មិត្តល្អនាំសំណាង មិត្តអាក្រក់នាំស៊យ
- ភ្នំពេញ
ភាគទី ៣ រាជធានីភ្នំពេញ ៖ ខ្ញុំ វេជ្ជបណ្ឌិត ងួន សេរ័ត្ន រៀបរាប់ហើយវគ្គទី ១…
ភាគទី ៣ រាជធានីភ្នំពេញ ៖ ខ្ញុំ វេជ្ជបណ្ឌិត ងួន សេរ័ត្ន រៀបរាប់ហើយវគ្គទី ១…
ភាគទី ៣
រាជធានីភ្នំពេញ ៖ ខ្ញុំ វេជ្ជបណ្ឌិត ងួន សេរ័ត្ន រៀបរាប់ហើយវគ្គទី ១ ស្តីពីសារសំខាន់នៃការបង្កើតក្តីស្រមៃរបស់ខ្លួន និងមូលហេតុដែលឈានដល់ការសម្រេចចិត្តដំណើរការគម្រោង «តើលុយ ១០០ដុល្លារកែប្រែជីវិតខ្ញុំរបៀបណា ?» ដែលបង្កើតចេញជាវេបសាយសុខភាព health.com.kh សម្រាប់ផ្តល់ព័ត៌មានសុខភាពដល់ប្រជាជនម្ពុជា ។
ក្នុងការសម្រេចចិត្តធ្វើអ្វីមួយការលើកទឹកចិត្តពីមនុស្សនៅជិតខាង គឺមានសារសំខាន់ណាស់ដែលនឹងជំរុញយើងអាចសម្រេចក្តីស្រមៃ ។ ខ្ញុំសំណាងមានមិត្តភក្តិល្អដែលរៀនពេទ្យជាមួយគ្នាដូចជា ៖ លោក សាស្ត្រាចារ្យ ស៊ីក ធីរះ ជំនាញឯកទេសឆ្អឹងមកពីប្រទេសកូរ៉េខាងត្បូង ដែលបច្ចុប្បន្នជាស្ថាបនិកនៃគ្លីនិកឯកទេសឆ្អឹង Dr.Sik សំណង់ ១២ ដ៏ល្បីល្បាញនៅកម្ពុជា និងលោកសាស្ត្រាចារ្យ លឹម វណ្ណនិត ឯកទេសជំងឺកុមារ ដែលបច្ចុប្បន្នជាស្ថាបនិកគ្លីនិកកុមារ វណ្ណនិត លោកវេជ្ជបណ្ឌិត ង៉ូវ បូរ៉ា និងលោក វេជ្ជបណ្ឌិត ម៉ែន បញ្ញារតន៍ ។ ខ្ញុំបានជួបពួកគេពន្យល់ពីគម្រោងនេះ ។ ខ្ញុំនៅតែអរគុណពួកគេដែលបានគាំទ្រដល់ការបង្កើត វេបសាយសុខភាព health.com.kh ដើម្បីជាប្រភពព័ត៌មានសុខភាពបម្រើដល់ផលប្រយោជន៍ប្រជាជនកម្ពុជា ។
ដូច្នេះហើយខ្ញុំចាត់ទុកពួកគេថា ជាស្ថាបនិកនៅក្នុងការបង្កើតវេបសាយមួយនេះ ។ ការគាំទ្ររបស់ពួកគេបានក្លាយជាកម្លាំងចិត្តដ៏រឹងមាំបន្ថែមទៀតសម្រាប់រូបខ្ញុំនៅក្នុងការសម្រេចក្តីស្រមៃរបស់ខ្លួន គឺការបង្កើតវេបសាយសុខភាពក្នុងគោលបំណងធំពីរគឺរកចំណូលចិញ្ជឹមខ្លួនផង និងដើម្បីជួយដល់សុខភាពប្រជាជនផង ។
បន្ទាប់ពីពិភាក្សាជាមួយពួកគេ ហើយខ្ញុំក៏សម្រេចចិត្តថា ធ្វើវាអោយទៅជាគម្រោងដែលមានផែនការច្បាស់លាស់ដើម្បីកំណត់ផែនទីបង្ហាញផ្លូវថា តើគម្រោងនេះនឹងធ្វើដំណើរទៅថ្ងៃមុខរបៀបណា ។ តើគួរធ្វើដូចម្តេចដើម្បីទាក់ទាញអ្នកអាន តើគូររកចំណូលពីណាដើម្បីទ្រទ្រង់អោយវេបសាយនេះ ដំណើរជាប់រហូត ?
