រាជធានីភ្នំពេញ ៖ តារាសម្តែងនាង សុផា លីនដា បាននិងកំពុងត្រៀមសម្រាលកូនជាលើកដំបូងរបស់ខ្លួននាពេលខាងមុខនេះ បន្ទាប់ពីនាងបានភ្ជាប់ចំណងស្នេហ៍ជាមួយបុរសខ្មែរសញ្ញាតិអាមេរិក ហើយបានឈានដល់ពិធីភ្ជាប់ពាក្យកាលពីកន្លងទៅ ក្នុងពេលដែលអ្នកទាំងពីរនៅមិនទាន់កំណត់ពីគម្រោងចូលរោងការនៅពេលណានៅឡើយ។
ដំណឹងពីការពពោះរបស់តារាសម្តែង និងបង្ហាញម៉ូតរូបនេះ ត្រូវបាននាងទម្លាយឲ្យដឹងជាសាធារណៈតាមបណ្តាញសង្គមហ្វេសប៊ុក កាលពីថ្ងៃទី០៩ ខែកុម្ភៈ ឆ្នាំ២០២១នេះ ដែលបានធ្វើឲ្យមហាជនសម្តែងការភ្ញាក់ផ្អើលយ៉ាងខ្លាំង ដោយសារស្ងាត់ៗនាងបែរជាមានកូនជិតគ្រប់ខែទៅហើយ។
ជាមួយរូបភាពឈុតក្រហមតុបតែងជាកូនក្រមុំចិនប្រមាណជា៤សន្លឹកត្រូវបាន សុផា លីនដា បង្ហោះតាមបណ្តាញសង្គមហ្វេសប៊ុក ក្នុងនោះនាងបានបង្ហាញក្បាលពោះបញ្ជាក់ពីការពពោះជិតគ្រប់ខែ ដោយអមភ្ជាប់ជាមួយសារថា «ឆ្នាំថ្មី សមាជិកថ្មី»។
បន្ថែមពីលើអ្វីដែលនាងបានបង្ហោះខាងលើនេះ សុផា លីនដា ក៏បានអះអាងប្រាប់កោះសន្តិភាពតាមសារអេឡិចត្រូនិចដោយខ្លីថា «នាងពិតជាកំពុងពពោះកូនដំបូងប្រាកដមែន ដោយកូននៅក្នុងផ្ទៃរបស់នាងគឺជាកូនស្រី ហើយនាងបានពពោះប្រមាណជា៧ខែហើយ»។
ទោះជាយ៉ាងណា តារារូបនេះនៅមិនទាន់អាចកំណត់ពេលវេលាជាក់លាក់ណាមួយទេថា កូនស្រីដំបូងរបស់នាងនឹងចាប់កំណើតឃើញភពផែនដីនាពេលណានោះឡើយ ប៉ុន្តែនាងនិងអនាគតស្វាមីពិតជាមានចិត្តសប្បាយរីករាយយ៉ាងខ្លាំងក្នុងពេលដែលពួកនាងទទួលបានតំណក់ឈាមរួមគ្នានាពេលនេះ។
ជាការកត់សម្គាល់ បើទោះបីជា សុផា លីនដា បានប្រកាសពីការពពោះកូនដំបូងដោយមិនទាន់ចូលរោងការនាពេលនេះក៏ដោយ ប៉ុន្តែគេសង្កេតឃើញមហាជន ជាពិសេសមិត្តភក្តិក្នុងសង្គមសិល្បៈរបស់នាងជាច្រើនរូបបាននាំគ្នាសម្តែងការអបអរសាទរ និងជូនពររូបនាងកូនក្នុងផ្ទៃមានសុខភាពល្អ។
គួររំលឹកថា តារាសម្តែង និងបង្ហាញម៉ូតនាង សុផា លីនដា បានភ្ជាប់និស្ស័យស្នេហ៍ជាមួយបុរសខ្មែរសញ្ញាតិអាមេរិកឈ្មោះ កាំង ប៊ុណ្ណា ហើយបានឈានដល់ការភ្ជាប់ពាក្យកាលពីថ្ងៃទី៦ ខែកញ្ញា ឆ្នាំ២០២០ និងបានរួមរស់ក្រោមដំបូលផ្ទះតែមួយជាមួយគ្នាបានប្រមាណជា៥ខែមកហើយ។ តារារូបនេះក៏ទើបតែបានចាប់ដៃសង្សារអាណិកជនវ័យល្បាក់៣០ស្តើងខាងលើ ក្នុងការបើកភោជនីយដ្ឋានមួយក្នុងខណ្ឌចំការមន ដោយចំណាយទុនរួមគ្នារាប់ម៉ឺនដុល្លារ។
គូស្នេហ៍ សុផា លីនដា ក៏ត្រូវបានគេស្គាល់ថា ជាអ្នកជំនួញបានទៅរស់នៅ និងបន្តការសិក្សាឯរដ្ឋកាលីហ្វ័រនីញ៉ា សហរដ្ឋអាមេរិកតាំងពីកុមារភាព ហើយលោកបានត្រឡប់មកដាក់ទុនរកស៊ីនៅទឹកដីកំណើតកាលពីជាង២ឆ្នាំមុន និងមានបទពិសោធន៍លើអាជីវកម្មភោជនីយដ្ឋានក្នុងចំណោមមុខរបរជាច្រើនទៀតផងដែរ។
សុផា លីនដា ធ្លាប់បានលើកឡើងថា នាងបានចូលហ៊ុនរកស៊ីរួមគ្នា ក្រោយបានស្គាល់គ្នាជិត៩ខែតែការយល់ចិត្តគ្នាច្បាស់លាស់ និងស៊ីជម្រៅគឺទើប៣ទៅ៤ខែចុងក្រោយនេះតែប៉ុណ្ណោះ ខណៈពួកនាងក៏គ្រោងនឹងចូលរោងការក្នុងពេលឆាប់ៗនេះដែរ គឺអាចចុងឆ្នាំ២០២១ខាងមុខនេះ៕
ចែករំលែកព័តមាននេះ