ខេត្តបន្ទាយមានជ័យ ៖ ក្រោយពីមានករណីផ្ទុះគ្រាប់បែកនៅកណ្តាលទីក្រុងបាងកក ប្រទេសថៃ រួចមក នៅច្រកទ្វាអន្តរជាតិប៉ោយប៉ែត ចំនួនភ្ញៀវទេសចរបរទេសមានការធ្លាក់ចុះ១៥% ក្នុងរយៈពេល៣ថ្ងៃ ។
លោកជង់ ឡឹម ប្រធានមន្ទីរទេសចរណ៍ខេត្តបន្ទាយមានជ័យបានឱ្យដឹងថា ក្រោយពេលដែលផ្ទុះគ្រាប់បែកកណ្តាលទីក្រុងបាងកកកាលពីថ្ងៃទី១៧ សីហា ២០១៥ កន្លងមកនោះ រយៈពេល៣ថ្ងៃនៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ គឺភ្ញៀវអន្តរជាតិ ដែលចូលមកកម្ពុជាមានការធ្លាក់ចុះ១៥% ក្នុងនោះភ្ញៀវជនជាតិថៃធ្លាក់ចុះ២១% ។
លោកបានបញ្ជាក់ថា ភ្ញៀវអន្តរជាតិចូលតាមច្រកទ្វារអន្តរជាតិប៉ោយប៉ែត ធ្លាក់ចុះរយៈពេល៣ថ្ងៃ ចាប់ពីថ្ងៃទី១៧ សីហា ២០១៥ មានចំនួន៩១១នាក់ (ជនជាតិថៃចំនួន១៥២នាក់), ថ្ងៃទី១៨ សីហា ២០១៥ មានចំនួន៩៦៨នាក់ (ជនជាតិថៃចំនួន១៣០នាក់) ថ្ងៃទី១៩ សីហា ២០១៥ មានចំនួន៧៤៦នាក់ (ជនជាតិថៃចំនួន១៤៥នាក់) ។
លោកបន្តថា បើយោងតាមស្ថិតិភ្ញៀវទេសចរបរទេសឆ្លងកាត់ប្រទេសថៃចូលមកប្រទេសកម្ពុជា តាមច្រកទ្វារអន្តជាតិប៉ោយប៉ែតខេត្តបន្ទាយមានជ័យ ក្នុងខែកក្កដា ២០១៥ មានចំនួន៣៣,៩៦០នាក់ និងរយៈពេល៧ខែ ឆ្នាំ២០១៥ មានចំនួន២៤៥,០១០នាក់ភ្ញៀវចំណាត់ថ្នាក់លេខ១ ជនជាតិថៃចំនួន៦២,៤១១នាក់ លេខ២.ជនជាតិហ្វីលីពីនចំនួន៥,២៧៣នាក់ លេខ៣.ជនជាតិមីយ៉ានម៉ាចំនួន១,៧២៧នាក់ ។
បើប្រៀបធៀបខែកក្កដា ឆ្នាំ២០១៥ ភ្ញៀវបរទេសចូលមកកម្ពុជាតាមច្រកទ្វារអន្តរជាតិប៉ោយប៉ែតមានចំនួន២៦,៥៨០នាក់ និងរយៈពេល៧ខែ ក្នុងឆ្នាំ២០១៥ មានចំនួន២៨១,៥៣៧នាក់ ភ្ញៀវចំណាត់ថ្នាក់លេខ១ ជនជាតិថៃចំនួន៥២.៥៥០នាក់ លេខ២ ជនជាតិហ្វីលីពីនចំនួន៧.៥៨៨នាក់ លេខ៣ ជនជាតិមីយ៉ានម៉ាមានចំនួន៧២៤នាក់ ៕
ចែករំលែកព័តមាននេះ