តាមពិត មូលហេតុដែលប្រទេសខ្លះអនុញ្ញាតឱ្យលក់បារីអេឡិចត្រូនិចគោលដៅសំខាន់ដើម្បីជួយអ្នកដែលកំពុងជក់បារីដល់ដំណាក់កាលញៀន ហើយពួកគាត់ចង់ផ្ដាច់បារី។ ពួកគាត់អាចងាកមកជក់បារីអេឡិចត្រូនិច ហើយចាប់ផ្ដើមកាត់បន្ថយបារីមូរដៃឬបារីកញ្ចប់បន្តិចម្ដងៗ។ នៅដំណាក់កាលណាមួយ ពួកគាត់អាចផ្ដាច់បារីទាំងស្រុងទាំងបារីថ្នាំជក់និងបារីអាឡិចត្រូនិច។
ប៉ុន្តែនៅក្នុងស្ថានភាពជាក់ស្ដែង បារីអេឡិចត្រូនិចត្រូវក្រុមអ្នកមិនទាន់ចេះជក់បារីផងងាកមកប្រើប្រាស់យ៉ាងគគ្រឹកគគ្រេងទៅវិញព្រោះពួកគេគិតថាវាជាស្ទីលរស់នៅមួយបែប (lifestyle)។ ដូច្នេះ ការដាក់ឱ្យប្រើប្រាស់បារីអេឡិចត្រូនិចដែលមានគោលដៅសំខាន់ដើម្បីកាត់បន្ថយការជក់បារីរហូតដល់គ្មានផ្សែងបារីបែរជាបង្កើនការជក់បារីទៅវិញ។ អ្នកជំនាញព្រមានថាអ្នកជក់បារីអេឡិចត្រូនិចសូមកុំគិតថាគ្មានគ្រោះថ្នាក់ ឬគ្មានប៉ះពាល់សុខភាព។ បារីនេះបង្កផលប៉ះពាល់ខ្លាំងណាស់។
ទីក្រុងហាណូយ៖ ថ្មីៗនេះ ក្រសួងសុខាភិបាលវៀតណាមចេញរបាយការណ៍ថាកាលពីឆ្នាំ២០២៣ មនុស្សជាង១២០០នាក់បានធ្លាក់ខ្លួនឈឺរហូតដល់ចូលដេកពេទ្យដោយសារជក់បារីអេឡិចត្រូនិច។ ប្រធាននាយកដ្ឋានផ្ដល់សេវាសុខាភិបាលប្រាប់ថានៅក្នុងចំណោមជនរងគ្រោះទាំងនោះ ២៧នាក់អាយុក្រោម១៦ឆ្នាំ, ៤៤នាក់អាយុចន្លោះពី១៦ទៅ១៨ឆ្នាំ។ លទ្ធផលស្ទង់មតិទៅលើអ្នកប្រើប្រាស់បារីអេឡិចត្រូនិចនៅក្នុង១១ទីតាំងបង្ហាញថាសិស្សដែលប្រើប្រាស់បារីនេះអាយុចន្លោះពី១៣ទៅ១៧ឆ្នាំកើនឡើង៨,១%កាលពីឆ្នាំ២០២៣។ សិស្សអាយុចន្លោះពី១៣ទៅ១៥ឆ្នាំក៏កើនឡើង៨%ផងដែរនៅក្នុងឆ្នាំ២០២៣។
គ្រាន់តែបារីមូរដៃ ឬបារីកញ្ចប់ប៉ះពាល់សុខភាពធ្ងន់ធ្ងរ និងខាតបង់ប្រាក់កាសមិនតិចទេ។ ដូច្នេះ បើរដ្ឋាភិបាលអនុញ្ញាតឱ្យជក់បារីអេឡិចត្រូនិចដែលសម្បូរជាតិនីកូទីន វានឹងធ្វើឱ្យមនុស្សកាន់តែញៀន និងមានអារម្មណ៍ចង់តែជក់បារីហ្នឹងទៀត។ យូរៗទៅមនុស្សបាក់ជក់បារីនេះតាមគ្នាកាន់តែច្រើន។ នេះបើតាមការលើកឡើងរបស់ប្រធាននាយកដ្ឋានខាងលើ។
លោកង្វៀនទ្រឹងង្វៀនជានាយកមជ្ឈមណ្ឌលគ្រប់គ្រងជាតិពុលនៃមន្ទីរពេទ្យបាក់ម៉ៃ (Bach Mai Hospital) ប្រាប់ថាបារីអេឡិចត្រូនិចមានសារធាតុគីមីច្រើនណាស់។ ពោលគឺសូម្បីតែបារីថ្នាំខ្លាំង ឬបារីកញ្ចប់ក៏គ្មានសារធាតុទាំងនេះដែរ។ កាលណាក្រុមហ៊ុនផលិតលាយគ្រឿងផ្សំច្រើនស្អេកស្កះបែបនេះ វាធ្វើឱ្យអ្នកជក់ស្រូបយកសារធាតុនីកូទីនកាន់តែច្រើន។ ឬមិនដូច្នេះទេ ពួកគេស្រូបយកសារធាតុញៀនខុសច្បាប់ និងសារធាតុដទៃទៀត។ ពួកគេមានអារម្មណ៍ញៀនចង់តែជក់ជាបន្តទៀត។
តម្លៃដែលត្រូវខាតបង់ទៅលើផលវិបាកនៃការជក់បារីអេឡិចត្រូនិចមិនមែនតិចតួចទេ។ អ្នកដែលរងការប៉ះពាល់សុខភាពដោយសារបារីនេះត្រូវចំណាយពេល និងលុយកាក់ដើម្បីព្យាបាល។ ពួកគេអាចនឹងចំណាយអស់រាប់រយលានដុង។ នៅក្នុងន័យនេះ ការប្រើប្រាស់បារីអេឡិចត្រូនិចធ្វើឱ្យខាតច្រើនជាងចំណេញ។ ដូច្នេះ វៀតណាមចាំបាច់ត្រូវតែហាមឃាត់ការនាំចូល ចែកចាយ ដាក់លក់ និងជក់បារីប្រភេទនេះជាការល្អជាង។ នេះបើយោងតាមទស្សនៈរបស់លោកង្វៀនទ្រឹងង្វៀន។
សព្វថ្ងៃនេះ រដ្ឋ ឬប្រទេសចំនួន៣៩បានបិទដំណើរការបារីអេឡិចត្រូនិច។ នេះបើយោងតាមទិន្នន័យរបស់អង្គការសុខភាពពិភពលោក (WHO)។ នៅអាស៊ីអាគ្នេយ៍ ប្រទេសចំនួន៥បានហាមឃាត់រួចហើយ។ ក្នុងនោះមានប្រទេសថៃ, សិង្ហបុរី, ឡាវ, ប្រ៊ុយណេ និងកម្ពុជា។ ប្រធាននាយកដ្ឋានផ្ដល់សេវាសុខាភិបាលថ្លែងថាជាគោលជំហររបស់ក្រសួងសុខាភិបាល ក្រសួងចង់ឱ្យបិទបារីនេះទាំងស្រុងតែម្ដង។ ក្រសួងកំពុងរៀបចំសំណើដើម្បីដាក់ជូនរដ្ឋាភិបាលពិនិត្យ និងអនុម័ត៕
ចែករំលែកព័តមាននេះ