រាជធានីភ្នំពេញ ៖ ទាក់ទិននឹងវិធីសាស្ដ្រព្យាបាលគ្រាប់ក្រួសថ្ពក់ជាប់នៅបង្ហួរនោម លោកវេជ្ជបណ្ឌិត យក់ រតនា ឯកទេសវះកាត់មូត្រសាស្ដ្រ ជាប្រធានផ្នែកសល្យសាស្ដ្រ(ខ)នៃមន្ទីរពេទ្យកាល់ម៉ែត បានបកស្រាយថា ៖ គ្រាប់ក្រួសថ្ពក់ជាប់នៅបង្ហួរនោម គឺជាការរមៀលធ្លាក់ចុះនៃគ្រាប់ក្រួសដែលកកើតនៅក្នុងតម្រងនោម ឬប្លោកនោម ហើយនៅពេលអ្នកជំងឺបត់ជើងតូច គ្រាប់ក្រួសនោះក៏ធ្លាក់មកថ្ពក់ជាប់នឹងបង្ហួរនោម ដែលជាផលវិបាកមិនអាចឱ្យទឹកនោមធ្លាក់ចេញមកក្រៅបាន ជាហេតុធ្វើឱ្យមានការស្ទះនោមស្រួចស្រាវ ដែលភាសាបច្ចេកទេសហៅថា Rétention Aiguë d’Urine។
ជំងឺនេះអាចកើតលើបុរស ពិសេសបុរសពេញវ័យ ក្នុងករណីតិចតួចក៏មានកើតលើស្ត្រីផងដែរ។
១) រោគសញ្ញា ៖
រោគសញ្ញាដែលស្ដែងចេញឱ្យយើងចាប់អារម្មណ៍មានដូចជា ៖
- សភាពអ្នកជំងឺឡេះឡះ
- ពិបាកទ្រាំ
- ខ្សោយកម្លាំង
- ចុកពោះលើថ្ងាស់
- ពិបាកនោម
- នោមក្រហល់ក្រហាយ
- ទំហំទឹកនោមតូច នោមតិចមិនចង់ចេញ
- ជួនក្ដៅខ្លួន ទឹកនោមល្អក់
- ស្ទះនោមជិតឈឹង
- មានទឹកនោមប៉ោងលើថ្ងាស់
- បើគ្រាប់ក្រួសធ្លាក់មកផ្នែកក្រោមនៃបង្ហួរនោមយើងអាចស្ទាបឃើញ ។
២) ការធ្វើរោគវិនិច្ឆ័យ ៖
តើយើងអាចដឹងថាគ្រាប់គ្រួសថ្ពក់ជាប់បង្ហួរនោមដោយវិធីណា?
- ពិនិត្យអេកូសាស្ដ្រ
- ថតកាំរស្មីអ៊ិច ។
៣) វិធីព្យាបាល ៖ ដំណោះស្រាយនៃការព្យាបាលរួមមាន ៖
ក. បើគ្រាប់គ្រួសថ្ពក់ជាប់បង្ហួរនោមផ្នែកខាងលើ ៖
- យើងអាចបាញ់គ្រាប់ក្រួស បញ្ចូលក្នុងប្លោកនោម (Pression Hydrostatique) រួចយើងឆ្លុះបំបែកគ្រាប់គ្រួស ក្នុងប្លោកនោមជាក្រោយ ។
បញ្ជាក់ ៖ ជៀសវាងការវះកាត់បង្ហួរនោមយកក្រួសចេញ ដែលជាហេតុធ្វើឱ្យបង្ហួរនោមរួមតូច។
ខ. បើគ្រាប់ក្រួសថ្ពក់ជាប់បង្ហួរនោមផ្នែកខាងក្រោម (Méat Uréthral) ៖
- យើងអាចបំបែកក្រួសដោយចុង Pince មុខវែង។
៤) ផលវិបាក ៖
បញ្ហាប្រឈមដែលយើងធ្លាប់ជួបប្រទះ ចំពោះអ្នកជំងឺដែលពុំបានទទួលការព្យាបាល ឬក៏ទទួលការព្យាបាលពុំបានត្រឹមត្រូវមានដូចជា ៖
- ការបង្ករោគធ្ងន់ធ្ងរតាមប្លោកនោម បង្ហួរនោម
- រលាកប្លោកនោម បង្ហួរនោមរ៉ាំរ៉ៃ
- បង្ហួរនោមរួមតូច
- បង្ហួរនោមស្ទះជិតឈឹង ។
៥) ដំបូន្មានក្រុមគ្រូពេទ្យជំនាញឯកទេសវះកាត់ប្រព័ន្ធទឹកនោម ៖
សូមបងប្អូនប្រជាពលរដ្ឋយើងទាំងអស់ដែលមានការសង្ស័យ ឬមានជំងឺស្ទះទឹកនោមស្រួចស្រាវ ដែលបណ្តាលមកពីគ្រាប់ក្រួសថ្ពក់ជាប់បង្ហួរនោមដែលមានសញ្ញាដូចបានរៀបរាប់ជូនខាងលើ សូមមេត្តាអញ្ជើញមកទទួលការពិគ្រោះ ជាមួយក្រុមការងារវេជ្ជបណ្ឌិតជំនាញ ឯកទេសវះកាត់ប្រព័ន្ធទឹកនោមនៃមន្ទីរពេទ្យកាល់ម៉ែត ដើម្បីទទួលបានការវិភាគរោគវិនិច្ឆ័យប្រាកដជាក់លាក់មួយ ដោយឈរលើសមត្ថភាពជំនាញ និងបទពិសោធន៍ខ្ពស់ ជាមួយនឹងឧបករណ៍ទំនើបស្វ័យប្រវត្តិបំបែកគ្រាប់ក្រួស ៕
ចែករំលែកព័តមាននេះ