រាជធានីភ្នំពេញ ៖ បុរសមានវិបត្តិម្នាក់បានធ្វើដំណើរទៅលោតទឹកសម្លាប់ខ្លួនពីលើស្ពានជ្រោយចង្វារ តែពុំបានស្លាប់ដូចបំណងនោះទេ ត្រូវបានអ្នកនេសាទចេញទូកទៅជួយស្រង់ រួចទាក់ទងរថយន្តសាម៉ុយ បញ្ជូនទៅសង្គ្រោះនៅមន្ទីរពេទ្យកាល់ម៉ែត ។
ហេតុការណ៍ធ្វើអត្តឃាតនេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ១និង២០នាទី រសៀល ថ្ងៃទី២៧ ខែកុម្ភៈ ឆ្នាំ២០២១ នៅចំណុចស្ពាន ជ្រោយចង្វារចាស់ ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
បុរសដែលគិតខ្លីបានប្រាប់ថា ឈ្មោះ យ ស.គង់ អាយុ៤១ឆ្នាំ ស្នាក់នៅម្តុំផ្សារថ្មី ខណ្ឌដូនពេញ រាជធានីភ្នំពេញហើយត្រូវបាននគរបាលទាក់ទងហៅរថយន្តបញ្ជូនទៅសង្គ្រោះនៅមន្ទីរពេទ្យកាល់ម៉ែត ។
តាមសាក្សី បានអោយដឹងថា នៅមុនពេលកើតហេតុគេឃើញបុរសរូបនោះបានធ្វើដំណើរឡើងទៅលើស្ពានក្នុងទិសដៅពីលិចទៅកើត ហើយឈប់ទៅកណ្តាលស្ពានឈរមួយសន្ទុះ ក៏បានដោះស្បែកជើង និងតោងបង្កាន់ដៃឡើងទៅឈរនៅខាងក្រៅបង្កាន់ដៃស្ពាន ។
តាមព័ត៌មានអោយដឹងទៀតថា ខណៈនោះអ្នកដំណើរ ក៏បានឃើញហើយទៅរាយការណ៍ប្រាប់នគរបាលខណ្ឌជ្រោយចង្វារទៅអន្តរាគមន៍នៅពេល ដែលសមត្ថកិច្ចទៅជិតដល់បុរសនោះបានលោតចុះទៅក្នុងទន្លេសម្លាប់ខ្លួនតែម្តង ។ នៅពេលធ្លាក់ទៅដល់ក្នុងទន្លេ ក៏បានហែលទឹកទៅតោងសសរស្ពាន ហើយត្រូវបានអ្នកនេសាទចេញទូកទៅជួយស្រង់សង្គ្រោះរួចនាំគ្នាគ្រាឡើងច្រាំងដើម្បីសាកសួរ ។
តាមបុរសរូបនោះបានអោយដឹងថា មូលហេតុដែលធ្វើអោយខ្លួនគិតខ្លីមកលោតទឹកសម្លាប់ខ្លួន ដោយសារតែវិបត្តិក្នុងគ្រួសារតែពុំដឹងថា មានវិបត្តិរឿងអ្វីឡើយ ។ នៅមុនពេលមកលោតទឹកបុរសរូបនោះបានប្រាប់អោយដឹងថា បានលេបថ្នាំងងុយដេកអស់ចំនួន៤០គ្រាប់មិនស្លាប់ក៏បានធ្វើដំណើរមកលោតទឹកហើយ មិនបានសម្រេចទៀត ។ ដោយសារតែស្ថានភាពបុរសនោះចុកទ្រូង នគរបាលអង្គភាពការពារគោលដៅទី៣ក៏បានទាក់ទងហៅរថយន្តសាម៉ុយ បញ្ជូនទៅសង្គ្រោះនៅមន្ទីរពេទ្យកាល់ម៉ែត ៕
ចែករំលែកព័តមាននេះ