រាជធានីភ្នំពេញ ៖ ដើម្បីគោរពតាមប្រពៃណីសាសនា និងកន្លែងទីសក្ការៈដល់ពុទ្ធបរិស័ទ ក្រសួងមុខងារសាធារណៈ និងសាលាភូមិន្ទរដ្ឋបាលបានដាក់សម្ភោធប្រើប្រាស់សាលាបុណ្យមួយកន្លែង មានទីតាំងនៅលើកំពូលភ្នំគូលែន ស្ថិតក្នុងនៅភូមិសង្កែឡាក់ ឃុំខ្នងភ្នំ ស្រុកស្វាយលើ…
រាជធានីភ្នំពេញ ៖ ដើម្បីគោរពតាមប្រពៃណីសាសនា និងកន្លែងទីសក្ការៈដល់ពុទ្ធបរិស័ទ ក្រសួងមុខងារសាធារណៈ និងសាលាភូមិន្ទរដ្ឋបាលបានដាក់សម្ភោធប្រើប្រាស់សាលាបុណ្យមួយកន្លែង មានទីតាំងនៅលើកំពូលភ្នំគូលែន ស្ថិតក្នុងនៅភូមិសង្កែឡាក់ ឃុំខ្នងភ្នំ ស្រុកស្វាយលើ ខេត្តសៀមរាប ។
លោក យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជានាយកសាលាភូមិន្ទរដ្ឋបាល និងលោក ពិន ប្រាកដ អភិបាលរងខេត្តសៀមរាប នាព្រឹកថ្ងៃទី២០ ខែកុម្ភៈ ឆ្នាំ២០២១ បានអញ្ជើញសម្ពោធដាក់ឱ្យប្រើប្រាស់សាលាបុណ្យមួយកន្លែង មានទីតាំងនៅលើកំពូលភ្នំគូលែន នៅស្រុកស្វាយលើ ខេត្តសៀមរាប ព្រមទាំងបានចែកអំណោយជូន ប្រជាពលរដ្ឋក្រីក្រ លោកគ្រូ អ្នកគ្រូ ប្រជាការពារ សរុបចំនួន៧០នាក់ និងសិស្សានុសិស្សចំនួន១០៧ នាក់ ក្នុងសាលាបឋមសិក្សាសង្កែឡាក់ ដែលរៀបចំដោយ កម្មសិក្សាការីវគ្គវិក្រឹត្យការមន្ត្រីជាន់ខ្ពស់ឆ្នាំ២០២០ បន្ទប់ភ្នំពេញវេនព្រឹក ។
ក្នុងនាមថ្នាក់ដឹកនាំក្រសួងមុខងារសាធារណៈ គណៈគ្រប់គ្រងនៃសាលាភូមិន្ទរដ្ឋបាល លោក យក់ ប៊ុនណា បានសម្តែងនូវអំណរអរគុណ ចំពោះលោកអភិបាលនៃគណៈអភិបាលខេត្តសៀមរាប និងអាជ្ញាធរគ្រប់លំដាប់ថ្នាក់ដែលបានអនុញ្ញាតិឱ្យមានការរៀបចំសកម្មភាពសង្គមរបស់កម្មសិក្សាការីនៅទីនេះ និងបងប្អូនប្រជាពលរដ្ឋដែលផ្តល់ទីតាំង និងដីសម្រាប់ធ្វើការកសាងសាលាបុណ្យភូមិសង្កែឡាក់នៅទីនេះ ។
សកម្មភាពការងារសង្គមដែលរៀបចំឡើង និងសម្ពោធសាលាបុណ្យនាពេលនេះ គឺជាលទ្ធផលនៃការសិក្សារបស់កម្មសិក្សាការីវគ្គវិក្រឹត្យមន្ត្រីជាន់ខ្ពស់ឆ្នាំ២០២០ បន្ទប់ភ្នំពេញវេនព្រឹក ដែលមានសរុបចំនួន ៣៨ អង្គ/នាក់ មកពី១៤ ក្រសួង-ស្ថាប័ន ។
លោករដ្ឋលេខាធិការ ក៏បានលើកឡើងផងដែរ អំពីការអនុវត្តសកម្មភាពសង្គមរបស់កម្មសិក្សាវគ្គវិក្រឹត្យការ វគ្គវិក្រឹត្យការមន្ត្រីជាន់ខ្ពស់ឆ្នាំ២០២០ ដែលបានរៀបចំឡើងក្នុងអំឡុងពេលសិក្សានៅក្នុងសាលាភូមិន្ទរដ្ឋបាលនេះ មានចំនួន ៥ សកម្មភាពធំៗរួមមាន ៖
១. សកម្មភាពសង្គមចូលរួមជាមួយនឹងសាលាភូមិន្ទរដ្ឋបាល
២. សកម្មភាពមនុស្សធម៌
៣.សកម្មភាពជាមួយនឹងពុទ្ធសាសនា
៤. សកម្មភាពជាមួយនឹងកម្មសិក្សាការីរួមជំនាន់ និង៥. សកម្មភាពការងារសង្គមជូនប្រជាជននៅក្នុងភូមិសង្កែឡាក់ ឃុំខ្នងភ្នំ ស្រុកស្វាយលើ ខេត្តសៀមរាប តាមរយៈ ការសាងសង់សាលាបុណ្យមានទំហំ ៨១ម៉ែត្រការ៉េ និងចែកអំណោយ និងសម្ភារសិក្សាជូនសិស្សានុសិស្សចំនួន ១០៧នាក់កំពុងសិក្សានៅក្នុងសាលាបឋមសិក្សាសង្កែឡាក់នេះ។
សកម្មភាពសង្គមដែលកម្មសិក្សាការីបន្ទប់ភ្នំពេញវេនព្រឹក បានរៀបរាប់ខាងលើនេះ គឺកើតចេញការឯកភាពគ្នា មូលមតិគ្នា សាមគ្គីភាពផ្ទៃក្នុង និងការចូលរួមជាថវិកាពីកម្មសិក្សាការីទាំង៣៨អង្គ/នាក់ ស្មើនឹងចំនួន ៧០,៦១៨,៩៧៧ រៀល និង ៨,១១៤ ដុល្លារអាមេរិក ។ ហើយជាធម្មតាក្នុងវគ្គសិក្សា ឬឆ្នាំសិក្សានីមួយៗ តែងតែមានការអនុវត្តសកម្មភាពការងារសង្គមទៅតាមថ្នាក់រៀងខ្លួន និងមានការអញ្ជើញចូលរួមពីគណៈគ្រប់គ្រងសាលា និងអាជ្ញាធរមូលដ្ឋាន ជាក់ស្តែងដូចជា កម្មវិធីដែលបានរៀបចំឡើងនៅក្នុងពេលនេះយ៉ាងដូច្នេះ ៕
ចែករំលែកព័តមាននេះ