ខេត្តស្ទឹងត្រែង ៖ ស្ត្រីម្នាក់ត្រូវប្តីជាមន្ត្រីយោធាដកកាំភ្លើងម៉ាកAK47វាយឱ្យដួលរួចបា.ញ់មួយគ្រាប់ពីឆ្អឹងដងកាំបិតខាងស្តាំធ្លាយមកក្រោមគល់សុដន់បណ្តាលឱ្យរបួសធ្ងន់។
ខេត្តស្ទឹងត្រែង ៖ ស្ត្រីម្នាក់ត្រូវប្តីជាមន្ត្រីយោធាដកកាំភ្លើងម៉ាកAK47វាយឱ្យដួលរួចបាញ់មួយគ្រាប់ពីឆ្អឹងដងកាំបិតខាងស្តាំធ្លាយមកក្រោមគល់សុដន់បណ្តាលឱ្យរបួសធ្ងន់។ ក្រោយប្រើហិង្សា និងបាញ់ប្រពន្ធរួចជនសង្ស័យជាប្តីបានរត់គេចខ្លួនបាត់ចោលប្រពន្ធ និងបន្សល់ទុកកាំភ្លើងក្បែរកន្លែងកើតហេតុ។
ហេតុការណ៍នេះបានកើតឡើងកាលពីវេលាម៉ោង៧ និង៤០នាទីយប់ ថ្ងៃទី១០ សីហា ២០១៥ នៅភូមិសំរោង ឃុំស្រែសំបូរ ស្រុកសៀមប៉ាង ។
បើតាមប្រភពព័ត៌មានពីអ្នកភូមិក្បែរកន្លែងកើតហេតុបាននិយាយថា ជនសង្ស័យជាប្តីជាមន្ត្រីយោធា តែមានចរិតស្លូតបូត ហើយការដែលកើតឲ្យមានអំពើហិង្សានេះឡើងដោយសារបុរសជាប្តីនោះបានហាមឃាត់ និងណែនាំប្រពន្ធរបស់ខ្លួនកុំឱ្យដើរផឹកស៊ីបាត់ៗពីផ្ទះរាល់ថ្ងៃពេក តែនាងជាប្រពន្ធនោះមិនស្តាប់នៅតែដើរបាត់ពីផ្ទះរាល់ថ្ងៃ។
អធិការនគរបាលស្រុកសៀមប៉ាង លោក វ៉ា សុផាន់ បានបញ្ជាក់ប្រាប់ថា ស្ត្រីរងគ្រោះមានឈ្មោះ នឹក ចាន់ណៃ អាយុ៣៧ឆ្នាំ មុខរបរលក់ដូរ ចំណែកជនសង្ស័យជាប្តីមានឈ្មោះ នូវ សារិទ្ធ អាយុ៤១ឆ្នាំ ។ គ្រួសារនេះមានកូនចំនួន២នាក់ រស់នៅភូមិសំរោង ឃុំស្រែសំបូរ ស្រុកសៀមប៉ាង ។
នាយការរិយាល័យព្រហ្មទណ្ឌកម្រិតធ្ងន់លោក ឌួង ស៊ីវុត្ថា បានប្រាប់ឲ្យដឹងថា ករណីខាងលើនេះជាករណីប៉ុនប៉ងឃាតកម្ម ។ លោកនាយការិយាល័យបន្តថា ប្តីប្រពន្ធនោះតែងឈ្លោះប្រកែកគ្នាញឹកញាប់រាល់ពេលនាងជាប្រពន្ធចេញទៅក្រៅបាត់ៗ ហើយជនសង្ស័យជាប្តីប្រចណ្ឌដាក់គេដាក់ឯង។
បច្ចុប្បន្នសមត្ថកិច្ចកំពុងតាមដានស្រាវជ្រាវដើម្បីចាប់ខ្លួនជនសង្ស័យខាងលើនេះយកមកចាត់ការតាមផ្លូវច្បាប់។ ចំណែកស្ត្រីរងគ្រោះកំពុងស្ថិតក្នុងការសង្គ្រោះព្យាបាលនៅមន្ទីរពេទ្យបង្អែកខេត្តស្ទឹងត្រែង៕
ចែករំលែកព័តមាននេះ