រាជធានីភ្នំពេញ ៖ បងប្អូនអ្នកធ្វើដំណើរតាមសាឡាងឆ្លងកាត់ទៅមករវាងរាជធានីភ្នំពេញ និងតំបន់អរិយក្សត្របានសម្តែងការភ្ញាក់ផ្អើលជុំវិញបញ្ហាទឹកទន្លេចតុមុខបានប្រែពណ៌ម្ខាងពណ៌ល្អក់រាងក្រហម និងម្ខាងទៀតប្រែជាពណ៌ខៀវបៃតងថ្លាដូចទឹកសមុទ្រ ។
លោក លី សីឡា ដែលធ្វើដំណើរតាមសាឡាងចេញពីមុខណាហ្គាវើលដ៍ទៅកាន់តំបន់អរិយក្សត្រ បានថ្លែងឲ្យដឹងថា នៅថ្ងៃទី១៥ ខែកុម្ភៈនេះថា លោកបានឃើញស្ថានភាពទឹកមុខវាំងមានការប្រែពណ៌ជា២ដាច់ពីគ្នា គឺម្ខាងចាប់ពីច្រាំងទន្លេមុខវាំង គឺមានពណ៌ល្អក់ៗរាងក្រហមតិចៗនិងរហូតដល់ពាក់កណ្តាលទន្លេទៅត្រើយខាងអរិយក្សត្រ គឺមានពណ៌ខៀវបៃតងថ្លាដូចទឹកសមុទ្រ ដែលវាបង្កើតជាព្រឹត្តិការណ៍មួយមិនធ្លាប់បានឃើញពីមុនមក។
លោកលី សីឡា បានបន្តថា «ខ្ញុំក៏មិនដឹងហេតុផលអ្វីដែលបណ្តាលឲ្យទឹកទន្លេមុខវាំងនេះទៅជាប្រែពណ៌ពីរផ្សេងគ្នា និងចែកខណ្ឌគ្នាយ៉ាងនេះនោះទេ ។ ខ្ញុំធ្វើដំណើររវាងភ្នំពេញ និងអរិយក្សត្រកាលពីថ្ងៃអាទិត្យ ក៏ឃើញទឹកប្រែពណ៌ម្ខាងល្អក់រាងក្រហមតិចៗ និងម្ខាងពណ៌បៃតងបែបនេះដែរ គឺឃើញកើតមានរយៈពេល២ ឬ៣ថ្ងៃហើយ» ។
ចំណែកអ្នកនាងស្រីម៉ៅ ដែលទើបតែធ្វើដំណើរទៅអរិយក្សត្រថ្ងៃទី១៥ ខែកុម្ភៈនេះក៏បាននិយាយឲ្យដឹងផងដែរថា «កាលពីថ្ងៃសោរ៍ ទី១៣ ខែកុម្ភៈ ខ្ញុំធ្វើដំណើរមកលេងអរិយក្សត្រដែរ តែមិនបានឃើញទឹកទន្លេប្រែជាពីរពណ៌ចែកដាច់គ្នាបែបនេះដែរ ។ ពិតជាចម្លែកណាស់» ។
ជុំវិញបញ្ហានៃការប្រែពណ៌ទឹកទន្លេមេគង្គទៅជាពណ៌បៃតងនៅតាមតំបន់ខ្លះនេះផងដែរ គណៈកម្មការទន្លេមេគង្គ (MRC) បានចេញរបាយការណ៍នាថ្ងៃទី១២ ខែកុម្ភៈ បង្ហាញនូវព្រួយបារម្ភជុំវិញបញ្ហាទឹកទន្លេមេគង្គបានធ្លាក់ចុះដល់កម្រិតគួរឱ្យព្រួយបារម្ភដែលបានបណ្តាលឲ្យផ្នែកខ្លះប្រែទៅជាពណ៌ខៀវបៃតង ។
លេខាធិការដ្ឋានគណៈកម្មការទន្លេមេគង្គ (MRC) បាននិយាយថា កំរិតទឹកទន្លេមេគង្គរវាងស្ថានីយ៍វារីអគ្គិសនី ជីងហុង ( Jinghong ) ក្នុងខេត្តយូណាន ប្រទេសចិន និងតំបន់ដីសណ្តទន្លេមេគង្គ ក្នុងប្រទេសវៀតណាម បានរាក់ចុះដល់កម្រិតគួរឱ្យព្រួយបារម្ភ។
កម្រិតទឹកកាន់តែរាក់ចុះខ្លាំងគួរឱ្យកត់សម្គាល់ចាប់តាំងពីដើមឆ្នាំ ដោយសារទឹកភ្លៀងទាបការផ្លាស់ប្តូរលំហូរខ្សែទឹកខាងលើ ប្រតិបត្តិការវារីអគ្គិសនីនៅតាមដងទន្លេមេគង្គ និងការរឹតបន្តឹងលំហូរចេញពីទំនប់វារីអគ្គិសនីជីងហុង។
