ខេត្តសៀមរាប ៖ អ្នកនាំពាក្យកងរាជអាវុធហត្ថលើផ្ទៃប្រទេស បានលើកឡើងក្នុងផេកជាផ្លូវការថា ករណីជម្លោះរវាងអ្នកកាសែត ANN និង អាវុធហត្ថខេត្តសៀមរាប រហូតឈានដល់ប្រើអំពើហិង្សា និងផ្ទុះអាវុធ…
ខេត្តសៀមរាប ៖ អ្នកនាំពាក្យកងរាជអាវុធហត្ថលើផ្ទៃប្រទេស បានលើកឡើងក្នុងផេកជាផ្លូវការថា ករណីជម្លោះរវាងអ្នកកាសែត ANN និង អាវុធហត្ថខេត្តសៀមរាប រហូតឈានដល់ប្រើអំពើហិង្សា និងផ្ទុះអាវុធ កាលពីថ្ងៃ០៤ ខែកុម្ភៈ ឆ្នាំ២០២១ នៅក្នុងភោជនីយដ្ឋានយីហោ «មហាលាភ ៩៩៩៩» ស្ថិតនៅក្នុងភូមិទ្រាំង សង្កាត់ស្លក្រាម ក្រុងសៀមរាបនោះ កងរាជអាវុធហត្ថខេត្តបាននាំបុគ្គលិករបស់ខ្លួន រួមនឹងអាវុធយកមករក្សាទុក ដើម្បីស៊ើបអង្កេតបន្ត ព្រមទាំងហៅលោក តាំង ហូរ អ្នកព័ត៌មាន ANN ប៉ុន្តែមិនបានមកចូលបំភ្លឺនៅឡើយ ។ ចំណែកអុ្នកពាក់ព័ន្ធក្នុងករណីអំពើហិង្សានេះ កម្លាំងជំនាញនឹងចាត់វិធានការតាមផ្លូវច្បាប់។
ភ្នាក់ងារកោះសន្តិភាពប្រចាំខេត្តសៀមរាប សូមដកស្រង់យករបាយការណ៍របស់អ្នកនាំពាក្យកងរាជអាវុធហត្ថលើផ្ទៃប្រទេស ដែលបង្ហោះក្នុងផេកជាផ្លូវការដូចតទៅ ៖ ខ្ញុំឧត្តមសេនីយ៍ត្រី អេង ហ៊ី ស្នងការ ស្នងការដ្ឋានទំនាក់ទំនងកិច្ចការសាធារណៈ និងជាអ្នកនាំពាក្យកងរាជអាវុធហត្ថ មានកិត្តិយសសូមជម្រាបជូនសាធារណជន និងអ្នកសារព័ត៌មានឱ្យបានជ្រាបថា កាលពីយប់ថ្ងៃទី០៤ ខែកុម្ភៈ ឆ្នាំ២០២១ វេលាម៉ោង៩និង១០នាទីយប់ នៅភោជនីយដ្ឋានមហាលាភ៩៩៩៩ ស្ថិតនៅក្នុងក្រុងសៀមរាប មានករណីបង្ករបួសស្នាម និងផ្ទុះអាវុធ ដែលបង្កឡើងរវាងអ្នកផឹកស៊ី ក្នុងនោះមានបុគ្គលិកកងរាជអាវុធហត្ថម្នាក់ដែលជាជនរងគ្រោះរបួសក្បាល និងជាអ្នកប្រើអាវុធបង្កការភ្ញាក់ផ្អើល ប៉ុន្តែមិនបង្កឱ្យមានការរងរបួស ឬប៉ះពាល់ដល់ជីវិតមនុស្ស សត្វ ឬខូចខាតសម្ភារៈនោះទេ ។
ក្រោយកើតហេតុ កងរាជអាវុធហត្ថខេត្តសៀមរាប បានចាត់វិធានការឃាត់ខ្លួននាំនាយអាវុធហត្ថខេត្តម្នាក់ ដែលបង្កសម្លេងផ្ទុះយកមកដាក់ទណ្ឌកម្មនៅក្នុងបន្ទាយ និងដកហូតអាវុធមករក្សាទុកវិញ ព្រមទាំងបើកធ្វើការស៊ើបអង្កេតចំពោះករណីហិង្សាដោយចេតនាក្នុងរឿងហេតុខាងលើទៅតាមនីតិវិធី និងអនុវត្តវិន័យកងទ័ពចំពោះបុគ្គលិកកងរាជអាវុធហត្ថ។ ព្រមទាំងចាត់វិធានការតាមច្បាប់ចំពោះអ្នកដែលពាក់ព័ន្ធនឹងអំពើហិង្សា ការបង្កការភ័យខ្លាចទាំងអស់។ ន័យដូចបានជម្រាបជូនខាងលើ សូមសាធារណជន និងអ្នកសារព័ត៌មានមេត្តាជ្រាប។
គួរបញ្ជាក់ផងដែរថា ករណីជម្លោះបង្កហិង្សាខាងលើ រវាងអ្នកកាសែត និងមន្ត្រីកងរាជអាវុធហត្ថខេត្ត នៅក្នុងហាង មហាលាភ ៩៩៩៩ នោះ គឺជារឿងយល់ច្រលំនឹងគ្នា ហើយខាងអ្នកសារព័ត៌មាន ក៏បានសុំទោសមន្ត្រីកងរាជអាវុធហត្ថ ព្រមទាំងសុំទោសថ្នាក់ដឹកនាំនៃកងរាជអាវុធហត្ថទាំងអស់ថា លោកនឹងឈប់ធ្វើទង្វើបែបនេះតទៅទៀតហើយ និងសុំការយោគយល់ជាលើកទី១ ផងចុះ។
គួររំលឹកថា ៖ ទំនាស់ពាក្យសម្តីក្នុងវង់ផឹក អ្នកបែកក្បាលទាញកាំភ្លើងបាញ់មេឃផ្អើលក្រុងសៀមរាប ៕
ចែករំលែកព័តមាននេះ