រាជធានីភ្នំពេញ៖ ក្នុងសន្និសីទកាសែត នៅព្រលប់ថ្ងៃទី៧ ខែកុម្ភៈនេះ សម្តេចតេជោ នាយករដ្ឋមន្ត្រី ហ៊ុន សែន បានប្រកាស យល់ព្រម​ឲ្យកូនប្រុសទាំង ៣នាក់ របស់សម្តេច រួមទាំងកូនប្រសារ និងកូនអ្នកធំៗទាំងអស់​ ព្រមទាំង​រដ្ឋមន្ត្រី​អាយុក្រោម ៥៩ឆ្នាំ ត្រូវ​ចាក់​វ៉ាក់សាំង​កូវីដ១៩ របស់ចិន ស៊ីណូ ហ្វាម​ មុនគេ​។ ការធ្វើដូច្នេះ ដើម្បីបង្កើនទំនុកចិត្តដល់មហាជន​ ខណៈដែល​សម្តេច និងរដ្ឋមន្ត្រីមួយចំនួន អាយុលើសពី ៥៩ឆ្នាំ ដែលមិនអាចចាក់វ៉ាក់សាំងរបស់ចិននេះបាន។​

ក្រៅពីនេះ សម្តេចតេជោ ហ៊ុន សែន ក៏បានប្រកាស​អនុញ្ញាត​ឲ្យ​អ្នកសារព័ត៌មានទាំងអស់ ស្ថិតនៅក្នុងចំណោមអ្នកជួរមុខ ដែលត្រូវទទួលបាន​វ៉ាក់សាំង​កូវីដ១៩ លើកដំបូង នាពេលនេះ​។

សម្តេចតេជោ ហ៊ុន សែន ក៏បានប្រកាសឲ្យក្រសួងសុខាភិបាល រៀបចំ​កម្មវិធីចាក់វ៉ាក់សាង​កូវីដ១៩ របស់ចិននេះ ដោយមានការផ្សាយផ្ទាល់ នៅព្រឹកថ្ងៃទី១០ ខែកុម្ភៈ នៅមន្ទីរពេទ្យកាល់ម៉ែត្រ។

សម្តេចតេជោ ហ៊ុន សែន ក៏បានប្រកាស​ឲ្យសម្តេច ទៀ បាញ់ រៀបចំ​ឲ្យឧត្តមសេនីយ៍ អាយុ ក្រោម ៥៩ឆ្នាំ មកចាក់វ៉ាក់សាំងកូវីដ១៩ ផងដែរ​៕