ភ្នំពេញ៖ រថយន្តយីឌុបដឹកផ្លែស្វាយ បើកជ្រុល ទៅកៀរម៉ូតូ ZOOMER X ដែលជិះដោយបុរសម្នាក់ ដួលចូលក្រោមរថយន្ត រងរបួសធ្ងន់។ ហេតុការណ៍នេះ បានកើតឡើង នៅវេលាម៉ោង ៩ និង ១០នាទីយប់ ថ្ងៃទី១៧ ខែកុម្ភៈ ឆ្នាំ២០២១ ទល់មុខផ្សារឯករាជ្យ៣ ផ្លូវវេង​ស្រេង សង្កាត់ស្ទឹងមានជ័យ៣ ខណ្ឌមានជ័យ​។ 

​ប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេបានឃើញ បុរស​ម្នាក់ជិះម៉ូតូម៉ាក ZOMER X ពណ៌ក្រហម  ពាក់ស្លាកលេខ  កំពង់ចាម 1A9217  បានធ្វើដំណើរតាមបណ្ដោយផ្លូវវេងស្រេង ក្នុង​ទិសដៅពីកើតទៅលិច លុះមកដល់ចំនុចកើតហេតុ ក៏ស្រាប់តែមានរថយន្តយីឌុបដឹកផ្លែស្វាយ មួយគ្រឿង ម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3C-4328 បើកបរដោយបុរសម្នាក់ រួមដំណើរជាមួយនឹងព្រូរថយន្ដម្នាក់ទៀត បានធ្វើដំណើរ ក្នុងទិសដៅស្របគ្នា ក៏ជ្រុលទៅកៀរនឹងម៉ូតូ បណ្តាលឲ្យដួលម៉ូតូ ហើយខ្ទាតមនុស្សចូលក្រោមរថយន្ត ក៏ត្រូវរថយន្តកិន ធ្វើឲ្យរងរបួស​ដៃខាងស្តាំធ្ងន់ធ្ងរ។ បុរសរងគ្រោះ ត្រូវបានរថយន្តសង្គ្រោះ បានមកដឹក យកទៅសង្គ្រោះនៅ​មន្ទីរពេទ្យ​ព្រះកុសុមៈភ្លាមៗ​។ 

ដោយឡែក ខាងរថយន្ត​វិញ បានអោយដឹងថា មុនពេលកើតហេតុ ពួកគាត់បានដឹកផ្លែស្វាយ​ពីស្រុកស្អាង ខេត្តកណ្ដាល គោលបំណងយកទៅព្រំប្រទល់ប្រទេសថៃ​ លុះមកដល់ចំនុចកើតហេតុ ក៏ស្រាប់តែបុរសជាអ្នកជិះម៉ូតូ បានចាប់ហ្រ្វាំង រអិលដួល ខ្ទាតចូលក្រោមរថយន្តរបស់គាត់  មិនមែនរថយន្ដរបស់គាត់ បានបើកទៅបុក ឬកៀរដូចបងប្អូនប្រជាពល​រដ្ឋ​និយាយនោះទេ​។ 

ក្រោយពេលកើតហេតុ ដោយសារតែអត់មានដំណោះស្រាយ រថយន្ដ និងម៉ូតូ ត្រូវបានសមត្ថកិច្ចជំនាញចរាចរណ៍រាជធានីភ្នំពេញ បាន​វាស់វែង ហើយ​យកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការរាជធានីភ្នំពេញ ដើម្បីរង់ចាំ​ដោះស្រាយ​គ្នា៕ ដោយ៖ យឹម ឈឿន