ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងបញ្ជាក់ថា ការសម្រេចចិត្តលុបចោលគម្រោងចាក់វ៉ាក់សាំង សម្រាប់រូបសម្តេចផ្ទាល់ និងថ្នាក់ដឹកនាំផ្សេងទៀត អាយុលើសពី ៦០ ឆ្នាំ ដែលគ្រោងចាក់ នៅថ្ងៃទី១០កុម្ភៈ ឆ្នាំ២០២១ នៅមន្ទីរពេទ្យកាល់ម៉ែត្រនោះ មិនមែនដោយសារតែ ខ្លាចបញ្ហាប្រតិកម្ម​នោះទេ​។

ថ្លែងនៅក្នុងសន្និសីទ​សារព័ត៌មាន នាឱកាសសម្តេចអញ្ជើញទទួលវ៉ាក់សាំង​ការពារកូវីដ១៩ ដែលជាជំនួយរបស់រដ្ឋាភិបាលចិន នៅអាកាសយានដ្ឋាន​អន្តរជាតិភ្នំពេញ នារសៀលថ្ងៃទី​៧ ខែកុម្ភៈថា ជំនួយវ៉ាក់សាំងជំហានដំបូង ចំនួន ៦០ម៉ឺនដូស នៃវ៉ាក់សាំង Sinopharm របស់ចិន គឺកើតឡើងបានដោយសារចំណង​មិត្តភាពដ៏រឹងមាំរបស់កម្ពុជា ជាមួយនឹងមិត្តចិន។

សម្តេចតេជោ បានបញ្ជាក់ថា បើយើងគ្មានកិច្ចសហប្រតិបត្តិការល្អជាមួយនឹងចិន យើងនឹងមិនអាចបានទទួលវ៉ាក់សាំងពីចិន នាថ្ងៃនេះទេ​។ ខណៈនៅអាស៊ាន មាន​ប្រទេស​សិង្ហបូរី ឥណ្ឌូនេស៊ី បានចាក់វ៉ាក់សាំង និងកម្ពុជានឹងចាក់វ៉ាក់សាំងកូវីដ ១៩ ឆាប់ៗនេះផងដែរ​។

សម្តេច ក៏បានបញ្ជាក់ ការពិតសម្តេច បានត្រមខ្លួនរួចរាល់ តមអាហារ មិនលេបថ្នាំ ដើម្បីចាក់វ៉ាក់សាំងជាជំនួយរបស់មិត្តចិន តែក្រោយមក ខាងភាគីចិន បានជូន​ដំណឹងថា វ៉ាក់សាំង Sinopharm គឺសម្រាប់អាយុ ១៨ ដល់ ៥៩ ឆ្នាំតែប៉ុណ្ណោះ​។

សម្តេចតេជោ ហ៊ុន សែន បញ្ជាក់ថា ការលុបចោលគម្រោងចាក់វ៉ាក់សាំង សម្រាប់រូបសម្តេច និងថ្នាក់ដឹកនាំវ័យលើសពី ៦០ ឆ្នាំនោះ «មិនមែនខ្លាច​បញ្ហា​ប្រតិកម្មទេ ។ បញ្ហាស្ថិតនៅត្រង់ថា ប្រសិទ្ធភាពសម្រាប់មនុស្សអាយុ ៦០ ឆ្នាំឡើង​លើទៅ» ។

សម្តេច ក៏បានបញ្ជាក់ជា ឧទាហរណ៍ថា សម្តេច ទៀ បាញ់ បានចាក់រួចហើយ ហើយ​សុខ​ភាពធម្មតា​៕