ខេត្តព្រះវិហារ ៖ បង្ក្រាបល្បែងឆ្នោតយួននិងល្បែងបៀរខុសច្បាប់ដោយឃាត់ខ្លួនមនុស្សមានប្រុសមានស្រីបានចំនួន៥នាក់ នៅស្រុកជ័យសែន ។ ក្រុមអ្នកញៀន៣នាក់ជាអ្នកលេង ឈ្មោះ វ៉ាន់ ធារី ភេទប្រុស…
ខេត្តព្រះវិហារ ៖ បង្ក្រាបល្បែងឆ្នោតយួននិងល្បែងបៀរខុសច្បាប់ដោយឃាត់ខ្លួនមនុស្សមានប្រុសមានស្រីបានចំនួន៥នាក់ នៅស្រុកជ័យសែន ។ ក្រុមអ្នកញៀន៣នាក់ជាអ្នកលេង ឈ្មោះ វ៉ាន់ ធារី ភេទប្រុស អាយុ៣៥ឆ្នាំ ទី២ឈ្មោះឡាយ ឌិប ភេទស្រី អាយុ២៨ឆ្នាំ និងទី៣-ឈ្មោះ ម៉ម ឡៃហ័ង ភេទស្រី អាយុ៣០ឆ្នាំ ។ និង២នាក់ទៀត ម្នាក់បុរសជាមេឆ្នោតយួនដុះស្លែ ឈ្មោះ សួន ស៊ីណាត អាយុ៤០ឆ្នាំ រួមជាមួយស្ត្រីជាអ្នកកត់ឆ្នោតម្នាក់ ឈ្មោះ កាន ឡៃស៊ូ អាយុ៣៣ឆ្នាំ ជនសង្ស័យប្រសស្រី ទាំង៥នាក់ខាងលើ រស់នៅរស់ភូមិស្អាង ឃុំស្អាង ស្រុកជ័យសែន ខេត្តព្រះវិហារ ត្រូវបានសាលាដំបូង ខេត្តព្រះវិហារ ឃុំខ្លួនបណ្តោះអាសន្ន នៅពន្ធនាគារខេត្តព្រះវិហារ ។
បើតាមការបញ្ជាក់ពីលោក វុធ សាវី ព្រះរាជអាជ្ញារងតំណាងអយ្យការ អមសាលាដំបូងខេត្តព្រះវិហារ បានឲ្យដឹងថា ប្រតិបត្តិការចុះបង្ក្រាបទីតាំងលួចលាក់ល្បែងឆ្នោតយួនខុសច្បាប់ និងកន្លែងវង់ល្បែងបៀរ ខ្លាឃ្លោក នៅទីរួមស្រុកជ័យសែន បានធ្វើឡើងនៅរសៀលថ្ងៃទី២២ មីនា ឆ្នាំ២០២១ កន្លងទៅ ដោយសមត្ថកិច្ចរឹបអូសបាន វត្ថុតាងជាច្រើន និងឃាត់ខ្លួនមនុស្សប្រុសស្រី៥នាក់ផងដែរ ។ រហូតមកដល់រសៀលថ្ងៃទី២៣ មីនា ឆ្នាំ២០២១ នេះបញ្ជាការដ្ឋានកងរាជអាវុធហត្ថខេត្តព្រះវិហារ ក៏បានបញ្ជូនសំណុំរឿងជនសង្ស័យទាំង៥នាក់មកសាលាដំបូងខេត្តព្រះវិហារ ។
លោកបន្តថា ក្នុងដំណាក់កាលសាកសួររបស់តំណាងអយ្យការ និងស្តាប់ចម្លើយរបស់ជនសង្ស័យរួចមក តំណាងអយ្យការ បានសម្រេចចោទប្រកាន់ជនសង្ស័យទាំងនោះ ពីបទប្រព្រឹត្តល្បែងស៊ីសងខុសច្បាប់ និងជេរប្រមាថអ្នករាជការសាធារណៈ និងធ្វើដីការសន្និដ្ឋានបញ្ជូនរឿងឲ្យស៊ើបសួរទៅថៅក្រមស៊ើប ដើម្បីមានចំណាត់ការបន្ត ។
លោកបន្តថា ក្រោយពេលបញ្ចប់ការស៊ើបសួរ ចៅក្រមក៏បានសម្រេចឃុំខ្លួន ជនសង្ស័យប្រុសស្រីទាំង៥នាក់ខាងលើ នៅពន្ធនាគារខេត្តព្រះវិហារ ជាបណ្តោះអាសន្ន នៅថ្ងៃទី២៣ ខែមីនា ឆ្នាំ២០២១នេះ ដើម្បីរងចាំការស៊ើបអង្កេតបន្តទៀត ។
ចែករំលែកព័តមាននេះ