រាជធានីភ្នំពេញ ៖ រថយន្តស៊េរីទំនើបបើកបរដោយបុរសជនជាតិចិន ក្នុងស្ថានភាពស្រវឹង បានជ្រុលទៅបុករុញផ្ទប់រថយន្តស៊េរីទំនើប២គ្រឿងដែលឈប់រង់ចាំភ្លើងស្តុបពីក្រោយ ធ្វើឲ្យរងការខូចខាតយ៉ាងដំណំ។ ហេតុការណ៍នេះបានកើតឡើងនៅវេលាម៉ោង១២ និង៥០នាទីរំលងអធ្រាត្រឈានចូលថ្ងៃទី៤ ខែកុម្ភៈ ឆ្នាំ២០២១…
រាជធានីភ្នំពេញ ៖ រថយន្តស៊េរីទំនើបបើកបរដោយបុរសជនជាតិចិន ក្នុងស្ថានភាពស្រវឹង បានជ្រុលទៅបុករុញផ្ទប់រថយន្តស៊េរីទំនើប២គ្រឿងដែលឈប់រង់ចាំភ្លើងស្តុបពីក្រោយ ធ្វើឲ្យរងការខូចខាតយ៉ាងដំណំ។ ហេតុការណ៍នេះបានកើតឡើងនៅវេលាម៉ោង១២ និង៥០នាទីរំលងអធ្រាត្រឈានចូលថ្ងៃទី៤ ខែកុម្ភៈ ឆ្នាំ២០២១ ត្រង់ចំណុចស្តុបជលផល ផ្លូវសុធារស សង្កាត់ទន្លេបាសាក់ ខណ្ឌចំការមន។ តាមប្រភពព័ត៌មានបានឲ្យដឹងថា ៖
មុនពេលកើតហេតុ គេបានឃើញរថយន្តស៊េរីទំនើប២គ្រឿង បើកបរដោយជនជាតិខ្មែរ ដោយមួយគ្រឿង ម៉ាកឡង់គ្រីស័រ ពណ៌ស្ករ ពាក់ស្លាកលេខ ភ្នំពេញ 2AM-5658 និងមួយគ្រឿងទៀតម៉ាកឡិចស៊ីស RX-៤៧០ពណ៌ស្ករ ពាក់ស្លាកលេខ ភ្នំពេញ 2T-8947 បានធ្វើដំណើរតាមបណ្ដោយផ្លូវសុធារស ក្នុងទិសដៅពីកើតទៅលិច ដោយរថយន្តឡង់គ្រីស័របើកខាងមុខ ចំណែករថយន្ត ឡិចស៊ីស៤៧០បើកនៅខាងក្រោយ លុះមកដល់ចំណុចកើតហេតុក៏បានឈប់រថយន្តរង់ចាំភ្លើងស្តុប។
ហើយគាប់ជួនពេលនោះដែរ ក៏ស្រាប់តែមានបុរសជនជាតិចិន២នាក់ បានបើករថយន្តស៊េរីទំនើប ម៉ាក MASERATI LEAVTE ពណ៌ស ពាក់ស្លាកលេខ ព្រះសីហនុ 2A-8531 ក្នុងស្ថានភាពស្រវឹងទោទន់ មិនបង្អង់ក៏ជ្រុលទៅបុកនឹងរថយន្ត ឡិចស៊ីស៤៧០ពីក្រោយយ៉ាងពេញទំហឹងបណ្តាលឲ្យរថយន្ត ឡិចស៊ីស៤៧០ជ្រុលទៅបុក និងរថយន្តឡង់គ្រីស័របន្តទៀត ធ្វើឲ្យរងការខូចខាតកាងក្រោយ ចំណែករថយន្តឡិចស៊ីស៤៧០ រងការខូចខាតកាងមុខ និងកាងខាងក្រោយ។ ដោយឡែករថយន្តបង្កវិញរងការខូចខាតខ្ទេចផែ្នកខាងមុខតែសំណាងល្អមិនបង្កឲ្យមានគ្រោះថ្នាក់ដល់មនុស្សដែលជិះនៅក្នុងរថយន្តនោះទេ។
ក្នុងហេតុការណ៍នេះដែរ បន្តិចក្រោយមក សមត្ថកិច្ចក៏បានឃាត់ខ្លួន បុរសជនជាតិចិន ជាអ្នកបើកបរយកទៅសាកសួរនៅប៉ុស្តិ៍នគរបាលរដ្ឋបាលទន្លេបាសាក់។ ក្រោយពេលកើតហេតុ ដោយតែអត់មានដំណោះស្រាយ រថយន្ដទាំង៣គ្រឿង ព្រមទាំងអ្នកបើកបរជនជាតិចិនត្រូវបានសមត្ថកិច្ចជំនាញចរាចរណ៍ក្រុងភ្នំពេញ បានចុះទៅធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការរាជធានីភ្នំពេញដើម្បីរង់ចាំធ្វើការដោះស្រាយទៅតាមជំនាញរបស់សមត្ថកិច្ច៕ ដោយ ៖ យឹម ឈឿន
ចែករំលែកព័តមាននេះ