រាជធានីភ្នំពេញ ៖ រដ្ឋបាលខេត្តបន្ទាយមានជ័យបានបញ្ជាក់ពីមូលដែល ពលករខ្មែរមកពីប្រទេសថៃបានស្លាប់ ។ យោងតាមសេចក្តីជូនដំណឹងរដ្ឋបាលខេត្តបន្ទាយមានជ័យ នៅថ្ងៃទី១៣ កុម្ភៈ ឆ្នាំ២០២១ បានឲ្យដឹងថា…
រាជធានីភ្នំពេញ ៖ រដ្ឋបាលខេត្តបន្ទាយមានជ័យបានបញ្ជាក់ពីមូលដែល ពលករខ្មែរមកពីប្រទេសថៃបានស្លាប់ ។
យោងតាមសេចក្តីជូនដំណឹងរដ្ឋបាលខេត្តបន្ទាយមានជ័យ នៅថ្ងៃទី១៣ កុម្ភៈ ឆ្នាំ២០២១ បានឲ្យដឹងថា ដល់សាធារណជនឲ្យបានជ្រាបថា នៅថ្ងៃទី១២ ខែកុម្ភៈ ឆ្នាំ២០២១វេលាម៉ោង១៨:០០នាទី មានករណីស្លាប់ជាអ្នកជំងឺដែលបានវិលត្រឡប់ពីប្រទេសថៃ ភេទប្រុស អាយុ៣៨ឆ្នាំ មានទីលំនៅភូមិតាមាយវប្បធម៌ ឃុំគោកឃ្មុំ ស្រុកថ្មគោល ខេត្តបាត់ដំបង មូលហេតុនៃការនៃការស្លាប់ គឺជំងឺមហារីកថ្លើមដំណាក់កាលចុងក្រោយ និងរាលដាលទៅឆ្អឹង និងសួត (Hepatocelular Carcinoma with Bone Lung Peritoneal Metastasis) ។
រដ្ឋបាលខេត្តបន្ទាយមានជ័យបញ្ជាក់ថា« អ្នកជំងឺខាងលើនេះ បានមកដល់ប្រទេសកម្ពុជា តាមច្រកអូរបីជាន់ នៅថ្ងៃទី១២ ខែកុម្ភៈ ឆ្នាំ២០២១ វេលាម៉ោង ប្រមាណ១៤:០០ នាទី ដោយមានអាការៈ ហត់ និងពិបាកដកដង្ហើម មានស្បែកឡើងលឿងខ្លាំង ហើយបន្ទាប់មក ត្រូវបានបញ្ជូនមកកាន់មន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ដោយរថយន្តសង្គ្រោះបន្ទាន់របស់មន្ទីរពេទ្យ បង្អែកអូរជ្រៅ» ។
ប្រភពបន្តថា នៅពេលដែលអ្នកជំងឺមកដល់មន្ទីរពេទ្យខេត្ត គឺមានសភាពធ្ងន់ធ្ងរ(Critical Carton), សន្លប់បាត់បង់ ស្មារតី(Cora) , ស្បែកឡើងលឿងខ្លាំង(Jaunda)ភ្លាមៗនោះក្រុមគ្រូពេទ្យបានធ្វើការជួយសង្គ្រោះជាបន្ទាន់ ដោយផ្តល់អុកស៊ីសែនជំនួយផ្លូវដង្ហើម ម៉ាស្សាបេះដូង ទៅតាមលក្ខណៈបច្ចេកទេស ដោយយក៏ចិត្តទុកដាក់ បំផុត ។
ដោយសភាពរបស់អ្នកជំងឺវិវត្តន៍កាន់តែធ្ងន់ធ្ងរទៅជាលំដាប់ ទោះជាក្រុមគ្រូពេទ្យរបស់យើង ខិតខំសង្គ្រោះ យ៉ាងណាក៏ដោយ ក៏នៅតែមិនអាចជួយសង្គ្រោះ គាត់បានឡើយ ហើយក៏បានទទួលមរណភាព នៅថ្ងៃទី១២ ខែកុម្ភៈ ឆ្នាំ២០២១ វេលាម៉ោង១៨ : ០០ នាទី ដោយមូលហេតុ ជំងឺមហារីកថ្លើមដំណាក់កាលចុងក្រោយ និងរាលដាលទៅឆ្អឹង និងសួត (Hepatocelular Carcinoma with Bone Lung Peritoneal Metastasis)។
អ្នកជំងឺ(សព) ប្រពន្ធ និងកូនស្រី រួមទាំងម្តាយអ្នកជំងឺ ត្រូវបានយកសំណាកដើម្បីវិភាគរកវីរុសកូវីដី១៩ នៅថ្ងៃខែឆ្នាំដដែល តែលទ្ធផលមិនទាន់ទទួលបានពីវិទ្យាស្ថានប៉ាស្ទ័រកម្ពុជានៅឡើយទេ ។ ប្រភពបន្តថា តាមការសាកសួរប្រវត្តិអ្នកជំងឺពីក្រុមគ្រួសារបានបញ្ជាក់ថា អ្នកជំងឺ និងក្រុមគ្រួសារបានទៅរស់នៅ និងធ្វើការនៅប្រទេសថៃ (ទីក្រុងបាងកក) រយៈពេល២ឆ្នាំ ។ បន្ទាប់មកបានធ្លាក់ខ្លួនឈឺ ហើយបានទទួលការពិនិត្យ ព្យាបាលជំងឺនៅប្រទេសថៃរយៈពេលប្រហែល២ខែមកហើយ មុនធ្វើដំណើរត្រឡប់មកស្រុកកំណើតវិញ(គ្រូពេទ្យ នៅប្រទេសថៃអស់លទ្ធភាពក្នុងការព្យាបាល ហើយបានប្រាប់អ្នកជំងឺអោយត្រឡប់មកផ្ទះវិញ)។
យោងតាម ការពិនិត្យលើសំណុំឯកសារនៃការព្យាបាលនៅប្រទេសថៃដែលជាប់មកជាមួយអ្នកជំងឺបានឃើញថា គាត់មាន បញ្ហាសុខភាពដូចជារជំងឺមហារីកថ្លើមដំណាក់កាលចុងក្រោយ និងរាលដាលទៅឆ្អឹងនិងសួត (Hepatocellular Carcinoma with Bone Lung Peritoneal Metastasis)។
អ្នកជំងឺស្លាប់បណ្តាលមកពីជំងឺផ្ទាល់ខ្លួនរ៉ាំរៃ និងធ្ងន់ធ្ងរ ដែលក្រុមគ្រូពេទ្យប្រឹងប្រែង ព្យាបាល និងសង្គ្រោះតាមលក្ខណៈបច្ចេកទេស តែនៅមិនអាចជួយស្រោចស្រង់អាយុជីវិត ។
រដ្ឋបាលខេត្ត សូមបញ្ជាក់ជូនផងដែរថា ជាបុរសដែលទទួលមរណភាពខាងលើ មិនមែនស្លាប់ ដោយសារជំងឺកូវីដ១៩ទេ ។ រដ្ឋបាលខេត្ត សូមសម្តែងនូវការសោកស្តាយ និងចូលរួមរំលែកទុក្ខដ៏ក្រៀមក្រំជាមួយក្រុមគ្រួសារសពផងដែរ ៕
ចែករំលែកព័តមាននេះ