រាជធានីភ្នំពេញ ៖ អ្នកនាំពាក្យក្រសួងសុខាភិបាលបានបញ្ជាក់ស្ថានភាពការឆ្លងជំងឺកូវីដ១៩ មិនសូវអំណោយផលសម្រាប់ប្រទេសកម្ពុជានោះទេ ព្រោះថា មានភាពសាំញាំជាងព្រឹត្តិការណ៍មុនៗ ។
ថ្លែងក្នុងសន្នីសិទសារព័ត៌មាន ព្រឹកថ្ងៃទី២៣ ខែកុម្ភៈ ឆ្នាំ២០២១ លោកស្រី វេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានបញ្ជាក់យ៉ាងដូច្នេះថា ៖« ជោគជ័យ ឬមិនជោគជ័យសម្រាប់ការឆ្លងជំងឺកូវីដ១៩ អាស្រ័យលើប្រជាពលរដ្ឋខ្លួនឯងក្នុងការការពារខ្លួនពីព្រោះវិធានការបានដាក់ជាច្រើនអស់ហើយ» ។
លោកស្រីបន្តថា ការទប់ស្កាត់ការរីករាលដាលជំងឺកូវីដ១៩ នៅពេលនេះមានការពិបាកជាងព្រឹត្តិការសហគមន៍លើកមុនៗ ពីព្រោះថា មានការពិបាកស្មុគស្មាញ ហើយមានការឆ្លងលឿនជាងមុនទៀត ។
ជាមួយគ្នានោះដែរ លោកស្រីអ្នកនាំពាក្យក៏បានលើកឡើងថា ព្រឹត្តិការសហគមន៍២០ កុម្ភៈ មានករណីឆ្លងមានច្រើន ហើយមានករណីបំប្លែងខ្លួនពីវីរុសកូវីដ១៩ ទៀត ។
ជាក់ស្តែងវិទ្យាស្ថានប៉ាស្ទ័រកម្ពុជាបានរកឃើញ ។ ដើម្បីទប់ស្កាត់ការរីករាលដាលជំងឺកូវីដ១៩ នៅកម្ពុជាលោកស្រីក៏បានអំពាវនាវដល់អ្នកដែលជាប់ពាក់ព័ន្ធនឹងព្រឹត្តិការសហគមន៍២០ កុម្ភៈ ដែលទាក់ទងទិននឹងទីតាំងដែលប្រកាសបិទជាបណ្តោះអាសន្នចំនួន២៣កន្លែង ត្រូវតែស្ម័គ្រចិត្តក្នុងការទៅពិនិត្យ និងធ្វើតេស្តរកជំងឺកូវីដ១៩ ។
លោកស្រីក៏បានគូសបញ្ជាក់ថា ៖«អ្វីដែលចាំបាច់ គឺត្រូវមានការចូលរួមពីប្រជាពលរដ្ឋ គឺមិនចាំបាច់កុំចេញពីផ្ទះ ហើយត្រូវមើលថែទាំកុំឲ្យទៅណាមកណា ដើម្បីជៀសវាងការឆ្លងជំងឺកូវីដ ។ ពីព្រោះអាលូវជំងឺនេះបានបំប្លែងខ្លួនថ្មី អីញ្ចឹងបើយើងឆ្លង និងពិបាកហើយ» ។
លោកស្រីបន្តថា មិនតែនៅភ្នំពេញនោះទេ ឥលូវនេះបានរីករាលដាលជំងឺកូវីដ១៩ បានដល់ទៅតាំងមួយចំនួននៅខេត្តកណ្តាលផងដែរ ។ លោកស្រីបន្ថែមថា សូមអ្នកនាំពាក្យដែលគិតថា ពាក់ព័ន្ធសូមទៅពិនិត្យសុខភាព ពីព្រោះថា អ្នកដែលប៉ះពាល់សំខាន់ គឺសមាជិកក្រុមគ្រួសារខ្លួន ៕
ចែករំលែកព័តមាននេះ