រាជធានីភ្នំពេញ ៖ រថយន្តបែនដឹកដីមួយគ្រឿង សង្ស័យបើកបត់ ក៏ជ្រុលទៅបុកបុរសម្នាក់ជិះម៉ូតូមួយគ្រឿងឌុបប្រពន្ធត្រឡប់មកពីផ្សារ បណ្តាលឱ្យដួលម៉ូតូខ្ទាតចូលក្រោមរថយន្ត ចំណែក២នាក់ប្តីប្រពន្ធបានខ្ទាតចេញផុតពីម៉ូតូ ទើបមិនបណ្តាលឱ្យរងគ្រោះថ្នាក់អ្វីធ្ងន់ធ្ងរទេ គឺគ្រាន់តែរងរបួសស្រាលប៉ុណ្ណោះ ។
ហេតុការណ៍ខាងលើនេះបានកើតឡើងកាលពីវេលាម៉ោង09និង30នាទីយប់ថ្ងៃទី6 ខែមីនា ឆ្នាំ 2021 នៅចំណុចខាងក្រោយផ្សារក្រមួន តាមផ្លូវបេតុង ស្ថិតនៅភូមិព្រែកតាឡុង សង្កាត់ ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្តីប្រពន្ធទាំង២នាក់ខាងលើមិនស្គាល់អត្តសញ្ញាណនោះទេ ជិះម៉ូតូមួយគ្រឿងម៉ាកហុងដាឌ្រីម ពណ៍ខ្មៅ ពាក់ស្លាកលេខ ភ្នំពេញ 1IG-1549 ។ ចំណែករថយន្តបែនដឹកដី ពណ៍ស ពាក់ស្លាកលេខ ភ្នំពេញ 3D-7178 បើកបរដោយបុរសម្នាក់មិនស្គាល់អត្តសញ្ញាណ ។
តាមប្រភពព័ត៍មានពីបុរសអ្នកលក់ដូរក្បែរកន្លែងកើតហេតុបានអោយដឹងថា មុនពេលកើតហេតុ គេឃើញបុរសម្នាក់បើកបរម៉ូតូមួយគ្រឿងមានឌុបប្រពន្ធត្រឡប់មកពីផ្សារ លុះមកដល់ចំណុចកើតហេតុខាងលើ ស្រាប់តែមានបុរសម្នាក់បើករថយន្តបែនដឹកដីមួយគ្រឿង ធ្វើដំណើរស្របទិសគ្នាពីលិចទៅកើត បត់ស្ដាំមិនប្រយ័ត្ន ក៏ជ្រុលទៅបុកម៉ូតូ បណ្តាលឱ្យខ្ទាតម៉ូតូចូលក្រោមរថយន្តកិនខូចខាតស្ទើរទាំងស្រុង ប៉ុន្តែសំណាងល្អប្ដីប្រពន្ធខ្ទាតចេញផុតពីម៉ូតូ គ្រាន់តែរងរបួសស្រាលប៉ុណ្ណោះ ។ ពេលហេតុការណ៍បែបនេះកើតឡើង ភាគីខាងរថយន្តនិងម៉ូតូ ធ្វើការសម្របសម្រួលមិនត្រូវគ្នានោះទេ គិតតែឈ្លោះប្រកែកគ្នារួចក៏ប្ដឹងសមត្ថកិច្ចឱ្យចុះមកវាស់វែង ។
ក្រោយពេលកើតហេតុ សមត្ថកិច្ចចុះមកធ្វើការសម្របសម្រួល ដោយភាគីខាងម្ចាស់ម៉ូតូទាមទារឱ្យសងតាមតម្លៃម៉ូតូថ្មី ឬសងលុយពួកគាត់ក្នុងតំលៃ2200ដុល្លារ ចំណែកភាគីខាងរថយន្តសុំត្រឹមទិញម៉ូតូស៊េរីឆ្នាំ2020 តែជាប្រភេទម៉ូតូមួយទឹក មានស្លាកលេខដូចគ្នានិងបានយកមកដល់កន្លែងកើតហេតុតែម្ដង ។ ភាគីទាំង២បានជជែកគ្នាអស់ជិត2ម៉ោង ទើបត្រូវគ្នា ដោយភាគីខាងរថយន្តព្រមសងជាលុយចំនួន2050ដុល្លារដើម្បីបញ្ចប់រឿងនៅកន្លែងកើតហេតុ ហើយម៉ូតូដែលរងការខូចខាតគឺម្ចាស់រថយន្តជាអ្នកយក ចំណែកម្ចាស់ម៉ូតូយកលុយ ៕
ចែករំលែកព័តមាននេះ