បណ្ឌិត Winai Wangpimool ប្រធានលេខាធិការដ្ឋានបច្ចេកទេសនៃគណៈកម្មការទន្លេមេគង្គបានមានប្រសាសន៍ថា «កម្រិតទឹកបានកើនឡើងភ្លាមៗ និងធ្លាក់ចុះភ្លាមៗនៃកម្រិតទឹកនៅខ្សែទឹកខាងក្រោមទំនប់វារីអគ្គិសនីជីងហុង និងកម្រិតទឹកកាន់តែរាក់ទៅនៅក្រុងវៀងចន្ទន៍ ដែលជាបញ្ហាប្រឈមសម្រាប់អាជ្ញាធរ និងសហគមន៍ក្នុងការរៀបចំ និងឆ្លើយតបចំពោះផលប៉ះពាល់ដែលអាចកើតមាន» ។ លោកបណ្ឌិតបានបន្តថា ប្រសិនបើកម្រិតទឹកនៅបន្តទាបបែបនេះ នឹងធ្វើឱ្យប៉ះពាល់ដល់ការដឹកជញ្ជូនតាមផ្លូវទឹក ការបំលាស់ទីរបស់មច្ឆា ការធ្វើកសិកម្ម និងការចិញ្ចឹមជីវិតនៅតាមដងទន្លេជាដើម របស់ពលរដ្ឋ។
លោកបណ្ឌិត Winai មានប្រសាសន៍បន្តថា «ដើម្បីជួយបណ្តាប្រទេសនៅតំបន់មេគង្គក្រោមគ្រប់គ្រងហានិភ័យឱ្យកាន់តែមានប្រសិទ្ធភាពយើងសូមអំពាវនាវដល់ប្រទេសចិន និងប្រទេសនៅតាមដងទន្លេមេគង្គក្រោមខ្លួនឯងឲ្យចូលរួមចែករំលែកផែនការបញ្ចេញទឹករបស់ពួកគេជាមួយយើង» ។
MRC បាននិយាយថា ការអង្កេតអំពីទឹកភ្លៀងប្រចាំខែរបស់គណៈកម្មការទន្លេមេគង្គបង្ហាញថាចាប់តាំងពីខែវិច្ឆិកាឆ្នាំមុន ទឹកភ្លៀងមានកម្រិតទាបជាងមធ្យមដោយមានការធ្លាក់ចុះ ២៥ ភាគរយ។
សម្រាប់កម្ពុជាវិញ MRC និយាយថា ខ្សែទឹកខាងក្រោមនៅប្រទេសកម្ពុជាកំរិតទឹកនៅតាមដងទន្លេមេគង្គក្នុងខេត្តស្ទឹងត្រែង និងខេត្តក្រចេះ មានការប្រែប្រួលពី -០.០២ ម៉ែត្រទៅ ០.០៥ ម៉ែត្រ។ ទោះជាយ៉ាងណាក៏ដោយ កម្រិតនៅតែខ្ពស់ជាងមធ្យមភាគរយៈពេលវែង។
VIDEO
កម្ពស់ទឹកទន្លេពីខេត្តកំពង់ចាម អ្នកលឿង ទន្លេបាសាក់នៅភ្នំពេញ និងព្រែកក្តាម បាននិងកំពុងធ្លាក់ចុះជាលំដាប់ ហើយនៅតែទាបជាងមធ្យមភាគរយៈពេលវែងចាប់តាំងពីដើមខែវិច្ឆិកា។ ចាប់តាំងពីខែមករាទឹកទន្លេនៅខ្មែរត្រូវបានមើលឃើញការធ្លាក់ចុះជាមធ្យមប្រចាំថ្ងៃ ០,២០ ម៉ែត្រ។
ទឹកកាន់តែរាក់ គឺកាន់តែថ្លា អនុញ្ញាតឱ្យរុក្ខជាតិមីក្រូទស្សន៍ ឬសារាយដុះលើដីខ្សាច់ និងបាតទន្លេដែលប្រែទៅជាគែមពណ៌បៃតង។ សារាយជាធម្មតាត្រូវបានទឹកហូរទៅឆ្ងាយពីចរន្តទឹកទន្លេ ប៉ុន្តែដោយសារតែកម្រិតទឹកទាបវាបានកកកុញនៅផ្នែកខ្លះនៃទន្លេ។ នេះជាការលើកឡើងរបស់លោក Dr So Nam ប្រធានផ្នែកគ្រប់គ្រងបរិស្ថានរបស់លេខាធិការដ្ឋាន MRC ។
លោកបណ្ឌិតសូ បានបន្តថា «ដូចគ្នានឹងស្ថានភាពក្នុងឆ្នាំ ២០១៩ ដែរ បាតុភូតទឹកបៃតងខៀវនាពេលបច្ចុប្បន្នទំនងជារីករាលដាលដល់ទន្លេមេគង្គដទៃទៀតដែលមានលំហូរទឹកទាប» ៕
ចែករំលែកព័តមាននេះ