តើលោកអ្នកទទួលបានអ្វីពីបទពិសោធន៍ជាក់ស្តែងមួយនេះរបស់ខ្ញុំ ?
ខ្ញុំយល់ថា ការមានមនុស្សល្អនៅជុំវិញខ្លួននឹងនាំភាពចម្រុងចម្រើន ។ ការមានមនុស្ស អាក្រក់ និងអវិជ្ជមានជុំវិញខ្លួននឹងនាំអោយអ្នកងងឹតងងុលរកពន្លឹនៃជីវិតមិនឃើញឡើយ ។ និយាយអោយសាមញ្ញជាងនេះ មានមិត្តល្អនឹងនាំលាភ មានមិត្តអាក្រក់នឹងនាំស៊យ ។
ចូរយើងទាំងអស់គ្នាចងចាំថា មិត្តភាពដ៏ល្អប្រសើរនឹងនាំដល់ភាពជាដៃគូរកស៊ីដ៏អស្ចារ្យ ។ យោងតាមសៀវភៅដែលមានចំណងជើងថា «មិត្តរបស់មិត្ត» ឬជាភាសាអង់គ្លេសមានចំណងជើង “Friend of a Friend” ដែលសរសេរដោយ David Burkus នោះ មិត្តភាពនិងការរកស៊ីគឺមានទំនាក់ទំនងគ្នា និងរត់រកគ្នាទៅវិញទៅមក ។ ពេលខ្លះការរកស៊ីបង្កើតចេញជាមិត្តភាព ហើយពេលខ្លះមិត្តភាពក៏អាចបង្កើតការរកស៊ី ។
ដូច្នេះ យើងគួរតែបង្កើត និងថ្នាក់ថ្នមមិត្តភាពរបស់យើងអោយបានល្អបំផុតតាមដែលអាចធ្វើទៅបាន ។ ពេលមានមិត្តល្អ ចូរកុំអោយបាត់បង់។ ប៉ុន្តែបើមិនទាន់មានមិត្តល្អទេ អ្នកគួរតែរកវិធីបង្កើតមិត្តល្អអោយបាន ។ ចំណែកមិត្តអាក្រក់អ្នកគួរតែជម្រុះចេញពីជីវិត ។
សូមរង់ចាំតាមដានបន្តទៀតអំពីការរៀបចំផែនការអនុវតត្តគម្រោង «លុយ ១០០ដុល្លារកែប្រែជីវិតខ្ញុំរបៀបណា ?»
ចំណែកប្រិយមិត្តដែលចង់ចែករំលែកបទពិសោធន៍ទាក់ទងនឹងការរកលុយដល់មហាជនក៏អាចទាក់ទងគម្រោង «លុយ» របស់សារព័ត៌មាន កោះសន្តិភាព ផងដែរ ។ យើងរីករាយនឹងធ្វើការផ្សព្វផ្សាយជូន ដើម្បីជាការចែករំលែកចំណេះដឹងជាក់ស្តែងពិតៗទាក់ទងនឹងការរកលុយ ការសន្សំលុយ និងការគ្រប់គ្រងលុយ ។ ក្នុងករណីដែលោកអ្នកមានការលំបាកនៅក្នុងការសរសេរចេញគំនិតទាំងអស់នោះ ក្រុមនិពន្ឋគម្រោង លុយ របស់កោះសន្តិភាព នឹងជួយជ្រោមជ្រែងអោយអស់ពីសមត្ថភាព ៕
ចែករំលែកព័តមាននេះ