រាជធានីភ្នំពេញ ៖ លោកវេជ្ជបណ្ឌិត ជុំ សុជាតិ ឯកទេសវិទ្យុសាស្ដ្រ ផ្នែករូបភាពវេជ្ជសាស្ដ្រនៃមន្ទីរពេទ្យកាល់ម៉ែត បានលើកឡើងថា ៖ បច្ចេកទេសចោះច្រឹបដុំសាច់នៅក្នុងសួត ទ្រូង និងពោះ ដោយមានជំនួយពីស្កាន់នែរ ជាមធ្យោបាយមួយនៃវិស័យអន្តរាគមន៍តាមបែបវិទ្យុសាស្ត្រ (Interventional Radiology) ដែលបាននិងកំពុងរួមចំណែកយ៉ាងសំខាន់នៅក្នុងការធ្វើរោគវិនិច្ឆ័យ និងការព្យាបាលជំងឺមហារីកនាពេលបច្ចុប្បន្ននេះ។
ក) តើករណីណាខ្លះតម្រូវអោយមានការចោះច្រឹបដុំសាច់សួត ទ្រូងនិងពោះ?
- ករណីរូបភាពវេជ្ជសាស្ត្រ (ការថតសួត ឬស្កាន់នែរ) មិនអាចអោយយើងបែងចែកអោយបានច្បាស់លាស់ពីដុំស្លូត ឬដុំកាច benign vs malignant tumor, infection vs cancer, abscess vs excavated tumor។
- ករណីរូបភាពវេជ្ជសាស្ត្រមានការសង្ស័យខ្ពស់ពីជំងឺមហារីកសួត ក៏តម្រូវអោយមានការច្រឹបដុំសាច់នោះដែរ ដើម្បីវិភាគលម្អិតពីប្រភេទកោសិកាមហារីក (cancer subtypes, molecular and genetic studies) ព្រោះព័ត៌មានទាំងនោះនឹងជួយគ្រូពេទ្យក្នុងការវាយតម្លៃពីកម្រិតធ្ងន់ធ្ងរ និងតម្រង់ទិសក្នុងការព្យាបាល ។
- ករណីសង្ស័យជាដុំសាច់សួត ដែលរាលដាលពីមហារីករបស់សរីរាង្គដទៃ(metastasis)។
- ករណីមានកូនកណ្តុររីកធំក្នុងពោះ ដោយមិនមានមូលហេតុច្បាស់លាស់ (lombo-aortic lymphadenopathy)។
- ករណីមានដុំសាច់នៅតំបន់ខាងក្រោយស្រោមពោះ (retroperitoneal tumors: pancreas, adrenal gland, kidney…)។
ខ) អត្ថប្រយោជន៍នៃការច្រឹបដុំសាច់សួត ទ្រូង និងពោះ ដោយមានជំនួយពីស្កាន់នែរ ៖
ការច្រឹបដុំសាច់ផ្សេងៗរបស់សួត ទ្រូង និងពោះ អាចធ្វើឡើងតាមមធ្យោបាយច្រើនបែប។ ដោយឡែកបច្ចេកទេសចោះច្រឹបដោយមានជំនួយពីស្កាន់នែរ អាចសម្រេចបានស្ទើរគ្រប់ករណីនៃដុំសាច់ ព្រោះស្កាន់នែរបានជួយអោយគ្រូពេទ្យកំណត់ទីតាំងជាក់លាក់របស់ដុំសាច់ និងជ្រើសរើសផ្លូវសម្រាប់ការចោះច្រឹបនោះប្រកបដោយសុវត្ថិភាពខ្ពស់ និងហានិភ័យទាប។
បច្ចេកទេសអន្តរាគមន៍តាមបែបវិទ្យុសាស្ត្រនេះ មិនផ្តល់ផលប៉ះពាល់អវិជ្ជមានពីកាំរស្មីអ៊ិច មិនមានការឈឺចាប់ខ្លាំង មិនតម្រូវអោយមានការដាក់ថ្នាំសន្លប់និងការសម្រាកពេទ្យឡើយ។
លោកវេជ្ជបណ្ឌិត ជុំ សុជាតិ ឯកទេសវិទ្យុសាស្ដ្រ ផ្នែករូបភាពវេជ្ជសាស្ដ្រនៃមន្ទីរពេទ្យកាល់ម៉ែត បានបញ្ជាក់ថា ៖ នៅមន្ទីរពេទ្យកាល់ម៉ែត មានក្រុមវេជ្ជបណ្ឌិតឯកទេសអន្តរាគមន៍តាមបែបវិទ្យុសាស្ត្រ ដែលមានជំនាញ និងសមត្ថភាពខ្ពស់ បាននឹងកំពុងធ្វើការសហការយ៉ាងស្អិតរមួតជាមួយវេជ្ជបណ្ឌិតឯកទេសផ្សេងៗទៀត ដើម្បីផ្តល់ប្រឹក្សាក្នុងការធ្វើរោគវិនិច្ឆ័យ និងការព្យាបាលជូនលោកអ្នក តាមស្តង់ដារវេជ្ជសាស្ត្រទំនើប៕
ចែករំលែកព័តមាននេះ