សាលាបឋមសិក្សា ក្នុងឃុំឆ្នុកទ្រូ ស្រុកបរិបូរណ៌ សម្រេចបាន ៩០%ហើយ
- កំពង់ឆ្នាំង
ខេត្តកំពង់ឆ្នាំង៖ គិតមកដល់ពេលនេះ ការសាងសង់ សាលាបឋមសិក្សាយុគន្ធរ ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ត្រូវបានកសាងរួចរាល់ប្រមាណជាង ៩០ ភាគរយហើយ។…
ខេត្តកំពង់ឆ្នាំង៖ គិតមកដល់ពេលនេះ ការសាងសង់ សាលាបឋមសិក្សាយុគន្ធរ ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ត្រូវបានកសាងរួចរាល់ប្រមាណជាង ៩០ ភាគរយហើយ។…
ខេត្តកំពង់ឆ្នាំង៖ គិតមកដល់ពេលនេះ ការសាងសង់ សាលាបឋមសិក្សាយុគន្ធរ ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ត្រូវបានកសាងរួចរាល់ប្រមាណជាង ៩០ ភាគរយហើយ។ នេះជាការបញ្ជាក់របស់អាជ្ញាធរឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។
ប្រាប់ភ្នាក់ងារកាសែតកោះសន្តិភាព នៅព្រឹកថ្ងៃទី៨ ខែកុម្ភៈនេះ លោក សាំង គឹមស៊ន មេឃុំឆ្នុកទ្រូ បានរំលឹកថា ការដើមឡើយ សាលាបឋមសិក្សាយុគន្ធរ គឺជាសាលារៀន ធ្វើពីឈើបណ្ដែតលើទឹក ដែលមាន ៣ អគារ មានសិស្សរៀន ចាប់ពីថ្នាក់មតេយ្យ ដល់ថ្នាក់ទី ៥។ ប៉ុន្តែក្រោយមក នៅពេលមានការបន្លាស់ទីផ្ទះបណ្ដែតទឹករបស់ប្រជាពលរដ្ឋ សាលាយុគន្ធរ ក៏ត្រូវបានផ្លាស់មកនៅលើគោកដែរ គឺដាក់នៅជិតវត្តគន្ធរ។ ប៉ុន្តែជាចៃដន្យអាក្រក់ស្រាប់តែសាលាបឋមសិក្សាយុគន្ធរ ត្រូវបានឆេះខ្ទេចទាំងស្រុង ដោយសារតែឆ្លងចរន្តអគ្គិសនីផ្ទាំងសូឡា។
លោកមេឃុំ បន្តថា ក្រោយពេលសាលាបឋមសិក្សាបានឆេះ សិស្សគ្មានសាលារៀន សម្ដេចអគ្គមហាសេនាបតីតេជោ ហ៊ុន សែន ក៏បានជួយឧបត្ថម្ភកសាងសាលាមួយខ្នង ធ្វើអំពីបេតុង ខ្ពស់ផុតពីទឹក ដែលមាន ៦ បន្ទប់ សម្រាប់សិស្សបឋមសិក្សា ហើយបើគិតមកដល់ពេលនេះ សាលាបានរួចរាល់ជាង ៩០ ភាគរយ នៅតែការលាបថ្នាំ និងសម្ភោធដាក់ឲ្យប្រើប្រាស់ជាផ្លូវការតែប៉ុណ្ណោះ។
លោកសង្ឃឹមថា ក្រោយពេលសាលាបឋមសិក្សាយុគន្ធរ ដាក់ឲ្យប្រើប្រាស់ជាផ្លូវការ សិស្សនឹងចូលមករៀនគ្រប់ចំនួន មិនដូចជំនាន់កាលនៅលើទឹក ដែលមធ្យោបាយធ្វើដំណើររបស់ពួកគេ ដោយសារតាមទូកឬកាណូត ហើយពេលខ្លះមករៀនយឺត និងអវត្តមានទៀតផង។ ចំណែកបច្ចុប្បន្ន សិស្សបានមករស់នៅលើគោក ហើយពេលមករៀនដើរ ក៏បានដែរ ព្រោះនៅជិតនោះស្រាប់។
ជាចុងក្រោយក្នុងនាមអាជ្ញាធរឃុំឆ្នុកទ្រូ លោកសួមថ្លែងអំណរគុណដល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឧបត្ថម្ភសាលាមួយខ្នង សម្រាប់សិស្សសាលាបឋមសិក្សាយុគន្ធរនេះផងដែរ។
តាមការបញ្ជាក់របស់លោកមេឃុំឆ្នុកទ្រូ លោកនឹងប្រាប់ឱ្យលោកគ្រូ អ្នកគ្រូ ដែលកំពុងបង្រៀនសិស្សបណ្តោះអាសន្ន នៅក្នុងវត្តយុគន្ធ នាំសិស្សមកធ្វើពលកម្ម សំអាតទីធ្លាសាលាថ្មី ក្នុង ១ សប្តាហ៍ម្តង ឱ្យបានស្អាត ព្រោះជិតបានមករៀននៅសាលាថ្មីនេះហើយ៕ ដោយ៖ ពៅ សុខហ៊ាន
ចែករំលែកព័តមាននេះ