីដ-១៩ ក្នុងសហគមន៍ នៃព្រឹត្តិការណ៍២០កុម្ភៈ ដែលសកម្មភាពនេះ គឺជាសញ្ញាផ្សព្វផ្សាយព័ត៌មានដល់ប្រជាពលរដ្ឋ ពុទ្ធបរិស័ទឲ្យបង្កើនការប្រុងប្រយ័ត្ន ដោយអនុវត្តនូវវិធានការ «៣ការពារ» និង «៣កុំ» របស់ប្រមុខរាជរដ្ឋាភិបាល និងតាមការណែនាំរបស់ក្រសួងសុខាភិបាល រហូតដល់ចប់ព្រឹត្តិការណ៍ ២០កុម្ភៈ ដោយត្រូវអនុវត្តចំនួន៥ដងក្នុង ១ថ្ងៃគឺ ៖ លើកទី១ នៅម៉ោង ៥ព្រឹក , លើកទី២ នៅម៉ោង ១១ព្រឹក, លើកទី៣ នៅម៉ោង ២ រសៀល, លើកទី៤ នៅម៉ោង ៥ល្ងាច និងលើកទី៥ នៅម៉ោង ៨យប់។
ព្រះវិបុលសត្ថា រី សាត ព្រះរាជគណៈថ្នាក់កិត្តិយសនៃព្រះរាជាណាចក្រកម្ពុជា និងជាព្រះចៅអធិការវត្តកេសរារាម ស្ថិតក្នុងក្រុងសៀមរាប មានថេរដីកាថា បន្ទាប់ពីទទួលបានសេចក្ដីណែនាំនេះហើយ នៅវេលាម៉ោង៥ទៀបភ្លឺព្រឹកមិញនេះ វត្តកេសរារាម បានអនុវត្តដោយការវាយគងផង វាយជួងផង និងទូងស្គរផង ដើម្បីចូលរួមរាជរដ្ឋាភិបាលកម្ពុជា ក្នុងការផ្សព្វផ្សាយព័ត៌មានដល់ប្រជាពលរដ្ឋ និងពុទ្ធបរិស័ទគ្រប់ៗរូប ឲ្យបង្កើនការប្រុងប្រយ័ត្នចំពោះការឆ្លងរីករាលដាលនៃវីរុសកូវីដ-១៩ ដោយអនុវត្តនូវវិធានការ «៣ការពារ» និង «៣កុំ» ។
ព្រះចៅអធិការវត្តកេសរារាម មានសង្ឃថេរដីកាទៀតថា ជាទំនៀមទម្លាប់ខ្មែរពីបុរាណមកដល់បច្ចុប្បន្ននេះ ការវាយជួង និងទូងស្គរតាមវត្តអារាមនានានៅតែជាជំនឿមួយដែលព្រះសង្ឃ និងប្រជាពុទ្ឋបរិស័ទតែងតែជឿ និងអនុវត្តតៗមក ដើម្បីពញ្ញាក់ស្មារតីអ្នកភូមិស្រុក បានដឹងពីហេតុភេទមិនល្អ គ្រោះភ័យ ចូលភូមិ ឬព្រះចៅអធិការវត្តទទួលអនិច្ចធម្ម ដើម្បីជាសញ្ញាបណ្តេញនូវឧបទ្រុឌចង្រៃផ្សេងៗ រួមទាំងការអបអរសាទរនូវសមិទ្ធផលនានា ឬក៏ជោគជ័យផ្សេងៗក្នុងមូលដ្ឋានស្រុកភូមិ និងទីអារាមនានាផងដែរ ជាពិសេសសំឡេងទូងស្គរ ជានិច្ចការតែងប្រើនៅក្នុងរដូវចូលព្រះវស្សា ដើម្បីជាសញ្ញាប្រាប់ម៉ោងពេល ហើយឲ្យបរិស័ទបានដឹងឱ្យដឹងថាដល់វេលា ឈប់សម្រាកពីការងារហើយ និងដាស់ឱ្យភ្ញាក់ពីដំណេកបន្តកិច្ចការរៀងៗខ្លួនទៀត៕ ដោយ ៖ ច័ន្ទ រស្មី
ចែករំលែកព័តមាននេះ