រាជធានីភ្នំពេញ ៖ ព្រៃ ស្មៅ និងកូនខ្ទម ព្រមទាំងសម្ភារៈអេតចាយ របស់ជនអនាថានៅក្នុងដៅឡូតិ៍ របស់លោកឧកញ៉ាអូស្មានហាស្សាន់ ត្រូវបានអគ្គីភ័យឆាបឆេះផ្សែងហុយខ្មួលខ្មាញ់ បង្កអោយមានការភ្ញាក់ផ្អើលដល់អាជ្ញាធរ…
រាជធានីភ្នំពេញ ៖ ព្រៃ ស្មៅ និងកូនខ្ទម ព្រមទាំងសម្ភារៈអេតចាយ របស់ជនអនាថានៅក្នុងដៅឡូតិ៍ របស់លោកឧកញ៉ាអូស្មានហាស្សាន់ ត្រូវបានអគ្គីភ័យឆាបឆេះផ្សែងហុយខ្មួលខ្មាញ់ បង្កអោយមានការភ្ញាក់ផ្អើលដល់អាជ្ញាធរ និងសមត្ថកិច្ច ហៅរថយន្តពន្លត់អគ្គីភ័យ ទៅអន្តរាគមន៍បាញ់ពន្លត់ ។
ហេតុការណ៍នេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ១២ថ្ងៃត្រង់ ទី១៥ ខែកុម្ភៈ ឆ្នាំ២០២១ នៅក្នុងដីឡូតិ៍ទុកចោល កណ្តាលរាជធានីភ្នំពេញ ដែលស្ថិតនៅ ក្នុងសង្កាត់ផ្សារដេប៉ូទី៣ ខណ្ឌទួលគោក ។
តាមព័ត៌មានបានអោយដឹងថា នៅមុនពេលកើតហេតុ គេឃើញភ្លើងបានឆេះព្រៃយ៉ាងសន្ធោសន្ធៅ ផ្សែងហុយទ្រលោម បង្កអោយមានការភ្ញាក់ផ្អើលដល់សមត្ថកិច្ច និងអាជ្ញាធរ មូលដ្ឋានចុះទៅកន្លែងកើតហេតុ ហើយទាក់ទងហៅរថយន្តពន្លត់អគ្គីភ័យទៅជួយអន្តរាគមន៍បាញ់ពន្លត់ ។ ខណៈនោះ ដែលគេឃើញលោក ឯក ឃុនដឿន អភិបាលខណ្ឌ ទួលគោក ព្រមទាំងលោកចៅសង្កាត់ផ្សារដេប៉ូ៣ ក៏បានចុះទៅកន្លែងកើតហេតុ ផងដែរ ។
ទាក់ទិនការកើតមានអគ្គីភ័យនេះ គេពុំដឹងពីមូលហេតុអ្វីពិតប្រាកដឡើយ ។ បើតាម នគរបាលមានការសង្ស័យថា បណ្តាលមកពីក្រុមជនអានាថាប្រើប្រាស់គ្រឿងញៀនដែលវាយទំលុះរបងចូលស្នាក់នៅដុតខ្សែភ្លើងយកស្ពាន់ហើយ ឆេះរាលដាល់តែម្តង ។
តាមស្ត្រីម្នាក់ដែលជាជនអនាថា រស់នៅក្បែររបងនោះបានអោយដឹងថា អគ្គីភ័យនេះបណ្តាលមកពីយុវជនញៀនថ្នាំ តែគាត់ពុំដឹងថា ជននោះដុត ឬក៏ដុតខ្សែភ្លើងយកស្ពាន់នោះទេ?។
ចំណែកកូនចៅ លោកឧកញ៉ា អូស្មានហាស្សាន់ បានអោយដឹងថា កន្លងមកអោយតែដេញក្រុមយុវជនអានាថានោះ ចេញក្នុងដីឡូតិ៍ ត្រូវបានជននោះដុត បណ្តាលអោយឆេះព្រៃជាច្រើនលើកមកហើយ ។
តាមនគរបាលការិយាល័យបង្ការពន្លត់អគ្គីភ័យ និងសង្គ្រោះបានអោយដឹងថា នៅក្នុងហេតុការណ៍នេះ រថយន្តពន្លត់អគ្គីភ័យបានទៅអន្តរាគមន៍ចំនួន៣គ្រឿង បានបាញ់ពន្លត់អស់៦រថយន្ត ទើបភ្លើងបានរលត់នៅវេលាម៉ោងប្រមាណ ១រសៀល ។
តាមនគរបាលមូលដ្ឋាន បានអោយដឹងថា ផ្ទះខ្ទម ដែលជាជំរករបស់ជនអនាថា រួមទាំងសម្ភារៈអេតចាយ ដែលគរនៅគៀនរបងត្រូវភ្លើងឆេះ ហើយរាលដាល់ទៅដល់ព្រៃ និងស្មៅងាប់នៅក្នុងដីឡូតិ៍ ពុំបណ្តាលអោយឆេះរាលដាល់ដល់លំនៅឋានឡើយ ។
តាមអាជ្ញាធរ បានអោយដឹងថា ព្រៃនៅក្នុងដីឡូតិ៍ ទុកចោលនោះត្រូវបានអគ្គីភ័យឆាបឆេះ ជាច្រើនលើកមកហើយ ។ លោកចៅសង្កាត់បានណែនាំដល់បុគ្គលិកក៏ដូចជាកូន លោកឧកញ៉ា អូស្មាន់ហាស្សាន់ មេត្តាឈូសឆាយព្រៃនោះចោល ចៀងវាងបង្កអោយកើតមានអគ្គីភ័យទៀត ៕
ចែករំលែកព័តមាននេះ