ខេត្តព្រះសីហនុ៖ រដ្ឋបាលខេត្តព្រះសីហនុ បានប្រកាសថា គិតត្រឹមម៉ោង ១៩ និង០០នាទី ថ្ងៃទី២៨ ខែកុម្ភៈ ឆ្នាំ២០២១​ រដ្ឋបាលខេត្តព្រះសីហនុ បានចេញ​លិខិតជូនដំណឹង សម្រេចបិទទីតាំងចំនួន ៨ កន្លែងបន្ថែមទៀត ក្រោយរកឃើញថា មានការពាក់ព័ន្ធនឹងអ្នកជំងឺកូវីដ-១៩។ ដូច្នេះចំនួនទីតាំង ដែលត្រូវបិទ មានចំនួនសរុប ២៨ ទីតាំង​។

អាជ្ញាធរខេត្តព្រះសីហនុ បានប្រកាសថា គិតត្រឹមថ្ងៃទី២៧ ខែកុម្ភៈ ឆ្នាំ​២០២១ នេះ លទ្ធផលធ្វើតេស្តវត្ថុសំណាកលើជនបរទេស និងជនជាតិខ្មែរ ដែលពាក់ព័ន្ធព្រឹត្តិការណ៍​សហគមន៍ ថ្ងៃ​២០ កុម្ភ: នៅ​ក្នុងខេត្តព្រះសីហនុ មានវិជ្ជមានវីរុសកូវីដ-១៩ កើនឡើងដល់ចំនួន ៣០នាក់។

ដោយឡែក បើនិយាយពីក្របខណ្ឌទូទាំងប្រទេសវិញ គឺមកដល់ព្រឹកថ្ងៃទី២៨ ខែកុម្ភៈ ឆ្នាំ២០២១ ក្រសួងសុខាភិបាល បានប្រកាសថា មានអ្នកឆ្លងជំងឺកូវីដ១៩ សរុបចំនួន ៨០៥នាក់។ ក្នុងនោះ ជាសះស្បើយ ៤៧៧នាក់ និងកំពុងសម្រាកព្យាបាល ៣២៨នាក់​។

ពាក់ព័ន្ធនឹងព្រឹត្តិការណ៍ឆ្លងសហគមន៍ថ្ងៃ២០កុម្ភៈ មានអ្នកឆ្លកូវីដ១៩ សរុបចំនួន ៣០២នាក់ ដោយភាគច្រើន​ជាជនជាតិចិន រស់នៅភ្នំពេញ៕