រាជធានីភ្នំពេញ ៖ វ៉ាន់ វឿន ជើងខ្លាំងប្រចាំក្លិបឃ្លាំងមឿងកីឡា បានប្រើកណ្ដាប់ដៃដែកផ្ដួលខេម ចាន់ មកពីក្លិបកីឡាប្រដាល់បញ្ជាការដ្ឋានកងទ័ពពិសេស ឱ្យសន្លប់ត្រឹមទឹកទី១នៅលើសង្វៀនស៊ីអិនស៊ីកាលពីថ្ងៃទី២៧ កុម្ភៈក្នុងជំនួបដណ្ដើមប្រាក់លានពីក្រុមហ៊ុនខារ៉ាបាវ។
ការប្រកួតរវាងកីឡាករ វ៉ាន់ វឿន និងកីឡាករខេម ចាន់ លើកនេះដូចការប៉ាន់ស្មានទុកមុនអ៊ីចឹងថា ខេម ចាន់ មិនអាចស៊ូប្រកួតដល់ទឹកទី៥បានឡើយ ។ ទោះបីយ៉ាងណាសម្រាប់ការបរាជ័យលើកនេះ ខេម ចាន់ ហាក់ដូចជាមិនអស់ចិត្តទាល់តែសោះ ទោះបីត្រូវរាប់ដល់ដប់ក៏គេនៅតែងក់ក្បាលថាគេអាចប្រកួតតទៅទៀតបាន បែរជាលោកអាជ្ញាកណ្ដាលបញ្ឈប់ការប្រកួតនេះទៅវិញ ។
ជុំវិញការលើកឡើងបែបនេះ លោក មាស វណ្ណឌី មន្ត្រីគណៈកម្មការតុបានប្រកាសថាបើសិនជាខេម ចាន់ ចង់ប្រកួតតទៅទៀតត្រូវតែផ្ដល់សញ្ញាងក់ក្បាលនៅពេលអាជ្ញាកណ្ដាលរាប់ដល់៨ នេះជាច្បាប់ប្រកួត ។ ដូច្នេះគណៈកម្មការរៀបចំការប្រកួតបានសម្រេចជាឯកច្ឆន្ទថាត្រូវតែឱ្យ វ៉ាន់ វឿន ជាអ្នកទទួលជ័យជម្នះនិងក្លាយជាម្ចាស់ប្រាក់លាននៅក្នុងសប្ដាហ៍នេះ។
មួយគូទៀតជាការជួបគ្នារវាងកីឡាករ លន បញ្ញា មកពីសមាគមកីឡាប្រដាល់កងយោធពលខេមរភូមិន្ទ និងកីឡាករ សួន ចាន់នី មកពីក្លិបបក្សីស្លាបដែកដែលជាគូសងសឹកនោះ បានត្រឹម
តែស្មើពិន្ទុគ្នាប៉ុណ្ណោះ ។ សម្រាប់ការប៉ះគ្នាជាលើកទី៣នេះពិតជាមិនធម្មតានោះឡើយ ដោយគេឃើញគូសងសឹកទាំងពីរបានប្ដូរកែងគ្នាយ៉ាងសាហាវតាំងពីទឹកទី១មកម៉្លេះ ។
ជាពិសេសកីឡាករសួន ចាន់នី ដែលទើបតែផ្ដួលកីឡាករលន បញ្ញា ឱ្យសន្លប់កាលពីពេលថ្មីៗកន្លងមកនេះ គេនៅតែមានបំណងចង់សម្រេចគោលដៅជាលើកទី២ម្ដងទៀត ។ តែលន បញ្ញា
មិនបណ្ដោយឱ្យសួន ចាន់នី ធ្វើព្យុះភ្លៀងតាមអំពើចិត្តបានឡើយ ។ គេបានបញ្ជូនស្នៀតកណ្ដាប់ដៃនិងស្នៀតជើង ម៉ាត់និងទាត់បកសងវិញយ៉ាងចាស់ដៃ ធ្វើឱ្យអ្នកតាមដានការប្រកួតមានការចាប់អារម្មណ៍យ៉ាងខ្លាំង ព្រោះថាការប្រកួតរវាងគូនេះតាំងពីដើមដល់ចប់អត់មានអ្នកណាបន្ធូរដៃឱ្យអ្នកណាឡើយ ។ ចប់ការប្រកួតទឹកទី៥ កីឡាករទាំងពីរត្រូវបានគណៈកម្មការរៀបចំការប្រកួតប្រកាសឱ្យស្មើពិន្ទុគ្នានិងទទួលបានប្រាក់រង្វាន់ក្នុងម្នាក់៥០ម៉ឺនរៀល ៕
ចែករំលែកព័តមាននេះ