ខេត្តសៀមរាប៖ កម្លាំងកងរាជ​អាវុធហត្ថ ខេត្ត​សៀមរាប ដឹកនាំដោយលោកវរសេនីយ៍ ត្រី ធាវ ច័ន្ទតារា នាយការិយាល័យប្រឆាំងគ្រឿងញៀន នៃអាវុធហត្ថខេត្តសៀមរាប សហការជាមួយ​កម្លាំងកង​រាជអាវុធហត្ថ ខេត្តស្ទឹងត្រែង ឈានដល់​ឃាត់ខ្លួន​បានជនសង្ស័យចំនួន ៣នាក់ និងដកហូតនូវថ្នាំញៀនប្រភេទម៉ាទឹកកក ជាងមួយគីឡូក្រាម។ ក្រុមជនសង្ស័យ​ទាំងនោះ ត្រូវបាន​នាំយកមកសួរ នៅទីបញ្ជាការកងរាជអាវុធហត្ថ ខេត្តសៀមរាប ដើម្បីរៀបចំកសាងសំណុំរឿង បញ្ជូនទៅតុលាការ​ ចាត់ការបន្ត។

ប្រតិបត្តិការចុះបង្ក្រាបករណីគ្រឿងញៀននេះ ធ្វើឡើង នៅវេលាម៉ោង ០៨ និង ១៥នាទីព្រឹក​ថ្ងៃទី​០៤ ខែកុម្ភៈ ឆ្នាំ២០​២១ ស្ថិតនៅចំណុចគល់ស្ពាន​មេគង្គ ក្នុងភូមិអូរត្រែល ឃុំថាឡាបរិវ៉ាត់ ស្រុកថា​ឡាបរិវ៉ាត់ ខេត្តស្ទឹងត្រែង​។

​​លោកវរសេនីយ៍​ត្រី ធាវ ច័ន្ទតារា បានប្រាប់ថា ​ប្រតិបត្តិការបង្រ្កាប​ពីបទរក្សាទុក ជួញដូរ និងប្រើ​ប្រាស់ដោយខុសច្បាប់នូវសារធាតុញៀន​នេះ ដោយមានការសហការ​​ជាមួយកម្លាំងកងរាជអាវុធហត្ថ ខេត្តស្ទឹងត្រែង ទើបឈានដល់ធ្វើការឃាត់បានមនុស្ស ៣នាក់ រួចនាំយកមកសួរនៅទីបញ្ជាការដ្ឋានកងរាជអាវុធហត្ថខេត្តផងដែរ។

លោក​បានបន្ថែមថា ជនសង្ស័យទាំង ៣នាក់មាន៖ ១.ឈ្មោះ ឃន ធារ៉ា ភេទ ប្រុស អាយុ ៤២ ឆ្នាំ ជនជាតិ​ខ្មែរ មុខរបរកម្មករ រស់នៅភូមិអញ្ចាញ សង្កាត់នគរធំ ក្រុងសៀមរាប។ ២.ឈ្មោះ ម៉ៃ ថៃ ភេទ ប្រុស អាយុ ៣២ ឆ្នាំជនជាតិខ្មែរ មុខរបរធ្វើស្រែ រស់នៅភូមិវត្តកោះកី ឃុំកោះស្នែង ស្រុកអូស្វាយសែនជ័យ ខេត្តស្ទឹងត្រែង។ ៣.ឈ្មោះ ផិត ផៃមុន្ន ភេទប្រុស អាយុ ២១ ឆ្នាំជនជាតិខ្មែរ មុខរបរធ្វើស្រែ រស់នៅភូមិគីឡូ៨ សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។

​​លោកបញ្ជាក់ទៀតថា បន្ទាប់ពីឃាត់ខ្លួនបាន​ជនសង្ស័យទាំង ៣នាក់ រួចមក កម្លាំងយើង បាន​ឆែកឆេរ រកឃើញ​វត្ថុតាង និងដកហូតបាន​ថ្នាំញៀនម្សៅក្រាមពណ៌ស ចំនួន ៣ កញ្ចប់ធំ ទម្ងន់ ១០៨២.៧០ ក្រាម។ ទូរសព្ទដៃ ចំនួន ៣គ្រឿង។ ធ្វើតេស្ត​ទឹកនោម ទាំង៣នាក់ ដើម្បីរកសារធាតុញៀន គឺ​វិជ្ជមាន ម្នាក់ និង​អវិជ្ជមាន ២នាក់​​។

ក្រោយសាកសួរ កងរាជអាវុធហត្ថ ខេត្តសៀមរាប បានបញ្ជូនជនសង្ស័យ​ទាំង ៣នាក់ និងវត្ថុតាង ទៅតុលាការសាលាដំបូង ខេត្តសៀមរាប​៕ ដោយ៖ ច័ន្ទ រស្មី