ខេត្តកោះកុង ៖ ព្រឹកថ្ងៃទី១៩ ខែកុម្ភៈ ឆ្នាំ២០២១ គណៈកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា(គ.អ.ឆ.ក) បានរៀបចំសិក្ខាសាលាផ្សព្វផ្សាយស្តីពី«ការប្រឡងប្រណាំងឆ្នេរខ្សាច់កម្សាន្តស្អាតលើកទី៣ឆ្នាំ២០២១» អមដោយកិច្ចប្រជុំពិគ្រោះយោបល់ស្តីពីការធ្វើបច្ចុប្បន្នភាពលើ«គោលការណ៍ណែនាំស្តីការគ្រប់គ្រងឆ្នេរខ្សាច់កម្សាន្ត» និង«ក្រមប្រតិបត្តិឆ្នេរ» ឱ្យស្របតាមស្ថានភាពបច្ចុប្បន្ន ក្នុងការចូលរួមទប់ស្កាត់ការរីករាលដាលនៃជំងឺកូវីដ-១៩ ។
សិក្ខាសាលានេះ បានប្រារព្ធធ្វើនៅសាលាខេត្ត ក្រោមអធិបតីភាពឯកឧត្តម នី ផល្លី អនុ
រដ្ឋលេខាធិការក្រសួងទេសចរណ៍ ជាអគ្គលេខាធិការរង គ.អ.ឆ.ក. និងជាប្រធានក្រុមការងារទទួលបន្ទុកតាមដាននិងវាយតម្លៃឆ្នេរខ្សាច់កម្សាន្តស្អាត និងលោក អ៊ុក ភ័ត្រា អភិបាលរងខេត្ត ដោយមានការចូលរួមពីមន្ត្រីរដ្ឋបាលក្រុង-ស្រុក និងមន្ទីរអង្គភាពជំនាញពាក់ព័ន្ធជុំវិញខេត្ត ។
នៅក្នុងអង្គសិក្ខាសាលានេះ ឯកឧត្តមអនុរដ្ឋលេខាធិការ នី ផល្លី បានថ្លែងថា បន្ទាប់ពីបានលើកកាលបរិច្ឆេទក្នុងការរៀបចំក្នុងឆ្នាំ២០២០កន្លងមក និងដោយស្ថានការណ៍បច្ចុបប្បន្ននៃជំងឺកូវីដ-១៩ ស្ថិតក្រោមការគ្រប់គ្រងបានយ៉ាងល្អ ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី ចលនាប្រឡងប្រណាំងឆ្នេរខ្សាច់កម្សាន្តស្អាតលើកទី៣ ត្រូវបានដាក់ឱ្យដំណើរការឡើងវិញសម្រាប់ឆ្នាំ២០២១នេះ ។
ជាមួយគ្នានេះ ក្នុងកិច្ចដំណើរការពិគ្រោះយោបល់លើការធ្វើបច្ចុប្បន្នភាពលើ«គោលការណ៍ណែនាំស្តីពីការគ្រប់គ្រងឆ្នេរខ្សាច់កម្សាន្ត»និង«ក្រមប្រតិបត្តិឆ្នេរ» ឱ្យស្របតាមស្ថានភាពបច្ចុប្បន្ន ក្នុងការចូលរួមទប់ស្កាត់ការរីករាលដាលនៃជំងឺកូវីដ-១៩ ឯកឧត្តមអនុរដ្ឋលេខាធិការបានស្នើឱ្យដាក់បញ្ចូលសូចនាករគោលធំៗ ចំនួន២បន្ថែមទៀត គឺគោលនយោបាយជាតិភូមិ-ឃុំមានសុវត្ថិភាព និងការអនុវត្តវិធានសុខាភិបាល ដើម្បីធានាបានថា គោលដៅទេសចរណ៍ឆ្នេរខ្សាច់កម្សាន្តទាំងអស់នៅក្នុងខេត្តទាំង៤នៃតំបន់
ឆ្នេរសមុទ្រកម្ពុជា ជាគោលដៅទេសចរណ៍ប្រកបដោយសុវត្ថិភាពសម្រាប់ភ្ញៀវទេសចរមកសម្រាកកម្សាន្ត ។
