រាជធានីភ្នំពេញ ៖ រថយន្តដឹកឥដ្ឋមួយគ្រឿង បានបើកបោះពួយក្នុងល្បឿនលឿន ហើយវាក់នឹងរថយន្តដឹកដីមួយគ្រឿងទៀត ដែលបង្អង់ល្បឿន ក៏បានទាញចង្កូតគេចជ្រុលឡើងក្បាលសួនច្បារ ចែកទ្រូងផ្លូវ បុកបង្គោលភ្លើងគោមបំភ្លឺផ្លូវមួយដើម បណ្តាលអោយបាក់ដាច់ត្រឹមគល់…
រាជធានីភ្នំពេញ ៖ រថយន្តដឹកឥដ្ឋមួយគ្រឿង បានបើកបោះពួយក្នុងល្បឿនលឿន ហើយវាក់នឹងរថយន្តដឹកដីមួយគ្រឿងទៀត ដែលបង្អង់ល្បឿន ក៏បានទាញចង្កូតគេចជ្រុលឡើងក្បាលសួនច្បារ ចែកទ្រូងផ្លូវ បុកបង្គោលភ្លើងគោមបំភ្លឺផ្លូវមួយដើម បណ្តាលអោយបាក់ដាច់ត្រឹមគល់ រួចសម្រួលដោះស្រាយសងនៅនឹងកន្លែង សងអស់ ២,៤០០ដុល្លារទាំងព្រឹក ។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោងប្រមាណ៧និង៤០នាទីព្រឹក ថ្ងៃទី០៥ ខែកុម្ភៈ ឆ្នាំ២០២១ នៅតាមមហាវិថីឈ្នះឈ្នះ ក្នុងភូមិកប់ស្រូវធំ សង្កាត់គោករការ ខណ្ឌព្រែកព្នៅ រាជធានីភ្នំពេញ ។
រថយន្តដែលជួបគ្រោះថ្នាក់ខាងលើនេះ ម៉ាក ហ៊ីយ៉ាន់ដាយ ពណ៌ស ពាកស្លាកលេខ ភ្នំពេញ 3A 9512 បើកបរដោយបុរសម្នាក់ មិនបានប្រាប់អោយស្គាល់អត្តសញ្ញាណឡើយ ។
បើតាមសាក្សី បានអោយដឹងថា នៅមុនពេលកើតហេតុគេឃើញ រថយន្តខាងលើបានធ្វើដំណើរក្នុងទិសដៅពីលិច ទៅកើត ដោយល្បឿលឿន លុះពេលមកដល់ចំណុចកើតហេតុ រថយន្តបានទាញចង្កូត គេចរថយន្តដឹកដីមួយគ្រឿង នៅពីមុខ ក៏បានជ្រុលឡើងសួនច្បារបុកបង្គោលភ្លើងគោមបំភ្លឺផ្លូវ បណ្តាលអោយបាក់ដាច់ត្រឹមគល់តែម្តង ។
តាមអ្នកបើកបរបានប្រាប់អោយកោះសន្តិសភាពដឹងថា មុនពេលកើតហេតុ រូបគាត់បានដឹកឥដ្ឋ យកទៅដាក់អោយម៉ូយ នៅក្នុងខណ្ឌកំបូល រួចធ្វើដំណើរត្រឡប់មកវិញ នៅពេលមកដល់កន្លែងកើត មានគោមួយក្បាលដើរឆ្លងផ្លូវ ហើយមានរថយន្តដឹកដីមួយគ្រឿងនៅពីមុខបានបង្អង់ល្បឿន ជាហេតុធ្វើអោយគាត់បានទាញចង្កូតគេច រថយន្តដឹកដី ក៏បានជ្រុលឡើងសួន បុកបង្គោលភ្លើង តែម្តង ។
បន្ទាប់ពីមានគ្រោះថ្នាក់ នគរបាលមូលដ្ឋាន បានចុះទៅកន្លែងកើតហេតុ ទាក់ទងអង្គភាពបំភ្លឺផ្លូវ ហើយសម្របសម្រួលដោះស្រាយនៅកន្លែង ។
តាមព័ត៌មានអោយដឹងថា នៅព្រឹកនោះ ខាងមន្ត្រីជំនាញដែលមាន រហ័សនាមខ្លាឃ្មុំ ក៏បានទារសំណងបង្គោលភ្លើង១ដើម ចំនួន ២,៧៥០ដុល្លារ និងនិយាយបំភ័យថា បើកយករថយន្តទៅលើ ត្រូវពិន័យគុណនឹង២ទៀត តែខាងម្ចាស់រថយន្ត ក៏បានអង្វរសម្រួលអោយចុះតម្លៃ ហើយត្រូវរ៉ូវគ្នា ចំនួន២,៤០០ដុល្លារ ដើម្បីបញ្ចប់រឿងនៅនឹងកន្លែង ។
គួរបញ្ជាក់កន្លងមក បង្គោលភ្លើងគោមបំភ្លឺផ្លូវ ស្លាកសញ្ញា, ក្បាលរបាំងជាច្រើន ត្រូវបានរថយន្តបើកបុក បណ្តាលអោយបាក់រួចខាត ត្រូវបានអង្គភាពជំនាញ នៃមន្ទីរសាធារណៈការ និងដឹកជញ្ជូន ហាក់ដូចជាមិនយកចិត្តទុកដាក់ បានជួលជុលឡើងវិញនោះទេ បង្កអោយមានការរិះគន់យ៉ាងខ្លាំងពីសំណាក់មហាជន ៕
ចែករំលែកព័តមាននេះ