ខេត្តកំពង់ឆ្នាំង ៖ ដើមគគីរ២ដើមក្នុងគម្រោងចំនួន៩ដើម ដែលនឹងត្រូវកាប់យកចេញពីសាលាបឋមសិក្សាប៊ុន រ៉ានី ហ៊ុន សែន រមាស ត្រូវបានគេកាប់ផ្ដួលរលំរួចទៅហើយកាលពីពេលថ្មីៗនេះ តែត្រូវបានផ្ទុះការរិះគន់យ៉ាងខ្លាំងពីសំណាក់ប្រជាពលរដ្ឋ និងមហាជនដោយលើកឡើងថា មិនគួរលក់ដើមគគីរដែលមានអាយុរាប់សិបឆ្នាំ គឺតាំងពីសម័យសង្គមរាស្ត្រនិយមយកលុយដាក់ហោប៉ៅបែបនេះឡើយ ។
តាមប្រភពពីមន្ត្រីការិយាល័យអប់រំយុវជនស្រុកទឹកផុស ដែលលក្ខខណ្ឌសុំមិនបញ្ចេញឈ្មោះបានឲ្យដឹងថា កន្លងមកក៏មានការលក់ដើមឈើក្នុងបរិវេណសាលារៀននោះដែរ ដូចជាដើមចន្ទ័គីរី និងគគីរជាដើម ។ ប៉ុន្តែថ្មីៗនេះ ដើមគគីរចំនួន 9ដើមត្រូវបានគេលក់ក្នុងតម្លៃ 12លានរៀល ទៅឱ្យឈ្មួញរួចទៅហើយឈ្មួញទើបកាប់ដួលរលំ២ដើមនោះទេ គេមិនដឹងថាការលក់ដើមគគីរនោះយកលុយទៅណាឲ្យប្រាកដនៅឡើយ តែសង្ស័យថា មានការឃុបឃិតយកលុយចែកគ្នា។
ឆ្លើយតបនឹងការចោទប្រកាន់ខាងលើលោក ឃឹម ផល្លា ប្រធានការិយាល័យអប់រំយុវជននិងកីឡាស្រុកទឹកផុស បានអោយដឹងថា ដើមគគីរទាំង 9 ដើមពិតជានឹងលក់ចេញមែនក្នុងតម្លៃ 12 លានរៀល ។ ចំពោះមូលហេតុគឺដោយសារតែដើមទាំងនោះមានការដាំជិតគ្នា ហើយកាលពីអំឡុងឆ្នាំ 2015 មានការបាក់មែកធ្លាក់ចុះមកសង្កត់
លើកង់សិស្សនិងទោង មុខថ្នាក់មត្តេយ្យ បែកខូចខាតមួយចំនួនផងដែរ ប៉ុន្តែកាលនោះសំណាងហើយមិនបានធ្លាក់លើសិស្ស ណាម្នាក់ដែលបណ្ដាលឱ្យរងគ្រោះ ។
ដោយហេតុនេះហើយទើបស្មារតីអង្គប្រជុំរួមគ្នាកាលពីពេលថ្មីៗ នេះមាន លោកនាយកសាលា លោកគ្រូ អ្នកគ្រូមាតាបិតាសិស្ស អាជ្ញាធរឃុំ លោកអភិបាលស្រុក បានឯកភាពគ្នាកាប់ដើមគគីរ នោះចេញដើម្បីបញ្ចៀសបញ្ហាប្រឈមគ្រោះថ្នាក់ទាំងឡាយដែលកើតជាយថាហេតុ ដល់សិស្សក្នុងសាលារៀននេះ។ក្នុងកំណត់ហេតុនៃកិច្ចប្រជុំ នោះក៏បានបញ្ជូននិងឆ្លងយោបល់ទៅមន្ទីរអប់រំយុវជននិងកីឡាខេត្តផងដែរ ហើយក៏បានសម្រេចឲ្យមានការកាប់ដើមគគីរនោះទៅ។
ចំពោះថវិកាដែលបានមក គឺមានគំរោងទិញកូនដើមក្រញូង ដើមបេង និងដើមនាងនួនធំៗ មួយចំនួនមកដាំជំនួសវិញដោយរក្សាគម្លាតពីគ្នាឱ្យបានត្រឹមត្រូវ និងរក្សាបរិស្ថានធម្មជាតិបានល្អក្នុងបរិវេណសាលា។ជាងនេះទៅទៀតប្រាក់ថវិកាមួយចំនួនយកមកអភិវឌ្ឍន៍រៀបចំប្រព័ន្ធលូរំដោះទឹកនៅមុខសាលារៀនផងដែរ ។
ព័ត៌មានពិស្តារនឹងមានផ្សាយជូនលើកាសែតកោះសន្តិភាព។
ចែករំលែកព័តមាននេះ