បុណ្យចូលឆ្នាំ! ការលក់ចេកពងមាន់ឡើងថ្លៃបន្តិច ចាប់ពី៤ពាន់ទៅជាង៤ពាន់រៀល
- ប៉ៃលិន
ខេត្តប៉ៃលិន ៖ រហូតមកដល់ថ្ងៃទី០៧ ខែកុម្ភៈ ឆ្នាំ២០២១ គេសង្កេតឃើញប្រជាកសិករម្នាក់ ឈ្មោះ ហ៊ឹម នេត្រា ហៅពេទ្យ…
ខេត្តប៉ៃលិន ៖ រហូតមកដល់ថ្ងៃទី០៧ ខែកុម្ភៈ ឆ្នាំ២០២១ គេសង្កេតឃើញប្រជាកសិករម្នាក់ ឈ្មោះ ហ៊ឹម នេត្រា ហៅពេទ្យ អាយុ៥៨ឆ្នាំ រស់នៅភូមិថ្នល់ទទឹង ឃុំអូរអណ្តូង ស្រុកសាលាក្រៅ ខេត្តប៉ៃលិន បានប្រកបមុខរបរដាំដើមចេកពងមាន់ចំនួន១៣ហិកតា តាំងពីឆ្នាំ២០១៨ រហូតមកដល់បច្ចុប្បន្ននេះ គាត់បានទទួលផលកាត់លក់ជារៀងរាល់១អាទិត្យម្តង ហើយបានប្រាក់សម្រាប់ផ្គត់ផ្គង់ជីវភាពប្រចាំថ្ងៃផងដែរ ។
តាមប្រភពព័ត៌មានពីម្ចាស់ចម្ការខាងលើ បានរៀបរាប់ឱ្យដឹងថា ៖ ការដាំចេកពងមាន់នៅក្នុងចំការរបស់ខ្លួនដែលមានទំហំប្រមាណ១៣ហិកតានេះ គឺមានគម្លាតពីគ្នាប្រវែង៣ម៉ែត្របួនជ្រុង ដាំចំនួន៨គុម្ព ហើយផ្ទៃដីចំនួន១៣ហិកតា ហើយគាត់ដាំបានសរុបចំនួន២៩០០០គុម្ព ។
លោកបន្តទៀតថា ការដាំចេកពងមាន់នេះ គឺសុំពូជពីគេ ដោយដំបូងមានត្រឹមតែ៤គុម្ពប៉ុណ្ណោះ លុះក្រោយមកក៏ចេះតែពង្រីកបន្ថែម រហូតដល់អាចដាំបានច្រើនគុម្ពតែម្តង ។ ចំពោះការប្រមូលផលផ្លែចេកនេះវិញ គឺគាត់លក់១គីឡូក្រាមតម្លៃចាប់៣០០០រៀល ទៅ៣៥០០រៀល តែបើនៅរដូវបុណ្យទានវិញ ដូចជាចូលឆ្នាំចិនជាដើម ការលក់ដូររបស់គាត់ឡើងថ្លៃបន្តិច ដោយ១គីឡូក្រាម ចាប់ពី៤០០០រៀលទៅ៤៥០០រៀល ។
ម្យ៉ាងវិញទៀត ការប្រមូលផលចេកពងមាន់នេះ សរុបក្នុង១ខែ គឺអាចកាត់យកទៅលក់ដូរប្រហែល៨ទៅ៩តោន ដោយគាត់ដឹកទៅខ្លួនឯង យកទៅលក់ដូរនៅតូប ដែលជួលនៅក្នុងផ្សារប៉ុមពុយ ខេត្តបាត់ដំបង ។
ចំណែកការលក់ដូរចេកនៅក្នុងខេត្តប៉ៃលិនវិញ អត់សូវមានទីផ្សារនោះទេ ព្រោះប្រជាពលរដ្ឋទទួលទិញត្រឹមតែ២០០ ទៅ៣០០គីឡូក្រាមប៉ុណ្ណោះ ក្នុង១ខែប៉ុណ្ណោះ ។ ដូច្នេះ ដោយសារតែចេករបស់ខ្លួនមានច្រើន ទើបសុខចិត្តកាត់ដឹកយកទៅលក់ដូរនៅខេត្តបាត់ដំបងវិញ។
