រាជធានីភ្នំពេញ ៖ បុរសម្នាក់ជិះម៉ូតូទៅទិញគ្រឿងបន្លាស់ម៉ាស៊ីនគៀបទឹកអំពៅ ស្រាប់តែលេចមុខជនសង្ស័យមួយក្រុមមានគ្នា៨នាក់ ហៅឱ្យឈប់ រួចហុចថ្នាំញៀ.នឱ្យ លុះជនរងគ្រោះមិនព្រមយក ក៏ព្រួតគ្នាធ្វើសកម្មភាពវាយជនរងគ្រោះ បណ្ដាលឲ្យជ្រុះយកទូរស័័ព្ទមួយគ្រឿង ហើយជនសង្ស័យនាំគ្នាយកទូរស័ព្ទនោះគេចខ្លួនបាត់ពីកន្លែងកើតហេតុ ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៦និង៣០នាទីយប់ថ្ងៃទី២៥ ខែកុម្ភៈ ឆ្នាំ២០២១ នៅតាមបណ្ដោយផ្លូវ៣០ម៉ែត្រ ស្ថិតក្នុងភូមិទ្រណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះឈ្មោះ ថ.ស.ខ អាយុ២៦ឆ្នាំ ជាអ្នកលក់ទឹកអំពៅ ស្នាក់ក្នុងសង្កាត់ចោមចៅទី២ ខណ្ឌពោធិ៍សែនជ័យ មានស្រុកកំណើតនៅស្រុកកៀនស្វាយ ខេត្តកណ្ដាល ។ ចំណែកម៉ូតូរបស់ជនរងគ្រោះម៉ាកស្មាសវី ពណ៌ខ្មៅ ។
តាមប្រភពព័ត៌មានពីជនរងគ្រោះបានប្រាប់ឱ្យដឹងថា នៅមុនពេលកើតហេតុ គាត់បានជិះម៉ូតូចេញពីផ្ទុះជួល ក្នុងគោលបំណងទៅទិញគ្រឿងបន្លាស់ម៉ាស៊ីនគៀបទឹកអំពៅ ព្រោះម៉ាស៊ីនគៀបទឹកអំពៅរបស់គាត់ខូច ។
តាមប្រភពដដែលបានបន្តថា ពេលកំពុងតែជិះម៉ូតូក្នុងទិសដៅពីលិចទៅកើត តាមបណ្ដោយផ្លូវ៣០ម៉ែត្រ លុះទៅដល់ចំណុចកើតហេតុត្រង់ចំណុចភូមិទ្រណាក់ត្រយឹង សង្កាត់ចោមចៅទី២ ស្រាប់តែមានជនសង្ស័យ១ក្រុមមានគ្នា៨នាក់បានហៅរូបគាត់អោយឈប់ហើយបានហុចគ្រឿងញៀ.ន១កញ្ចប់មកឱ្យគាត់ ។ ប៉ុន្តែគាត់បានបដិសេធមិនព្រមយក រួចក៏៏បោះចោលគ្រឿងញៀ.ននោះ ស្រាប់តែក្រុមជនសង្ស័យព្រួតគ្នាវាយគាត់ ធ្វើឲ្យគាត់ភ័យយរត់ចោលម៉ូតូ និងធ្លាក់ទូរស័ព្ទពីខ្លួន ភ្លាមៗនោះក្រុមជនសង្ស័យបាននាំគ្នារើសយកទូរស័ព្ទ ព្រមទាំងវាយម៉ូតូរបស់គាត់ បណ្តាលឱ្យរងការខូចខាតទាំងមុខទាំងក្រោយ។
តាមប្រភពដដែលបានបន្តទៀតថា ភ្លាមៗនោះដែរ គាត់បានស្រែកហៅអោយប្រជាពលរដ្ឋជួយដែរ ប៉ុន្តែគ្មានអ្នកណាជួយគាត់ឡើយ បន្ទាប់មកគាត់បានរត់ទៅប្ដឹងសមត្ថកិច្ចនៅប៉ុស្តិ៍ចោមចៅទី៣ តែដោយសារកើតហេតុនៅប៉ុស្តិ៍ចោមចៅទី២ ទើបសមត្ថកិច្ចប៉ុស្តិ៍៍ចោមចៅទី៣ បានអោយគាត់ទៅដាក់ពាក្យបណ្ដឹងទៅប៉ុស្តិ៍ចោមចៅទី២វិញ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឱ្យដឹងថា នៅចំណុចកើតហេតុខាងលើនេះ សម្បូរអ្នកលក់គ្រឿងញៀ.ន និងអ្នកប្រើប្រាស់គ្រឿងញៀ.នជាច្រើន ហើយពួកគាត់សុំអោយសមត្ថកិច្ចជួយចាត់វិធានការទប់ស្កាត់បទល្មើសទាំងអស់នោះផង។
ក្រោយពេលកើតហេតុ សមត្ថកិច្ចបានទទួលពាក្យបណ្តឹងរបស់ជនរងគ្រោះរួចរាល់ហើយនិងធ្វើការស្រាវជ្រាវរកមុខសញ្ញាជនសង្ស័យទាំងនោះ ដើម្បីយកមកផ្ដន្ទាទោសទៅតាមផ្លូវច្បាប់នៅថ្ងៃក្រោយ ៕
ចែករំលែកព័តមាននេះ