រាជធានីភ្នំពេញ ៖ នាយកដ្ឋានព័ត៌មានវិទ្យានៃក្រសួងមហាផ្ទៃបានបញ្ជាក់នៅថ្ងៃទី២៦ ខែកុម្ភៈ ឆ្នាំ២០២១ថា បច្ចុប្បន្នការដំឡើងកាមេរ៉ាសុវត្ថិភាព (CCTV) កំពុងទទួលបានការពេញនិយមពីសំណាក់ពលរដ្ឋកម្ពុជា និងម្ចាស់ទីតាំងអាជីវកម្មផ្សេងៗ ដើម្បីធ្វើការថតរូបភាព…
រាជធានីភ្នំពេញ ៖ នាយកដ្ឋានព័ត៌មានវិទ្យានៃក្រសួងមហាផ្ទៃបានបញ្ជាក់នៅថ្ងៃទី២៦ ខែកុម្ភៈ ឆ្នាំ២០២១ថា បច្ចុប្បន្នការដំឡើងកាមេរ៉ាសុវត្ថិភាព (CCTV) កំពុងទទួលបានការពេញនិយមពីសំណាក់ពលរដ្ឋកម្ពុជា និងម្ចាស់ទីតាំងអាជីវកម្មផ្សេងៗ ដើម្បីធ្វើការថតរូបភាព ឬវីដេអូ ក្នុងគោលបំណងបង្កើនសុវត្ថិភាព និងបង្ការទប់ស្កាត់បទល្មើសជាដើម ។
លើសពីនេះ ដើម្បីទទួលបានភាពងាយស្រួលក្នុងការមើលរូបភាពវីដេអូនៃកាមេរ៉ាសុវត្ថិភាពពីចម្ងាយ ពួកគាត់បានធ្វើការតភ្ជាប់ប្រព័ន្ធកាមេរ៉ាសុវត្ថិភាព ជាមួយបណ្តាញអ៊ីនធឺណិត ជាហេតុធ្វើឲ្យមានហានិភ័យមួយចំនួនអាចកើតមានប្រសិនបើការដំឡើងនោះពុំបានគោរពបទដ្ឋានសន្តិសុខប្រព័ន្ធឲ្យបានត្រឹមត្រូវ ។
នាយករដ្ឋានបន្តថា តាមរយៈទិន្នន័យពីកម្មវិធីរុករកឧបករណ៍បច្ចេកវិទ្យាលើអ៊ីនធឺណិត (IoT) បានបង្ហាញថា ប្រព័ន្ធកាមេរ៉ាសុវត្ថិភាព ក្នុងព្រះរាជាណាចក្រកម្ពុជាមួយចំនួនធំ កំពុងប្រើប្រាស់គណនី និងលេខសម្ងាត់ដែលពុំបានផ្លាស់ប្តូរបន្ទាប់ពីដំឡើងរួច (Defaut Login – Username & Password) ដែលជាហេតុបង្កឲ្យមានហានិភ័យដូចខាងក្រោមដោយជនខិលខូចអាចធ្វើការចូលមើលរូបភាព ឬវីដេអូ ដោយគ្មានការអនុញ្ញាតិ និងបង្កផលប៉ះពាល់ដល់ឯកជនភាព ។
ជនខិលខូចអាចធ្វើការថតរូបភាព ឬវីដេអូ ប្រើប្រាស់ក្នុងគោលបំណងទុច្ចរិត (ថតរូបអាក្រាតគម្រាមទារប្រាក់ ពិនិត្យទីតាំងមុនប្រព្រឹត្តិបទល្មើសលួច ។ល។)
ប្រភពបន្តថា ឧក្រិដ្ឋជនបច្ចេកវិទ្យាអាចធ្វើការប្រើប្រាស់កាមេរ៉ាសុវត្ថិភាពជនរងគ្រោះ ក្នុងប្រតិបត្តិការវាយប្រហារ DDOS លើគោលដៅរងគ្រោះផ្សេងៗ ។ ជាមួយគ្នានោះដែរ នាយកដ្ឋានព័ត៌មានវិទ្យាបានលើកឡើងថា ដើម្បីការពារហានិភ័យដូចបានរៀបរាប់ជូនខាងលើ សូមបងប្អូនពលរដ្ឋដែលបានដំឡើងប្រព័ន្ធកាមេរ៉ាសុវត្ថិភាព មេត្តាធ្វើការផ្លាស់ប្តូរលេខសម្ងាត់ (Username & Password) ដែលពិបាកទាយ និងរក្សាវាឲ្យបានសម្ងាត់តាមការចាំបាច់ ។
ក្នុងករណីដែលបងប្អូនពុំអាចធ្វើការផ្លាស់ប្តូរលេខសម្ងាត់ (Username & Password) ដោយខ្លួនឯងបាន សូមបងប្អូនទាក់ទងអ្នកបច្ចេកទេស ឬស្នើសុំជាងដំឡើងកាមេរ៉ាផ្លាស់ប្តូរជូនក្នុងអំឡុងពេលកំពុងដំឡើង៕
ចែករំលែកព័តមាននេះ