ភ្នំពេញ៖ បុរសម្នាក់ បើករថយន្តបង្កស៊េរីទំនើប ម៉ាក អូឌី ក្នុងស្ថានភាពល្បឿនលឿន​ដូចហោះ ហើយអ្នកបើកបរងោកមួយភាំង បានរេចង្កូត ជ្រុលទៅបុកបង្គោលរបងតឿ ដាក់ច្រវាក់របស់ស្ថានទូតបារាំង បណ្តាលអោយរងការខូចខាត។ តែសំណាងល្អ អ្នកបើកបររងរបួសស្រាល។ ហេតុការណ៍នេះ បានកើតឡើង កាលពីវេលាម៉ោង ៣ និង១៥ នាទី ទាបភ្លឺថ្ងៃទី១៨ ខែកុម្ភៈ ឆ្នាំ២០២១ តាមបណ្តោយផ្លូវព្រះមុនីវង្ស ​​ស្ថិតនៅក្នុងសង្កាត់ស្រះចក ខណ្ឌដូនពេញ​។

​សមត្ថកិច្ច ដែលយាមនៅគោលដៅខាងលើនេះ បានអោយដឹងថា មុនពេលកើតហេតុ ​គឺរថយន្ត​ម៉ាក អូឌី ពណ៌សពាក់ស្លាកលេខ នគរបាល 2-2764 បើកបរដោយបុរសម្នាក់ តាមបណ្តោយផ្លូវព្រះមុនីវង្ស ក្នុងទិសដៅពីត្បូងទៅជើង ខណៈពេលបើកមកដល់​ចំណុច​កើតហេតុខាងលើនេះ ដោយសារតែរថយន្តបង្កបើកក្នុងស្ថានភាពយ៉ាង​លឿនដូចហោះ មិនបានប្រយ័ត្ននោះទេ ហើយសង្ស័យម្ចាស់រថយន្តងោកមួយភាំង ទើបរេចង្កូតមកឆ្វេងដៃបុករះបង្គោលតឿ ដាក់ច្រវាក់របងស្ថានទូតបារាំង បណ្តាលអោយអស់បាក់រាយប៉ាយ ពេញផ្លូវហើយរថយន្ត​ ខ្ទាតជាង ២០០​ម៉ែត្រ រងការខូចខាតខ្ទេចអស់មួយកំណាត់ខាងមុខ ចំហៀងខាងឆ្វេង ថែមទាំងដាច់ក្រឡេកង់ និងដាច់បូមខ្ទាតពេញផ្លូវ និងផ្ទុះពោងទាំងសងខាង។

ភ្លាមៗនោះ ​អ្នកបើកបរ ចេញមកដោះស្លាកលេខ​ យកទៅទុក រួចគេចចេញពីកន្លែង​កើតហេតុបាត់ បន្សល់ទុកនៅតែរថយន្ត អោយតំណាងមកជួយដោះស្រាយ។

គ្រោះថ្នាក់ខាងលើនេះ គឺខូចខាតបង្គោលរបងអស់ចំនួន ១៤បង្គោល មានបាក់ខ្លះ និងខូចខាតតិចតួចខ្លះ​។

ក្រោយពេលកើតហេតុ រថយន្តបង្ក ត្រូវបានសមត្ថកិច្ច​ វាស់វែង អូសយកទៅរក្សាទុក​នៅការិយាល័យចរាចរណ៍ផ្លូវគោក ដើម្បី​ដោះស្រាយ និងផាកពិន័យទៅតាមនីតិវិធី​៕ ដោយ៖ យឹម ឈឿន