អាជ្ញាធរអប្សរាគ្រោងសាកល្បងឱ្យអ្នកទេសចរ តម្រង់ជួរសម្រាប់ការចូលទស្សនាប្រាសាទតាព្រហ្ម

ថ្ងៃទី ១៧ ខែ សីហា ឆ្នាំ ២០១៥

ម៉ោង ០៩:៥៤

ខេត្តសៀមរាប ៖ ដើម្បីបញ្ចៀសការកកស្ទះ នៅព្រឹកថ្ងៃទី២៤ សីហា ខាងមុខនេះ អាជ្ញាធរជាតិអប្សរា គ្រោងនឹងរៀបចំការអនុវត្តសាកល្បងឱ្យភ្ញៀវតម្រង់ជួរសម្រាប់ការចូលទៅទស្សនានៅក្នុងប្រាសាទតាព្រហ្ម ។ ការសាកល្បងនេះស្របពេលដែលកំណើនភ្ញៀវទេសចរចេះតែកើនឡើង ហើយច្រកចូលផ្នែកខាងកើតកំពែងទី៣ឆ្ពោះទៅកាន់ផ្នែកកណ្តាលនៃប្រាសាទ មានសភាពតូចចង្អៀតសណ្ឋានរាងជា.កដបដែលជាហេតុបង្កឲ្យកកស្ទះ ។

ក្នុងលិខិតជូនដំណឹងស្តីពីការចូលរួមអនុវត្ត ការទស្សនាចរ សម្រាប់ប្រាសាទតាព្រហ្មលេខ ៥៥៤/រប.សជណ ចុះថ្ងៃទី៧ សីហា និងមានចុះហត្ថលេខាដោយលោកប៊ុន ណារិទ្ធ អគ្គនាយកអាជ្ញាធរជាតិអប្សរា បានបញ្ជាក់ថា អាជ្ញាធរជាតិអប្សរាមានកិត្តិយសជម្រាបជូនដំណឹងដល់មន្ទីរទេសចរណ៍, សមាគមទីភ្នាក់ងារទេសចរណ៍, សមាគមមគ្គុទ្ទេសក៍ទេសចរណ៍, ក្រុមហ៊ុនទេសចរណ៍, មគ្គុទ្ទេសក៍ទេសចរណ៍ និងប្រតិបត្តិករក្នុងវិស័យទេសចរណ៍ទាំងអស់ឱ្យបានជ្រាបជាព័ត៌មានថា ចាប់តាំងពីការបើកឱ្យដំណើរការវង់ទស្សនាចរសាកល្បងប្រាសាទតាព្រហ្ម អស់រយៈពេល៥ខែមកនេះ ជាលទ្ធផលឃើញថា មានដំណើរការយា៉ងរលូន ។ ព្រោះការចូលទស្សនារបស់ភ្ញៀវមានសណ្តាប់ធ្នាប់និងរបៀបរៀបរយ និងបានជួយសម្រួលបញ្ចៀសការកកស្ទះបានមួយចំនួនធំ នៅផ្នែកកណ្តាលប្រាសាទតាព្រហ្ម ក៏ដូចជាចៀសវាងផលប៉ះពាល់ប្រាសាទនិងរក្សាសុវត្ថិភាពជូនភ្ញៀវចូលទស្សនាផងដែរ ។

ក្នុងលិខិតជូនដំណឹងនោះបានបញ្ជាក់ទៀតថា កន្លងមកអាជ្ញាធរជាតិអប្សរា បានសហការជាមួយគម្រោងឥណ្ឌា ASI ដើម្បីពង្រីកទំហំ កម្រាលឈើនៅត្រង់ដើមស្ពង់ ក្នុងកំពែងទី៣ភាគខាងកើត ប៉ុន្តែយើងសង្កេតឃើញមានការកកស្ទះត្រង់ចំណុចច្រកចូលខាងកើតកំពែងទី៣ឆ្ពោះទៅកាន់ផ្នែកកណ្តាលនៃប្រាសាទ ខណៈមានភ្ញៀវច្រើន ព្រោះច្រកចូលនោះមានភាពតូចចង្អៀតរាងជាសណ្ឋាន.កដប ព្រោះហេតុនោះខាងអាជ្ញាធរជាតិអប្សរាត្រៀមអនុវត្តសាកល្បង ការតម្រង់ជួរភ្ញៀវ ក្នុងករណីភ្ញៀវច្រើន សម្រាប់ការចូលទស្សនាផ្នែកកណ្តាលប្រាសាទតាព្រហ្ម ដើម្បីរក្សាបាននូវ ៖
១-ការអភិរក្សប្រាសាទតាមរយៈការគ្រប់គ្រងលំហូរភ្ញៀវឱ្យបានប្រសើរ ។
២-ផ្តល់បទពិសោធល្អនិងសុវត្ថិភាពដល់ការចូលទស្សនារបស់ភ្ញៀវ។
៣-បង្ហាញពីគុណភាពនៃការគ្រប់គ្រងរមណីយដ្ឋានបេតិកភណ្ឌពិភពលោក ៕