ឯកឧត្តមអនុរដ្ឋលេខាធិការបានបន្ថែមថា ខេត្តកោះកុងមានឆ្នេរខ្សាច់ស្អាតធម្មជាតិជាច្រើនដែលមានសក្តានុពលខ្ពស់ អាចរៀបចំកែលម្អដើម្បីចូលរួមក្នុងការប្រឡងប្រណាំងឆ្នេរខ្សាច់កម្សាន្តស្អាតលើកទី៣ ឆ្នាំ២០២១បាន ។ លើសពីនោះ គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ពិនិត្យឃើញថា ឆ្នេរខ្សាច់ទាំងអស់នោះអាចរៀបចំដើម្បីយកពិន្ទុខ្ពស់និងចំណាត់ថ្នាក់ល្អបាន ដែលនឹងក្លាយជាគោលដៅទេសចរណ៍ដ៏ទាក់ទាញ និងជាមេដែកឆក់ ជំរុញដល់ការរីកលូតលាស់នៃវិស័យទេស
ចរណ៍ និងសេដ្ឋកិច្ចនៅតាមតំបន់ជាប់នឹងឆ្នេរខ្សាច់ទាំងនោះផងដែរ ។
ដោយមើលឃើញពីសក្តានុពលទេសចរណ៍ធម្មជាតិដ៏សម្បូរបែប ឯកឧត្តមអនុរដ្ឋលេខាធិការបានស្នើនិងជំរុញដល់រដ្ឋបាលខេត្តកោះកុង ធ្វើបច្ចុប្បន្នភាពឆ្នេរខ្សាច់ទាំងអស់ក្នុងខេត្ត និងរៀបចំជ្រើសរើសត្រៀមដាក់បញ្ចូលឆ្នេរបេក្ខភាពឲ្យបានច្រើន ក្នុងចលនាប្រឡងប្រណាំងឆ្នេរខ្សាច់កម្សាន្តស្អាតលើកទី៣ឆ្នាំ២០២១នេះ ដោយចាប់ផ្តើមរៀបចំ និងកែលម្អឆ្នេរខ្សាច់នោះឱ្យស្របតាមសូចនាករ ដែលមានចែងនៅក្នុងគោលការណ៍ណែនាំស្តីការគ្រប់គ្រងឆ្នេរខ្សាច់កម្សាន្ត ដើម្បីឆ្ពោះទៅទទួលបានជ័យលាភីនាពេលខាងមុខ ។
ក្នុងករណីចាំបាច់ អគ្គលេខាធិការដ្ឋាននៃគណៈកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា នឹងជួយគាំទ្រជាបច្ចេកទេសក្នុងការរៀបចំកែលម្អឆ្នេរទាំងនោះឱ្យបានស្អាតស្របតាមស្តង់ដារបច្ចេកទេស ដើម្បីអាចយកបានពិន្ទុ និងចំណាត់ថ្នាក់ល្អ ។
គួរបញ្ជាក់ថា រដ្ឋបាលខេត្តកោះកុងនឹងត្រៀមដាក់ឆ្នេរខ្សាច់កម្សាន្តបេក្ខភាពជាច្រើន ក្នុងចលនាឆ្នេរខ្សាច់កម្សាន្តស្អាតលើកទី៣ ឆ្នាំ២០២១ ក្នុងនោះ រួមមាន ឆ្នេរកោះស្នេហ៍ ស្ថិតនៅក្នុងក្រុងខេមរភូមិន្ទ, ឆ្នេរប៉ាក់ខ្លង និងឆ្នេរចាំយាម ក្នុងស្រុកមណ្ឌលសីមា, ឆ្នេរនេសាទ និងឆ្នេរជ្រោយស្វាយ ក្នុងស្រុកស្រែអំបិល, ឆ្នេរអាវសីវង្ស, ឆ្នេរឡាំធាន, ឆ្នេរពយស្ងាវ, ឆ្នេរអាវយាយសែន, ឆ្នេរកោះស្មាច់ និងឆ្នេរកោះសមិត ក្នុងស្រុកគិរីសាគរ ៕
ចែករំលែកព័តមាននេះ