រាជធានីភ្នំពេញ ៖ និយាយក្នុងក្របខណ្ឌទំនាក់ទំនងពាណិជ្ជកម្ម លោក W. Patrick Murphy អគ្គរដ្ឋទូត​របស់សហរដ្ឋអាមេរិក ប្រចាំនៅភ្នំពេញបានជូបមន្រ្តីសំខាន់ៗរបស់​កម្ពុជា​បន្តបន្ទាប់​ប៉ុន្មានថ្ងៃនេះ កាលពីចុងសប្តាហ៍មុនលោកទូតបានជួបពិភាក្សាការងារ​ជាមួយ​ថ្នាក់ដឹកនាំអាកាសចរណ៍ស៊ីវិលកម្ពុជា ហើយនៅថ្ងៃទី ១៦កុម្ភៈនេះទៀត លោក​ទូតបានជួបជាមួយរដ្ឋមន្រ្តីក្រសួងពាណិជ្ជកម្ ម​។

ក្រសួងពាណិជ្ជកម្មបានឲ្យដឹង ជំនួបរវាង លោក ប៉ាន សូរស័ក្ដិ និងលោក W. Patrick Murphy បានលើកឡើងអំពីទំនាក់ទំនងសេដ្ឋកិច្ចនិងពាណិជ្ជកម្មរវាងប្រទេសទាំងពីរ ទោះជាប្រឈមនឹងវិបត្តិជំងឺកូវីដ-១៩ កំពុងបង្កផលប៉ះពាល់ដល់ការធ្វើពាណិជ្ជកម្ម និងរបៀបរបបរស់នៅរបស់ប្រទេសទាំងអស់នៅលើពិភពលោក តែទំហំពាណិជ្ជកម្ម​រវាងប្រទេសទាំងពីរនៅតែមានការកើនឡើងកាលពីឆ្នាំកន្លងទៅ ។

លោករដ្ឋមន្រ្តីក្រសួងពាណិជ្ជកម្ម បានរំលឹកឡើងវិញអំពីកិច្ចព្រមព្រៀងស្តីពី​ទំនាក់​ទំនងពាណិជ្ជកម្ម និងកិច្ចការពារកម្មសិទ្ធិបញ្ញា ដែលប្រទេសទាំងពីរបានចុះហត្ថលេខា​កាល​ពីឆ្នាំ ១៩៩៦ កន្លងទៅ ដែលក្រោយមកវិស័យកម្មសិទ្ធិបញ្ញាមានការរីក​ចម្រើន​ច្រើនគួរ​ឱ្យកត់សម្គាល់ ដែលថ្មីៗនេះកម្ពុជាបានចូលនិងកំពុងសិក្សាចូលជា​សមា​ជិកនៃសន្ធិសញ្ញាអន្តរជាតិពាក់ព័ន្ធនឹងកម្មសិទ្ធិបញ្ញាសំខាន់ៗជាច្រើនទៀត ក៏ដូច​ជាកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការបន្តកិច្ចសម្រួលពាណិជ្ជកម្ម ដែលថ្មីៗនេះ បានដាក់ឱ្យដំណើរការនូវប្រព័ន្ធចុះបញ្ជីអាជីវកម្មតាមប្រព័ន្ធព័ត៌មាន (CamDX) សំដៅសម្រួលការចុះបញ្ជីពអាជីវកម្ម និងទាក់ទាញវិនិយោគបន្ថែមទៀត ។

តំណាងកម្ពុជានិងអាមេរិក បានពិភាក្សាផងដែរអំពីលទ្ធភាពក្នុងការពង្រីក​ទំហំពាណិជ្ជ​កម្ម​រវាងប្រទេសទាំងពីរបន្ថែមទៀត ការរៀបចំច្បាប់និងលិខិតបទដ្ឋានគតិយុត្ត​ពាក់ព័ន្ធ​នឹង​វិស័យឌីជីថល ការងារអាទិភាពផ្សេងទៀតពាក់ព័ន្ធនឹងការត្រៀមខ្លួន​ធ្វើជាប្រធាន​អាស៊ាន​ឆ្នាំ២០២២ និងបញ្ជាក់ជាថ្មីអំពីការបន្តកិច្ចសហប្រតិបត្តិការ​ជិត​ស្និទ្ធបន្ថែម​ទៀត ។

ដោយឡែកនៅក្នុងជំនួបជាមួយលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេ​ខា​ធិការ​ដ្ឋាន​អាកា​សចរ​ស៊ីវិល លោក ឯកអគ្គរដ្ឋទូតសហរដ្ឋអាមេរិកបានស្វែង​យល់ពីការវិវត្តន៍​នៃវិស័យអាកាសចរស៊ីវិលនៅកម្ពុជា ស្វែងយល់ពីការ​វិវត្តន៍នៃ​ការត្រៀម​ខ្លួនសម្រាប់ការចូលជាសមាជិកអនុសញ្ញាខេបថោន (ស៊ីធីស៊ី) (Cape Town Convention) និងស្វែងយល់និងទទួលបាននៅការគាំទ្រដល់​សំណើររបស់​ក្រុមហ៊ុន FedEx ដែលមានគម្រោងហោះហើរដឹកទំនិញចេញ​ចូលកម្ពុជា ​(Cargo/Freight) នៅក្នុងខែមិថុនាឆ្នាំ ២០២១ ។

កម្ពុជាបាន គាំទ្រឱ្យមានការហោះហើរមកកម្ពុជានៃក្រុមហ៊ុន ដឹកទំនិញ FedEx ។  លោក ម៉ៅ ហាវណ្ណាល់ បាននិយាយថា “យើងបានពិនិត្យនិងហើយ ប៉ុន្តែដោយសារមាន​ការខ្វះខាតនូវឯកសារមួយចំនួនដែលត្រូវបំពេញបន្ថែម ហើយខាងភាគីសហរដ្ឋ​អាមេរិក​ក៏បានយកទៅពិនិត្យពិចារណាហើយយើងនឹងគាំទ្រនិង​ជួយសម្រួលដល់​ក្រុមហ៊ុន FedEx” ។

​ឆ្នាំ​ ២០១៩ ទំហំ​ពាណិជ្ជកម្ម​ទ្វេភាគី​​ប្រទេស​ទាំង ២ កម្ពុជា អាមេរិក មាន​តម្លៃ ៥ ៨៧០,៨ លាន​ដុល្លារ​ កើនឡើង ៣៨,០៥% បើ​ធៀប​នឹង​ ​ឆ្នាំ​ ២០១៨​ មានចំនួន ៤ ២៥២,៤ លាន​ដុល្លារ​ ។ នៅឆ្នាំ ២០២០ ​ទំហំ​ពាណិជ្ជកម្ម​​​កម្ពុជា និង​អាមេរិក នៅតែមិន​បាន​ធ្លាក់ចុះ​នោះទេ ដោយ​ក្នុង​រយៈពេល​ ១០ ​ខែ​ដំបូង​មាន​តម្លៃ​ជាង ៥,៨ ​ពាន់​លាន​ដុល្លារ ៕