រាជធានីភ្នំពេញ ៖ នៅវេលាព្រឹកថ្ងៃទី១៧ ខែមិនា ឆ្នាំ២០២១នេះ អ្នកជំងឺកូវីដ១៩ចំនួន៣នាក់ទៀតហើយ ត្រូវបានរកឃើញនៅម្តុំវត្តសន្សំកុសល ស្ថិតក្នុងភូមិសន្សំកុសល៣ សង្កាត់បឹងទំពន់ទី១ ខណ្ឌមានជ័យ…
រាជធានីភ្នំពេញ ៖ នៅវេលាព្រឹកថ្ងៃទី១៧ ខែមិនា ឆ្នាំ២០២១នេះ អ្នកជំងឺកូវីដ១៩ចំនួន៣នាក់ទៀតហើយ ត្រូវបានរកឃើញនៅម្តុំវត្តសន្សំកុសល ស្ថិតក្នុងភូមិសន្សំកុសល៣ សង្កាត់បឹងទំពន់ទី១ ខណ្ឌមានជ័យ បង្កអោយមានការភ្ញាក់ផ្អើលយ៉ាងខ្លាំងពីសំណាក់បងប្អូនប្រជាពលរដ្ឋដែលរស់នៅក្បែរតំបន់នោះ អំឡុងពេលដែលរថយន្តសាម៉ុយរបស់ក្រុមគ្រូពេទ្យចុះទៅទទួលអ្នកជំងឺទាំងនោះ ដើម្បីយកទៅព្យាបាល ។
ការរកឃើញអ្នកជំងឺទាំង៣នាក់ខាងលើ គឺបន្ទាប់ពីវេលាយប់ថ្ងៃទី១៦ ខែមិនា ឆ្នាំ២០២១ ក្រុមគ្រូពេទ្យបានទៅយកអ្នកជំងឺម្នាក់រួចមកហើយ លុះក្រោយមកក៏បន្តចុះយកជាបន្តបន្ទាប់នៅព្រឹកនេះតែម្តង ក្រោយការតេស្តសំណាករកឃើញថា ពួកគេវិជ្ជមានវីរ៉ុសកូវីដ១៩ ។
បច្ចុប្បន្នអ្នកជម្ងឺទាំង៣នាក់ ( សុទ្ធតែជាបុរស ) ត្រូវបញ្ចូនទៅព្យាបាលនៅសណ្ឋាគារ The Great Duke ( អតីតសណ្ឋាគារអាំងទែរកុងទីណង់តាល់ ) ស្ថិតក្នុងសង្កាត់ទំនប់ទឹក ខណ្ឌបឹងកេងកង ។
គួរបញ្ជាក់ថា នៅព្រឹកថ្ងៃដដែលនេះដែរ ក្រុមគ្រូពេទ្យបានយកមនុស្សចំនួន៤នាក់ ក្នុងនោះមានបុរស៣នាក់ខាងលើ និងនារីម្នាក់ទៀត ដែលមានវិជ្ជមានកូវីដ១៩ ប៉ុន្តែនៅពេលដែលពិនិត្យផ្ទៀងផ្ទាត់ទៅ ឃើញថា នារីម្នាក់ក្នុងចំណោមអ្នកទាំង៤ គឺពុំមានឈ្មោះវិជ្ជមានក្នុងបញ្ជីររបស់ក្រសួងឡើយ ដូច្នេះហើយនាងត្រូវបញ្ចូនត្រឡប់ទៅផ្ទះវិញ ប៉ុន្តែតម្រូវអោយធ្វើចត្តាឡីស័កដាច់ដោយឡែករយៈពេល១៤ថ្ងៃ ដើម្បីតាមដានជាបន្តទៀត ។
សូមបញ្ជាក់ថា ចំពោះសមាជិកគ្រួសារដែលរស់នៅជាមួយ ឬអ្នកដែលបានប៉ះពាល់ផ្ទាល់ ឬប្រយោលជាមួយអ្នកជំងឺ ក្រុមគ្រូពេទ្យតម្រូវអោយមានការធ្វើចត្តាឡីស័កនៅផ្ទះ ដោយចាំបាច់មានកងកម្លាំងសាធារណៈចូលរួមការពារពង្រឹងសន្តិសុខ នៅតាមលំនៅឋាន ឬបន្ទប់ផ្ទះជួលរបស់អ្នកជម្ងឺនីមួយៗផងដែរ ៕
ចែករំលែកព័តមាននេះ