រាជធានីភ្នំពេញ ៖ កម្លាំងនគរបាលខណ្ឌពោធិ៍សែនជ័យ រួមជាមួយកម្លាំងនគរបាលប៉ុស្តិ៍ចោមចៅទី១ និងកម្លាំងប្រជាការពារធ្វើការឡោមព័ទ្ធផ្ទះមួយកន្លែងស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ អស់ពេញ១យប់ថ្ងៃទី២៥ ខែកុម្ភៈ ខណៈដែលជនសង្ស័យ២នាក់ក្នុងចំណោមគ្នា៣នាក់រត់ចូលទៅពួនសម្ងំលាក់ខ្លួននៅក្នុងផ្ទះខាងលើ…
រាជធានីភ្នំពេញ ៖ កម្លាំងនគរបាលខណ្ឌពោធិ៍សែនជ័យ រួមជាមួយកម្លាំងនគរបាលប៉ុស្តិ៍ចោមចៅទី១ និងកម្លាំងប្រជាការពារធ្វើការឡោមព័ទ្ធផ្ទះមួយកន្លែងស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ អស់ពេញ១យប់ថ្ងៃទី២៥ ខែកុម្ភៈ ខណៈដែលជនសង្ស័យ២នាក់ក្នុងចំណោមគ្នា៣នាក់រត់ចូលទៅពួនសម្ងំលាក់ខ្លួននៅក្នុងផ្ទះខាងលើ ក្រោយពេលពួកគេធ្វើសកម្មភាពកាប់ចំផ្លាញម៉ូតូចំនួន៣គ្រឿងបណ្ដាលឲ្យរងការខូចខាតខ្ទេចខ្ទី។ គួររំលឹកថា រុករកជនសង្ស័យផ្អើលទួលពង្រទាំងព្រឹក ក្រោយឡោមព័ទ្ធអស់១យប់
លុះដល់វេលាម៉ោង៧និង៣០នាទីព្រឹកថ្ងៃទី២៦ ខែកុម្ភៈ ជនសង្ស័យ២នាក់នោះបានសម្រុករត់ចេញពីក្នុងផ្ទះដែលនគរបាលឡោមព័ទ្ធនោះចូលទៅក្នុងដីឡូតិ៍៍មួយកន្លែងដែលមានស្មៅនិងកក់ដុះយ៉ាងក្រាស់ ស្ថិតនៅតាមបណ្ដោយផ្លូវបេតុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា ខណៈនោះកម្លាំងសមត្ថកិច្ចខាងលើក៏បានដកចេញពីផ្ទះដែលបានឡោមព័ទ្ធពេញ១យប់នោះ ហើយបន្តទៅធ្វើការឡោមព័ទ្ធទីតាំងដែលជនសង្ស័យរត់ចូលទៅពួនសម្ងំនោះវិញ ហើយភ្លាមៗរុករកឃើញព្រមទាំងធ្វើការឃាត់ខ្លួនបានម្នាក់។
តាមប្រភពព័័ត៌មានបានឱ្យដឹងបន្តទៀតថា អ្វើដែលជាការចាប់អារម្មណ៍នោះ បន្ទាប់ពីសមត្ថកិច្ចឃាត់ខ្លួនជនសង្ស័យបានរួចបណ្ដើរឡើងគោក គេសង្កេតឃើញស្ត្រីជាម្ដាយរារាំងមិនឲ្យអ្នកកាសែតថតកូនខ្លួននោះទេ ហើយបានបេះស្លឹកឈូកហុចឲ្យកូនប្រុសបាំងមុខ និងក្រោយមកទៀតជនសង្ស័យបានត្បុលក្បាលចូលទៅក្នុងអាវប្រជាការពារលាក់មុខដូចសត្វពង្រូល ព្រោះតែខ្លាចកាមេរ៉ាអ្នកកាសែត ដោយមិនមានភាពក្លាហានដូចពេលកាន់ដាវ កាន់កាំបិតដេញកា.ប់មនុស្ស និងកា.ប់បំផ្លាញម៉ូតូដូចកាលពីយប់ឡើយ។
តាមប្រភពព័ត៌មានបានឱ្យដឹងបន្តថា រីឯជនសង្ស័យម្នាក់ទៀតបានបន្តលាក់ខ្លួននៅក្នុងទឹកដែលមានកក់ដុះក្រាស់ឃ្មឹក ។ ចំណែកកម្លាំងសមត្ថកិច្ចដោយមានការចូលរួមពីប្រជាពលរដ្ឋផងបានធ្វើការឡោមព័ទ្ធនិងរុករកជាបន្តទៀត រហូតដល់វេលាម៉ោង៩និង៥០នាទីព្រឹកថ្ងៃដដែលទើបរកឃើញនិងឃាត់ខ្លួនបានម្នាក់ទៀត។
តាមប្រភពដដែលបានបន្តទៀតថា សរុបមកនៅក្នុងការឡោមព័ទ្ធជាច្រើនម៉ោងនេះ ជនសង្ស័យ២នាក់ត្រូវចាប់ខ្លួន ហើយពុំទាន់ត្រូវបានស្គាល់អត្តសញ្ញាណនៅឡើយ រីឯបក្ខពួកម្នាក់បានរត់គេចខ្លួនបាត់តាំងពីក្រោយពេលកើតហេតុភ្លាមៗមកម្ល៉េះ។
នៅវេលាម៉ោង១០ព្រឹកថ្ងៃដដែលនោះ លោកម៉ន វុធី អធិការនគរបាលខណ្ឌពោធិ៍សែនជ័យបានបញ្ជាឲ្យកម្លាំងនគរបាលចុះទៅកាន់ផ្ទះដែលធ្វើការឡោមព័ទ្ធកាលពីយប់នោះម្ដងទៀត ដើម្បីនាំខ្លួនម្ចាស់ផ្ទះទៅធ្វើការសាកសួរនិងចាត់ការតាមច្បាប់ផងដែរ ប៉ុន្តែពេលទៅដល់ម្ចាស់ផ្ទះរូបនោះបានរត់គេចខ្លួនបាត់ទៅហើយ។
ទោះបីជាបែបណា កម្លាំងនគរបាលកំពុងធ្វើការស្រាវជ្រាវដើម្បីរកចាប់ខ្លួនបក្ខពួកដែលគេចខ្លួនរួច រួមនិងម្ចាស់ផ្ទះដែលជួយលាក់បំពានក្រុមអន្ធពាលទាំងនេះកាលពីយប់នោះហើយ៕
ចែករំលែកព័តមាននេះ