រាជធានីភ្នំពេញ ៖ ប៉ូលិសប៉ុស្តិ៍ចោមចៅផ្នែកព្រហ្មទណ្ឌម្នាក់ ត្រូវជនដៃដល់ម្នាក់ក្នុងចំណោមគ្នា៣នាក់ចាក់១ដែកឆាបរបួសធ្ងន់ ខណៈពេលកំពុងបំពេញការងារឆែកឆេរជនដៃដល់ទាំង៣នាក់ផ្សេងទៀត ដែលមានគ្រឿងញៀន១កញ្ចប់តូច នៅក្រោយរោងចក្រអូសេអង់ ផ្សារព្រៃទា បង្កឱ្យមានការភ្ញាក់ផ្អើលឡើងកាលពីវេលាម៉ោង១០ និង៣០យប់ នៅចំណុចផ្ទះជួលក្រោយរោងចក្រអូសេអង់ ផ្សារព្រៃទា ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
ប៉ូលិសប៉ុស្តិ៍ចោមចៅដែលត្រូវជនដៃដល់ចាក់១ដែកឆាបជាប់ខ្នងនោះមានឈ្មោះ សាយ ចំរើន អាយុជាង៣០ឆ្នាំ ជាមន្ត្រីផ្នែកព្រហ្មទណ្ឌ ព្រះនាម16S។ ចំណែកឯជនដៃដល់ដែលសមត្ថកិច្ចឃាត់បានចំនួន៣នាក់នោះមាន១-ឈ្មោះ វ៉ន ពេជ្រ អាយុ២៦ឆ្នាំ មុខរបរកម្មករសំណង់ មានស្រុកកំណើតភូមិអន្លង់ទៀន ឃុំបុរីជលសារ ស្រុកបុរីជលសារ ខេត្តតាកែវ ២-ឈ្មោះវ៉ន ស្នា អាយុ១៩ឆ្នាំ ជាកម្មករោងចក្រ មានស្រុកកំណើត នៅភូមិក្រោលគោ ឃុំក្រោលគោ ស្រុកស្វាយជ្រុំ ជាប្អូនជីដូនមួយរបស់ វ៉ន ពេជ្រ និង៣-ឈ្មោះ ឡាង ឡេង អាយុ៣៦ឆ្នាំ មុខរបររត់រ៉ឺម៉កម៉ូតូ ស្រុកកំណើតនៅភូមិពាមឈឺគង ឃុំសំបូរមាស ស្រុកកងមាស ខេត្តកំពង់ចាម ។
តាមប្រភពពីសមត្ថកិច្ចដែលនៅក្នុងហេតុការណ៍ឈ្មោះ អ៊ុយ ខេមរា ព្រះនាម 16P បានឱ្យដឹងថា មុនពេលកើតហេតុ រូបគាត់រួមជាមួយជនរងគ្រោះ16S ជិះម៉ូតូ១គ្រឿងដើរស្បាតក្នុងមូលដ្ធាន ខណៈពេលមកដល់ចំផ្ទះជួលកើតហេតុខាងលើ ក៏បានប្រទះជួបជនសង្ស័យ៣នាក់ បន្ទាប់មកបានធ្វើការឆែកឆេររកឃើញថ្នាំញៀនមួយកញ្ចប់តូច ភ្លាមនោះក៏មានជនដៃដល់ដែលជាអ្នកចាក់សមត្ថកិច្ចបានមកថាឱ្យ «ពួកលោកឯងមកធ្វើអីម្តុំហ្នឹង ខ្លាចអីប៉ូលិស» ។
បន្ទាប់មកសមត្ថកិច្ចដែលរងគ្រោះបានដើរទៅសួរនាំ ហើយជនល្មើសបានទាញដាវដែលលាក់នៅក្បែរខ្លួននោះមកគប់ត្រូវដៃសមត្ថកិច្ចខាងស្តាំ រួចជនល្មើសបានរត់ឡើងលើផ្ទះជួល ហើយសមត្ថកិច្ចបានរត់ដេញតាម ក៏ត្រូវជនល្មើសឈ្មោះ វ៉ន ពេជ្រលម យកដែកឆាបដែលមានប្រវែងជាង២តឹកចាក់ពីក្រោយចំកណ្តាលឆ្អឹង បណ្តាលឱ្យសមត្ថកិច្ចដួលបាត់បងជំហរមួយរំពេច ។
ភ្លាមនោះជនល្មើសខាងលើបាននាំគ្នាជិះម៉ូតូចេញទៅបាត់ទៅ។ សមត្ថកិច្ចដដែលបានបន្តថា លោកបានហៅវិទ្យុទាក់ទងសុំកម្លាំងជំនួយ និងទាក់ទងរថយន្តសង្គ្រោះបន្ទាន់ តែចាំរថយន្តយូរពេក ក៏សំរេចដឹកតាមរ៉ឺម៉កកង់បី ទៅជួបរថយន្តសង្គ្រោះនៅពាក់កណ្តាលផ្លូវ។
បន្ទាប់ពីដឹកជនរងគ្រោះទៅមន្ទីពេទ្យរួច លោកយឹម សារ៉ាន់ អធិការនគរបាលខណ្ឌពៅធិ៍សែនជ័យ បានបញ្ជាកម្លាំងបន្ថែមឡោមព័ទ្ធឆែកឆេរតាមបន្ទប់ជួលនៅទីនោះ រហូតទៅដល់បន្ទប់លេខ៧៣ ទើបប៉ូលិសដែលមានព្រះនាម16Pប្រទះឃើញជនល្មើសដេករុំភួយគួរឱ្យសង្ស័យ បានសុំប៉ើងភួយចេញឃើញពិតជាជនសង្ស័យ ឃើញដូចនេះជនសង្ស័យបានប្រវាយប្រតប់ជាមួយប៉ូលិសក៏ធ្វើការឃាត់ខ្លួន និងឆែកឆេរក្នុងបន្ទប់ជួលរបស់ជនល្មើសរកឃើញដាវ សាំម៉ូរៃ២ដើម ឧបករណ៍សំរាប់ជក់ថ្នាំមួយចំនួន កាំបិត៤ដើម ដែលស្រួចសំរាប់បុកបំបែកគ្រាប់សោ.កម៉ូតូចំនួន១ និងស្លាកលេខ២សន្លឹកដែលមានលេខ ១កណ្តាល-1D9094
ភ្នំពេញ 1AB-5858 ដែលគាស់ចេញម៉ូតូ និងបានបន្តឆែករកមុខចាប់ជនសង្ស័យ២នាក់ទៀតជាបន្តបន្ទាប់ផងដែរ។
បើតាមសម្តីលោកគ្រូពេទ្យ ជនរងគ្រោះអាចពិការមួយជីវិត ដោយសារចាក់ចំឆ្អឹងកងទី៨ ៕
ចែករំលែកព័តមាននេះ