ខេត្តស្វាយរៀង៖ ភ្លើង​បានលេបត្របាក់ចំការអំពៅអស់ចំនួន ៨០ហិកតា ខូចខាតស្ទើរទាំងស្រុង។ សមត្ថកិច្ចដាក់ការសង្ស័យថា មានជនខិលខូច​លួចដុតបំផ្លាញ។

​រសមត្ថកិច្ចនគបាលវរៈការពារព្រំដែនប៉ុស្តិ៍មនោរម្យ បានឲ្យដឹងថា ករណីភ្លើងឆេះ​ចំការអំពៅនេះ បានកើតឡើង នៅវេលាម៉ោងប្រហែល ១២ថ្ងៃត្រង់ ថ្ងៃទី១៤កុម្ភៈ ឆ្នាំ​២០២១ ស្ថិតនៅភូមិអូតាមោ ឃុំមនោរម្យ ស្រុកស្វាយទាប ឆេះអស់ប្រមាណ ៨០ហិកតា។

សមត្ថកិច្ចបន្តថា ​ចំការអំពៅស្ករ​ ដែលឆេះនេះ គឺជារបស់ក្រុមហ៊ុនលោក កុយ សារ៉េន ដែលមានទីលំនៅ ក្នុងភូមិពពែត ឃុំពពែត ស្រុកស្វាយទាប។

ប្រភពបន្តទៀតថា ក្រោយពីប្រជាពលរដ្ឋរាយការណ៍ថា មានភ្លើងឆេះចំការអំពៅ សមត្ថកិច្ចបានដឹកនាំកម្លាំងទៅជួយអន្តរាគមន៍ពន្លត់រយៈពេលជាង ២ម៉ោង ទើបភ្លើងបានរលត់នៅម៉ោង ២ និង ៣០នាទីរសៀល។ ដោយភ្លើងឆេះ មានទ្រង់ទ្រាយធំពេក មិនអាចគ្រប់គ្រង និងជួយពន្លត់បាន។ ម្យ៉ាងមេឃក្តៅខ្លាំង និងមានខ្យល់ផង ទើបឆេះរាលលឿនបែបនេះ។

ក្រោយការពិនិត្យស្ថានភាពរួច សមត្ថកិច្ចដាក់ការសង្ស័យថា ភ្លើងឆេះអំពៅនេះ គឺមានជនខិលខូច លួចដុត។ បច្ចុប្បន្ន កងកម្លាំងសមត្ថកិច្ចនគរបាលប៉ុស្តិ៍រដ្ឋបាល​ឃុំមនោរម្យ បានសហការជាមួយកម្លាំងនគរបាលវរៈការពារព្រំដែន​ដំណាក់ ព្រំដែនមនោរម្យ និងកងយោធពលខេមរភូមិន្ទ​វរៈការពារព្រំដែន ចុះអង្កេតស្រាវជ្រោវ រកមុខសញ្ញា ដើម្បីចាប់មកផ្តន្ទាទោស​តាមច្បាប់៕ ដោយ៖ វ៉ាន់ ប៊ុនធឿន​