ខេត្តបាត់ដំបង ៖ ជនដៃឆើតម្នាក់ត្រូវបានកម្លាំងសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី១៤ កុម្ភៈ ក្រោយពីត្រូវសមត្ថកិច្ចឃាត់ខ្លួនពីបទ«លួច»ដែលប្រព្រឹត្ត កាលពីចុងខែមករាកន្លងទៅនេះ ស្ថិតនៅចំណុចភូមិអញ្ជាញ សង្កាត់អូរចា ក្រុងបាត់ដំបង…
ខេត្តបាត់ដំបង ៖ ជនដៃឆើតម្នាក់ត្រូវបានកម្លាំងសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី១៤ កុម្ភៈ ក្រោយពីត្រូវសមត្ថកិច្ចឃាត់ខ្លួនពីបទ«លួច»ដែលប្រព្រឹត្ត កាលពីចុងខែមករាកន្លងទៅនេះ ស្ថិតនៅចំណុចភូមិអញ្ជាញ សង្កាត់អូរចា ក្រុងបាត់ដំបង ។
លោកឈឿង គឹមសុង ប្រធានការិយាល័យព្រហ្មទណ្ឌកំរិតស្រាលបានឲ្យដឹងថា ជនសង្ស័យរូបនេះឈ្មោះ កែវ លីដា ប្រុសអាយុ៣១ឆ្នាំ មានស្រុកកំណើត នៅភូមិ៣ សង្កាត់៣ ក្រុង , ខេត្តព្រះស៊ីហនុ តែបានមកស្នាក់នៅបណ្ដោះអាសន្ននៅផ្ទះជនរងគ្រោះឈ្មោះ ម៉ី អ៊ូជី ភេទប្រុស អាយុ២៦ឆ្នាំ នៅភូមិអញ្ចាញ សង្កាត់អូរចា ក្រុងបាត់ដំបង។ លោក បានប្រាប់ថា ជនសង្ស័យ ត្រូវកម្លាំងបង្ការបង្ក្រាបរបស់លោកឃាត់ខ្លួនកាលពីថ្ងៃទី១២ កុម្ភៈ។
លោក គឹមសុង បានបញ្ជាក់ថា ជននេះត្រូវបានជនរងគ្រោះឈ្មោះ ម៉ី អ៊ូជី ដែលមានមុខរបរលក់ទូរស័ព្ទ បានប្ដឹងចោទប្រកាន់ថា បានលួចយកទ្រព្យសម្បត្តិរបស់ខ្លួនអស់ជាច្រើន កាលពីយប់ថ្ងៃទី២៨ កមរា កន្លងទៅថ្មីៗនេះ ខណៈដែលខ្លួនបានហៅជនសង្ស័យរូបនេះមកស្នាក់នៅជាមួយបណ្ដោះអាសន្ន។ ក្រោយពីទទូលបណ្ដឹងជនរងគ្រោះ ទើបលោកស្នងការខេត្តបញ្ជាឲ្យលោកដឹកនាំកម្លាំងធ្វើការស្រាវជ្រាវរហូតឃាត់ខ្លួនជនដៃដល់រូបនេះបានតែម្ដង។
ជនរងគ្រោះឈ្មោះ ម៉ី អ៊ូជី បានប្រាប់សមត្ថកិច្ចថា ខ្លួនទើបស្គាល់ជិតស្និតជាមួយជនសង្ស័យតាមរយៈ «ហ្វែសប៊ុក» តែប៉ុន្មានថ្ងៃប៉ុណ្ណោះ ក៏ហៅជននេះមកលែងផ្ទះ និង ដេកស្នាក់ជាមួយគ្នា។ ប៉ុន្តែជនរងគ្រោះបានបញ្ជាក់ថា នៅយប់កើតហេតុ នៅពេលខ្លួនដេកលក់ ស្រាប់តែជនខ្ចាត់ព្រាត់រូបនេះ ឆក់ឱកាសងើបទៅលួចទ្រព្យសម្បត្តិរបស់ខ្លួនអស់ពីក្នុងផ្ទះ ដែលសកម្មភាពជនដៃដល់បានជាប់យ៉ាងច្បាស់នៅក្នុងកាមេរ៉ាសុវត្ថិភាព ដែលខ្លួនបំពាក់នៅក្នុងផ្ទះទៀតផង។
នៅក្នុងកាមេរ៉ាសុវត្ថិភាព គេឃើញជនដៃដល់រូបនេះ បានដើរចូលទៅលួចយកអីវ៉ាន់របស់ជនរងគ្រោះដែលទុកនៅក្នុងទូ។ ជននេះបានរើកកាយប្រមូលយកគ្មានសល់ រួចច្រកនៅក្នុងថង់ និង ដើរចេញទៅខាងមុខបានភ្លាមៗដែរ តែតាមរយៈ នៃសកម្មភាពនោះ គេមិនបានដឹងថា ជនដៃដល់បានលួចអ្វីខ្លះទេ។
ប៉ុន្តែបើតាមបណ្ដឹងជនរងគ្រោះ បានរាយការណ៍ប្រាប់សមត្ថកិច្ចថា ទ្រព្យសម្បត្តិដែលបាត់បង់រួមមាន ទូរស័ព្ទដៃម៉ាក VIVO ចំនួន១០គ្រឿង ម៉ាកOPPO ចំនួន១៥គ្រឿង ម៉ាក Realme ចំនួន០៤គ្រឿង ម៉ាក Samsungចំនួន០៣គ្រឿង Ipadចំនួន០១គ្រឿង លុយចំនួន៣លានរៀល និង សម្ភារមួយចំនួនទៀត។
លោក ឈឿង គឹមសុង បានប្រាប់ថា ក្រោយធ្វើសកម្មភាព ជននេះបានព្យាយាមគេចខ្លួន តែក្រោយជនរងគ្រោះដាក់ពាក្យបណ្ដឹង ទើបកម្លាំងរបស់លោកដែលទទួលបទបញ្ជាផ្ទាល់ពីលោកស្នងការខេត្ត ធ្វើការស្រាវជ្រាវរហូតឈានដល់ការឃាត់ខ្លួនបានតែម្ដង។
ជាមួយនឹងការឃាត់ខ្លួន កម្លាំងជំនាញ ដកហូតម៉ូតូ០១គ្រឿង ម៉ាក គីវ៉ា ០១គ្រឿង ស្លាកលេខភ្នំពេញ 1CL-8793 ទូរស័ព្ទម៉ាក Iphone ០១គ្រឿង ចិញ្ចៀនដាំត្បូង០៣វង់ និងនាឡិកាចំនួន០២គ្រឿង។ ពេលនេះ កម្លាំងជំនាញ បានកសាងសំណុំរឿងបញ្ជូនជនដៃដល់រូបនេះទៅកាន់សាលាដំបូងខេត្តហើយ ៕
ចែករំលែកព័តមាននេះ