ខេត្តសៀមរាប ៖ កម្លាំងនគរបាលចរាចរខេត្តសៀមរាប បានចុះត្រួតពិនិត្យច្បាប់ចរាចរណ៍ផ្លូវគោក ស្ថិតនៅចំណុចភូមិវាល សង្កាត់គោកចក ក្រុងសៀមរាប ដើម្បីធ្វើការត្រួតពិនិត្យរថយន្តមួយគ្រឿងម៉ាកសាំយ៉ុង ពណ៌បៃតងចាស់ ដែលបង្កគ្រោះថ្នាក់ចរាចរណ៍…
ខេត្តសៀមរាប ៖ កម្លាំងនគរបាលចរាចរខេត្តសៀមរាប បានចុះត្រួតពិនិត្យច្បាប់ចរាចរណ៍ផ្លូវគោក ស្ថិតនៅចំណុចភូមិវាល សង្កាត់គោកចក ក្រុងសៀមរាប ដើម្បីធ្វើការត្រួតពិនិត្យរថយន្តមួយគ្រឿងម៉ាកសាំយ៉ុង ពណ៌បៃតងចាស់ ដែលបង្កគ្រោះថ្នាក់ចរាចរណ៍ ស្រាប់តែរកឃើញមានសត្វសុនខចំនួន៥៨ក្បាល រួចប្រគល់ទៅឱ្យមន្ត្រីជំនាញនិងអង្គការ Four Paws យកសត្វទាំងនោះទៅថែរក្សាបន្ត។
លោក ព្រំ វិច ប្រធានការិយាល័យផលិតកម្ម និង បសុព្យាបាលខេត្តសៀមរាប បានឱ្យដឹងនៅព្រឹកថ្ងៃទី២៤ ខែកុម្ភៈ នេះថា ដោយមានការគាំទ្រពីលោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកនៃអគ្គ នាយកដ្ឋានសុខភាពសត្វ និងផលិតកម្មសត្វ និងលោកអភិបាលខេត្តសៀមរាប មន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានចេញសេចក្តីជូនដំណឹង លេខ២៩មកខ.សជណ ចុះថ្ងៃទី ០៦ ខែកក្កដាឆ្នាំ២០២០ ស្តីពីការហាមឃាត់ការធ្វើអាជីវកម្មទិញលក់ ពិ.ឃា.តសត្វសុនខ(ឆ្កែ)។ សេចក្តីជូនដំណឹងនេះត្រូវបានផ្សព្វផ្សាយទូលំទូលាយពិសេសស្ថាប័នមានសមត្ថកិច្ចពាក់ព័ន្ធ ។
លោកបន្តថា នៅវេលាម៉ោង១១និង១០នាទីយប់ថ្ងៃទី២០ ខែកុម្ភ: ឆ្នាំ២០២១ ស្ថិតនៅចំណុចភូមិវាល សង្កាត់គោកចក ក្រុងសៀមរាប មានរថយន្តមួយគ្រឿងម៉ាកស៊ាំយ៉ុង ពណ៌បៃតងចាស់ ពាក់ស្លាកលេខ ភ្នំពេញ 2S-2158 បើកបរដោយឈ្មោះ ផាត សៀងហាក់ ចេញពីខេត្តបន្ទាយមានជ័យ ឆ្ពោះទៅខេត្តកំពង់ចាម បានបង្កគ្រោះថ្នាក់ចរាចរណ៍។ដោយរកឃើញក្នុងរថយន្តមានដឹកសត្វសុនខ ចំនួន៥៨ក្បាល(ញី៣៨ក្បាល)ធ្វើអាជីវកម្ម។
ក្នុងនោះដែរ លោកប្រធានការិយាល័យចរាចរណ៍ផ្លូវគោកនៃស្នងការនគរ បាលខេត្តសៀមរាប បានជូនដំណឹងដល់លោកទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទ ដើម្បីចាត់ការតាមនីតិវិធីច្បាប់ នៅព្រឹកថ្ងៃទី២១ ខែកុម្ភៈ ឆ្នាំ២០២១។
លោកបន្ថែមថា នៅថ្ងៃទី២៣ ខែកុម្ភៈ ឆ្នាំ២០២១ មន្ត្រីជំនាញបសុពេទ្យ នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប សហការជាមួយក្រុមការងារអង្គការ Four Paws បានអនុវត្តវិធានការថែទាំសុខភាពសត្វសុនខ ដែលកំពុងធ្វើចត្តាឡីស័កចំនួន៥៨ក្បាល(ញី៣៨ក្បាល)នៅស្ថាននីយស្រាវជ្រាវផលិត កម្មនិងបសុព្យាបាលសត្វទឹកវិល។
ជាមួយគ្នានោះដែរ ប្រធានគំរោងនៃអង្គការ Four Paws បានឲ្យដឹងនៅថ្ងៃទី២៤នេះថា អង្គការ Four Paws ជាអង្គការមួយដែលមានភារកិច្ចគាំពារសត្វសុនខ(ឆ្កែ) ហើយអង្គការបានសុំកិច្ច សហការជាមួយរាជរដ្ឋាភិបាល និងស្ថាប័ន ពាក់ព័ន្ធដើម្បីធ្វើកិច្ចការថែទាំសត្វសុនខ។
ប្រធានគំរោងដដែលបានបន្តថា ផែនការបន្តអង្គការបានយកសត្វសុនខ (ឆ្កែ)ទាំងនេះទៅផ្ញើនៅក្នុងស្ថាននីយ ស្រាវជ្រាវផលិតកម្ម និងបសុព្យាបាលសត្វទឹកវិល ជាបណ្តោះ អាសន្នសិន ក្នុងនោះយើងបានចាក់ថ្នាំការពារជម្ងឺឆ្កែឆ្កួត និង ការពារជម្ងឺDHPP,ប្រើថ្នាំកំចាត់ចៃ ដោយ Alprocide និងថ្នាំទម្លាក់ព្រូនដោយ Canex/Mebendazole,–ចាក់ មីក្រូឆីប/Animal ID។
ប្រធានគំរោងដដែល បញ្ជាក់ថា បច្ចុប្បន្នខាងអង្គការកំពុងរកទីតាំងសមរម្យណាមួយឲ្យសត្វសុនខ(ឆ្កែ)ទាំងនេះ ដើម្បីស្វែងរកអ្នកស្ម័គ្រចិត្តចង់ចិញ្ចឹម។
គេសង្ឃឹមថា ការធ្វើអាជីវកម្មសត្វសុនខ(ឆ្កែ)នឹងត្រូវបានកាត់បន្ថយជាបណ្តើរៗ ទៅតាមសេចក្តីជូនដំណឹងលេខ២៩មកខ.សជណ ចុះថ្ងៃទី ០៦ ខែកក្កដាឆ្នាំ២០២០ ស្តីពីការហាមឃាត់ការធ្វើអាជីវកម្មទិញ លក់ ពិ.ឃា.តសត្វសុនខ(ឆ្កែ)៕
ចែករំលែកព័តមាននេះ