ខេត្តបន្ទាយមានជ័យ៖ ស្ត្រីម្នាក់ជាមេខ្យល់ ធ្លាប់នាំមនុស្សឆ្លងដែនដោយខុសច្បាប់​យ៉ាងសកម្ម ត្រូវបានកម្លាំងនគរបាលការិយាល័យប្រឆាំងការជួញដូរមនុស្ស និងការពារ​អនីតិជន ចាប់​បញ្ជូនខ្លួន ទៅសាលាដំបូងខេត្តបន្ទាយមានជ័យ នៅថ្ងៃទី១៦ ខែកុម្ភៈ ឆ្នាំ២០២១ ដើម្បីចាត់ការតាមនីតិវិធីច្បាប់​។

​លោកវរសេនីយ៍ឯក សែស វិបុល អធិការនគរបាលស្រុកអូរជ្រៅ បានឲ្យដឹងថា​ ជនសង្ស័យឈ្មោះ ខន សុឃឿត ភេទស្រី អាយុ ៣៦ឆ្នាំ នៅភូមិសិលាខ្មែរ ឃុំ អូរបីជាន់ ស្រុកអូរជ្រៅ ខេត្តបន្ទាយមានជ័យ​។ ជននេះ ត្រូវបានកម្លាំងនគរបាលវរសេនាតូច​ការពារព្រំដែនគោកលេខ៩១១ ចុះល្បាតតាមបន្ទាត់ព្រំដែន ហើយបាន​ចាប់ឃាត់ខ្លួន នៅវេលាម៉ោង ០៤ និង ០៤នាទីល្ងាចថ្ងៃទី១៤ ខែកុម្ភៈ ឆ្នាំ២០២១  ចំណុចភូមិសាស្ត្រ​ភូមិសិលាខ្មែរ ឃុំ​អូរបីជាន់ ស្រុកអូរជ្រៅ ខណៈពេលកំពុងនាំមនុស្សឆ្លងដែន ចេញពី​ប្រទេសថៃ ចូលមកកម្ពុជា​ តាមច្រករបៀងខុសច្បាប់ គេចពីការធ្វើចត្តាឡីស័ក។

ក្រោយឃាត់ខ្លួន ស្ត្រីមេខ្យល់នេះ ត្រូវ​បានបញ្ជូនមកអធិការដ្ឋាននគរបាលស្រុកអូរជ្រៅ ដើម្បីសាកសួរ ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលពីឯកឧត្តម មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ។ ជនសង្ស័យ ត្រូវបានឃាត់ខ្លួន និងរៀបចំសំណុំរឿង តាមនីតិវិធី​ច្បាប់។

​លោកវរសេនីយ៍ឯក ឡាយ គឹមលួន នាយការិយាល័យ​នគរបាលប្រឆាំងការជួញ​ដូរមនុស្ស និងការពារអនីតិជន បានឲ្យដឹងថា​ នៅចំពោះមុខសមត្ថកិច្ច ជនសង្ស័យ បានសារភាពថា ខ្លួនបានលួចនាំមនុស្សចេញ ចូល​ឆ្លងដែន ចំនួន ០៥លើក​រួចមកហើយ  ចាប់ពីខែមករា ឆ្នាំ២០២១មក។ ខ្លួនបានជូនគេទៅធ្វើការ ដកដំឡូង និងកាប់អំពៅ ក្នុងរយៈពេល ០១អាទិត្យ ឬ១០ថ្ងៃ ទើបវិលមកខ្មែរវិញ ដោយយកគេក្នុង ម្នាក់ ឬ ២នាក់ តម្លៃ ៣០០បាត​។

​លោកស្រី ឧត្តមសេនីយ៍ត្រី ឌី សុជាតិ ស្នងការរង ទទួលផែនការងារយ៉េនឌ័រ និងប្រឆាំងការជួញដូរមនុស្ស និងការពារអនីតិជន បានបញ្ជាក់ថា ដោយផ្អែកតាម​ចម្លើយសារភាព​ ​ជនសង្ស័យឈ្មោះ ខន សុឃឿត ត្រូវបានកម្លាំងជំនាញការិយាល័យ​ប្រឆាំងការជួញដូរមនុស្ស និងការពារអនីតិជន រៀបចំសំណុំរឿង​ បញ្ជូនខ្លួនទៅសាលា​ដំបូងខេត្ត ដើម្បីចាត់ការតាមនីតិវិធីច្បាប់៕  ដោយ៖ ណុប រក្សា