រាជធានីភ្នំពេញ ៖ ក្រសួងសុខាភិបាលបានប្រកាសនៅព្រឹកថ្ងៃទី២៥ ខែកុម្ភៈ ឆ្នាំ២០២១ អំពីការរកឃើញវិជ្ជមានកូវីដ ១៩ ចំនួនដល់ទៅ៦៥ នាក់ ដែលនេះគឺជាតួលេខនៃការឆ្លងខ្ពស់បំផុតមិនធ្លាប់មាននៅកម្ពុជា…
រាជធានីភ្នំពេញ ៖ ក្រសួងសុខាភិបាលបានប្រកាសនៅព្រឹកថ្ងៃទី២៥ ខែកុម្ភៈ ឆ្នាំ២០២១ អំពីការរកឃើញវិជ្ជមានកូវីដ ១៩ ចំនួនដល់ទៅ៦៥ នាក់ ដែលនេះគឺជាតួលេខនៃការឆ្លងខ្ពស់បំផុតមិនធ្លាប់មាននៅកម្ពុជា ចាប់តាំងពីការរកឃើញកូវីដ១៩ ដំបូងបង្អស់នៅខេត្តព្រះសីហនុកាលពីថ្ងៃទី ២៧ ខែមករា ឆ្នាំ២០២០ ហើយក៏ជាតួលេខឆ្លងខ្ពស់បំផុតសម្រាប់ការឆ្លងក្នុងសហគមន៍ផងដែរ ។
ជាមួយនឹងការរកឃើញអត្រានៃការឆ្លងកូវីដ ១៩ ខ្ពស់បំផុតមិនធ្លាប់មាននេះ គឺក្នុងចំណោម៦៥នាក់ វិជ្ជមានកូវីដ ១៩ គិតត្រឹមព្រឹកថ្ងៃទី ២៥ ខែកុម្ភៈ ឆ្នាំ២០២១ គឺក្នុងនោះមានករណីឆ្លងក្នុងសហគមន៍២០កុម្ភៈចំនួន ៥៨ នាក់ ដែលភាគច្រើនលើសលប់ជាជនជាតិចិន ខណៈចំនួន ៧ នាក់ទៀតជាករណីអ្នកដំណើរចូលមកកម្ពុជា ។
ព្រឹត្តិការណ៍នៃការឆ្លងក្នុងសហគមន៍លើកទី៣ ឬហៅថាព្រឹត្តិការណ៍សហគមន៍២០កុម្ភៈ គឺជាព្រឹត្តិការណ៍ដែលមានទ្រង់ទ្រាយធំនិងធ្ងន់ធ្ងរ ជាពិសេសករណីវិជ្ជមានកូវីដ ១៩ គឺមានការកើនឡើងជាលំដាប់ពីមួយថ្ងៃទៅមួយថ្ងៃ ។ ជាពិសេសគឺករណីពាក់ព័ន្ធនឹងព្រឹត្តិការណ៍សហគមន៍ថ្ងៃទី២០ ខែកុម្ភៈ ឆ្នាំ២០២១ អត្រានៃការឆ្លងគឺបន្តហក់ឡើងខ្ពស់ គិតមកដល់ថ្ងៃនេះ ការឆ្លងក្នុងសហគមន៍២០ កុម្ភៈឡើងដល់ ១៩៤ ករណីហើយ ។
អ្វីដែលកាន់តែគួរឱ្យបារម្ភបន្ថែមទៀតនោះ គឺការឆ្លងវីរុសកូវីដ ១៩ នៅកម្ពុជាក្នុងព្រឹត្តិការណ៍សហគមន៍ ២០ កុម្ភៈនេះទៀតសោត គឺមានករណីវីរុសកូវីដ-១៩ បម្លែងថ្មី ត្រូវបានរកឃើញផងដែរ ។ ដូច្នេះទាមទាមឲ្យសូមបងប្អូនបង្កើនការប្រុងប្រយ័ត្នខ្ពស់បំផុត ។
យោងតាមប្រកាសរបស់ក្រសួងសុខាភិបាលចុះថ្ងៃទី ២០រហូតដល់ថ្ងៃទី ២៥ ខែកុម្ភៈឃើញថាការឆ្លងក្នុងសហគមន៍មានសន្ទុះឡើងខ្ពស់រហូត ។
១- ជាក់ស្តែងនៅថ្ងៃទី ២០ ខែកុម្ភៈ ក្រសួងសុខាភិបាលបានប្រកាសថាមានការឆ្លងកូវីដ ១៩សរុប ៣២ ករណី ដែលសុទ្ធជាការឆ្លងក្នុងសហគមន៍ ។
២- ថ្ងៃទី ២១ មានការរកឃើញវិជ្ចមានកូវីដ ១៩ សរុប ១៧ នាក់ ក្នុងនោះ១៤នាក់ជាប់ពាក់ព័ន្ធព្រឹត្តិការណ៍សហគមន៍២០ កុម្ភៈ ។
៣- ថ្ងៃទី២២ ខែកុម្ភៈ វិជ្ជមានកូវីដ១៩ សរុបចំនួន ៣៥នាក់ ក្នុងនោះ ៣១នាក់ឆ្លងនៃព្រឹត្តិការណ៍សហគមន៍២០កុម្ភៈ ។
៤- ថ្ងៃទី ២៣ ខែកុម្ភៈ វិជ្ជមានកូវីដសរុប ២៥ នាក់ ក្នុងនោះ ២៣ នាក់ឆ្លងនៃព្រឹត្តិការណ៍សហគមន៍២០កុម្ភៈ ។
៥- ថ្ងៃទី ២៤ ខែកុម្ភៈ វិជ្ជមានកូវីដ ១៩ សរុប ៤០នាក់ឆ្លងនៃព្រឹត្តិការណ៍សហគមន៍២០កុម្ភៈ ។
៦- ថ្ងៃទី ២៥ ខែកុម្ភៈ វិជ្ជមានកូវីដ ១៩ សរុប ៦៥នាក់ ក្នុងនោះ ៥៨នាក់ឆ្លងនៃព្រឹត្តិការណ៍សហគមន៍២០កុម្ភៈ។
នាយកដ្ឋានប្រយុទ្ធជំងឺឆ្លងរបស់ក្រសួងសុខាភិបាលបានឲ្យដឹងថា «ជំងឺកូវីដ-១៩ នៅតែបន្តគម្រាមកំហែងយើងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យនៅឃ្លាតឆ្ងាយពីគ្នា មិនចេញក្រៅផ្ទះបើមិនចាំបាច់ ព្រោះប្រទេសយើងកំពុងរាត្បាតក្នុងសហគមន៍ និងប្រទេសជិតខាងយើងនិងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡើយ» ។
ទន្ទឹងនឹងនោះនាយកដ្ឋានប្រយុទ្ធនឹងជំងឺឆ្លងក៏បានអំពាវនាវថា «យើងត្រូវបន្តគម្លាតបុគ្គលបន្តទៀត ដូចជាអង្គុយគម្លាតពីគ្នា ឈររងចាំគម្លាតពីគ្នា ឈរជជែកគ្នាគម្លាតពីគ្នា ។ ល។ យើងត្រូវបន្តពាក់ម៉ាស់ជាប់ជានិច្ច និងឧស្សាហ៍លាងដៃជាមួយសាប៊ូ អាល់កុល ឬជែល » ៕
ចែករំលែកព័តមាននេះ