លោកបញ្ជាក់ទៀតថា មិនត្រឹមតែប៉ុណ្ណោះ ចេករបស់គាត់ក៏មានជនជាតិថៃ ចូលមកកុម្មង់ទិញ វេចខ្ចប់ ដោយយកទៅលក់បន្តនៅប្រទេសចិន លុះជាប់គាំងនឹងបញ្ហាវិបត្តិកូវីដ១៩ ក៏ផ្អាក ដោយមានតែទីផ្សារខ្មែរប៉ុណ្ណោះ ។ ចេករបស់គាត់ មានការខ្ចប់ច្រកថង់ទាំងស្ទងតាំងពីចេកនៅខ្ចី ដើម្បីឱ្យពណ៌សម្បុរថ្លាល្អ ងាយស្រួលក្នុងការលក់ដូរ ។ លោកក៏សូមថ្លែងអំណរគុណដល់មន្ទីរកសិកម្មខេត្តប៉ៃលិន ដែលបានចំណាយពេលវេលាចុះទៅដល់ចំការផ្ទាល់ ដើម្បីជួយពន្យល់ពីរបៀបដាំ របៀបថែទាំចេកពងមាន់របស់ខ្លួនឱ្យបានល្អប្រសើរផងដែរ ។
ចំណែកលោក សាយ សុផាត ប្រធានមន្ទីរកសិកម្មខេត្តប៉ៃលិន បានបញ្ជាក់បន្ថែមដែរថា ៖ នៅទូទាំងខេត្តប៉ៃលិន មានការដាំដំណាំជារួមជាង៧០០០០ហិកតា ក្នុងនោះមានដំណាំពោតក្រហម ដំឡូងមី តាង៉ែន ហៅមៀនប៉ៃលិន ស្វាយកែវរមៀត និងដំណាំផ្សេងៗមួយចំនួនទៀត ។ តែក៏មានប្រជាកសិករដាំចេកពងមាន់ចំនួន៣កន្លែងប៉ុណ្ណោះនៅទូទាំងខេត្តប៉ៃលិននេះ ។
លោកបន្តទៀតថា ខាងមន្ទីរកសិកម្មខេត្ត ក៏មានការបង្ហាត់បង្រន ដល់កសិករឱ្យយល់ដឹងពីរបៀបថែទាំ និងនាំក្រុមហ៊ុនពីខាងក្រៅឱ្យចូលមកទាក់ទង ដើម្បីទិញចេកយកទៅលក់ដូរនៅប្រទេសថៃផងដែរ ។
ជាក់ស្តែងនៅក្នុងចំការរបស់កសិករម្នាក់ឈ្មោះ ហ៊ឹម នេត្រា ហៅពេទ្យ ដែលបានផលិតចេកពងមាន់លក់ក្នុង១អាទិត្យ ទទួលផលបានចាប់ពី១តោនទៅ១.៥តោន ដំបូងចំណាយដើមទុនដាំក្នុង១ហិកតា ប្រហែល៤០០០ដុល្លារ ដោយរហូតមកដល់ពេលនេះ គាត់អាចទទួលបានផលជាប្រាក់ចំណេញគួរឱ្យកត់សម្គាល់ ដោយគាត់អាចផលិតលក់នៅក្នុងខេត្តប៉ៃលិន និងលក់ដូររហូតដល់ខេត្តបាត់ដំបងផងដែរ ។
លោកបន្តទៀតថា ខាងមន្ទីរក៏បាននាំយកនូវថ្នាំកសិកម្មមួយចំនួន ដើម្បីឱ្យម្ចាស់ចំការបាញ់ ស្រោច ទៅលើដំណាំចេក សម្រាប់ការពារ និងកំចាត់សត្វល្អិត កុំឱ្យស៊ីបំផ្លាញផ្លែចេក ហើយគោលបំណងរបស់មន្ទីរកសិកម្ម គឺចង់ឱ្យម្ចាស់ចំការខាងលើ និង ប្រជាពលរដ្ឋពង្រីកការដាំដុះដំណាំចេកឱ្យកាន់តែច្រើន តាមស្តង់ដា ដើម្បីនាំចេញទៅលក់ដូរនៅក្រៅប្រទេសផងដែរ ៕
ចែករំលែកព័តមាននេះ