ខេត្តឧត្តរមានជ័យ ៖ ករណីមាន«ស្រីស្អាតម្នាក់ គេចខ្លួនពីមណ្ឌលចត្តាឡីស័ក រត់តាមសង្សារ» ត្រូវបានមន្ត្រីនៃមន្ទីរសុខាភិបាលខេត្តឧត្តរមានជ័យ តាមស្រាវជ្រាវ រកឃើញវិញហើយក្នុងសណ្ឋាគារមួយ នៅអន្លង់វែង ហើយក៏បានតាមរកអ្នកពាក់ព័ន្ធ(បុរសជាសង្សារ)…
ខេត្តឧត្តរមានជ័យ ៖ ករណីមាន«ស្រីស្អាតម្នាក់ គេចខ្លួនពីមណ្ឌលចត្តាឡីស័ក រត់តាមសង្សារ» ត្រូវបានមន្ត្រីនៃមន្ទីរសុខាភិបាលខេត្តឧត្តរមានជ័យ តាមស្រាវជ្រាវ រកឃើញវិញហើយក្នុងសណ្ឋាគារមួយ នៅអន្លង់វែង ហើយក៏បានតាមរកអ្នកពាក់ព័ន្ធ(បុរសជាសង្សារ) នាំខ្លួនយកមកធ្វើចត្តាឡីស័ក រយៈពេល ១៤ថ្ងៃឡើងវិញផងដែរ នៅរសៀលថ្ងៃទី១៦ ខែកុម្ភៈ ២០២១នេះ ។
សូមបញ្ជាក់ថា កាលពីថ្ងៃទី១៥ ខែកុម្ភៈ ឆ្នាំ២០២១ នារីវ័យក្មេង រូបស្រស់ស្អាតម្នាក់ មានឈ្មោះ ធា ជីថា អាយុ១៧ឆ្នាំ មានទីលំនៅភូមិព្រៃចង្វា ឃុំបន្ទាយនាងស្រុកមង្គលបូរី ខេត្តបន្ទាយមានជ័យ បានរត់ចេញពីមណ្ឌលចត្តាឡីស័ក ស្រុកត្រពាំងប្រាសាទ ខេត្តឧត្តរមានជ័យ តាមសង្សារឈ្មោះ ឌិន សាម៉ឺយ អាយុ២០ឆ្នាំ មានទីលំនៅភូមិអង្ការអេដស៍ ឃុំកន្ទួត ស្រុកជាំក្សាន្ត ខេត្តព្រះវិហារ នេះបើតាមរបាយការណ៍របស់ស្នងការដ្ឋាននគរបាលខេត្តព្រះវិហារ ។
គួរជម្រាបថា រដ្ឋមន្ត្រីក្រសួងសុខាភិបាលកម្ពុជា ម៉ម ប៊ុនហេង ត្រៀមស្នើសុំទៅក្រសួងយុត្តិធម៌ ដើម្បីចេញច្បាប់ដាក់ទោសទណ្ឌ ឬផាកពិន័យដល់ប្រជាពលរដ្ឋ មិនព្រមចូលខ្លួនធ្វើចត្តាឡីស័ក ។
បើតាមអនុក្រឹត្យស្តីពីវិធានការសុខាភិបាលដើម្បីទប់ស្កាត់ និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញចូល ដែលបានដាក់ឱ្យប្រើប្រាស់នៅថ្ងៃទី១៧ ខែកញ្ញា ឆ្នាំ២០១៥ ត្រង់ជំពូកទី៥ ស្តីពីទណ្ឌកម្ម ក្នុងមាត្រា៨ បានចែងថា អ្នកដំណើរ ឬការីនៃយានដឹកជញ្ជូនណាដែលគេចវេសមិនឱ្យមន្ត្រីចត្តាឡីស័កធ្វើការត្រួតពិនិត្យ ឬមិនសហការជាមួយនឹងមន្ត្រីចត្តាឡីស័កក្នុងការអនុវត្តន៍វិធានការសុខាភិបាល ឬមិនបំពេញតាមបែបបទដែលមានកំណត់ក្នុងអនុក្រឹត្យនេះ ត្រូវទទួលពិន័យអន្តរការណ៍ជាប្រាក់ពី ២០ម៉ឺនរៀល ទៅ ១លានរៀល ទៅតាមទំហំនៃបទល្មើស និងតម្រូវឱ្យអនុវត្តវិធានការសុខាភិបាល ៕
ចែករំលែកព័តមាននេះ