រាជធានីភ្នំពេញ ៖ ជាថ្មីបន្តទៀត សម្ដេចតេជោ ហ៊ុន សែន នាយករដ្ឋមន្ត្រីបានប្រកាសថា នឹងបន្តកាន់តំណែងជានាយករដ្ឋមន្ត្រីរហូតគ្មានពេលកំណត់ ។ ការបញ្ជាក់របស់សម្តេចតេជោ…
រាជធានីភ្នំពេញ ៖ ជាថ្មីបន្តទៀត សម្ដេចតេជោ ហ៊ុន សែន នាយករដ្ឋមន្ត្រីបានប្រកាសថា នឹងបន្តកាន់តំណែងជានាយករដ្ឋមន្ត្រីរហូតគ្មានពេលកំណត់ ។
ការបញ្ជាក់របស់សម្តេចតេជោ បន្ទាប់ពីក្រុមប្រឆាំងបានរិះគន់សម្តេចតេជោថា ធ្វើអ្វីក៏ខុសពាក់ព័ន្ធនឹងការចាក់វ៉ាក់សាំងចិន ធ្វើឲ្យប្រជាពលរដ្ឋមានបញ្ហាក្នុងគោលបំណងចង់កាន់អំណាច ។ ថ្លែងក្នុងសន្និសីទសារព័ត៌មាននាព្រឹកថ្ងៃទី៤ ខែមីនា ឆ្នាំ២០២១ នៅមន្ទីរពេទ្យកាល់ម៉ែត្រ សម្តេចតេជោបានលើកឡើងថា ចាប់ពីពេលនេះតទៅ សម្ដេចឈប់ប្រកាសអំពីពេលវេលានៃការកាន់តំណែងជានាយករដ្ឋមន្ត្រីប៉ុន្មានឆ្នាំទៀតហើយ ពោល គឺសម្ដេចនឹងកាន់តំណែងជានាយករដ្ឋមន្ត្រីរហូតទាល់តែសម្ដេចលែងចង់ធ្វើតែម្ដង ។
សម្តេចគូសបញ្ជាក់ថា ៖«ឥឡូវឈប់ប្រកាសពីរឿង១០ឆ្នាំ ២០ឆ្នាំ ធ្វើរហូតទាល់តែឈប់ចង់ធ្វើ កុំឲ្យវាពិបាកពេក បន្តិចផ្ទេរតំណែងឲ្យ ហ៊ុន ម៉ាណែត បន្តិចផ្ទេរអំណាចឲ្យទៅអ្នកនេះ ឲ្យទៅអ្នកនោះ ឥឡូវមិនបាច់ផ្ទេរម៉ងនៅអញ្ចឹងតែម្ដង» ។ សម្ដេចតេជោ នាយករដ្ឋមន្ត្រី បានបញ្ជាក់បន្ថែមថា កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ នឹងត្រូវធ្វើឡើងនៅថ្ងៃទី៥ ខែមិថុនា ឆ្នាំ២០២២ ។ ចំណែកកាលបរិច្ឆេទនៃការបោះឆ្នោតជ្រើសតាំងតំណាងរាស្ដ្រអាណត្តិទី៧ នឹងត្រូវធ្វើឡើងក្នុងអំឡុងខែកក្កដា ឆ្នាំ២០២៣ខាងមុខនេះ ។
សម្ដេចតេជោ ហ៊ុន សែន បានបញ្ជាក់យ៉ាងដូច្នេះថា «ថ្ងៃ៥ ខែមិថុនា បោះឆ្នោតឃុំ-សង្កាត់ ២០២២ ឆ្នាំក្រោយ ប្រកាសរួចពីម្សិល រួចហើយខែកក្កដា ឆ្នាំ២០២៣ បោះឆ្នោតសារជាថ្មី ហើយខ្ញុំនៅតែជាបេក្ខជននាយករដ្ឋមន្ត្រី» ។
ជាមួយគ្នានោះដែរ សម្តេចបានក៏បានលើកឡើងដោយចំអកទៅកាន់ក្រុមប្រឆាំងថា បើចង់កាន់អំណាចទាល់រងចាំថ្ងៃទី៣១ ខែកុម្ភៈ ទៅទើបអាចកាន់តំណែងបាន ៕
ចែករំលែកព័តមាននេះ