ខេត្តតាកែវ ៖ មិនដឹងថាគាត់វេទនាយ៉ាងណាទេ? បើពេលខ្លះមនុស្សយើងជើងជាស្មារឹង គ្មានខ្វះចន្លោះ តែមិនបានតស៊ូឱ្យដល់ទីបំផុតទេ បែរជាបន្ទោសឪពុកម្ដាយ ឬព្រហ្មលិខិត ហើយនាំគ្នាខួចចិត្ត ខួចថ្លើម រួចគិតខ្លីទៅលោតទឹក និងប្រព្រឹត្តអំពើអបាយមុខផ្សេងៗធ្វើឱ្យសង្គមស្អប់ខ្ពើមជាដើម តែបើសិនជាក្រឡេកមកមើលគ្រួសារតូចមួយដ៏សែនកម្សត់នេះវិញ ទើបគេហៅថា លំបាកបូកនឹងវេទនា។
គ្រួសារដ៏កម្សត់មួយនេះមានគ្នា៣នាក់ ដោយប្ដីពិការភ្នែក ប្រពន្ធមានសតិមិនគ្រប់តាំងពីកំណើត តែពួកគាត់សម្រេចចិត្តរៀបអាពាហ៍ពិពាហ៍តាមម្ដាយទុកឪពុកដាក់ សម្រេចកាន់ដៃគ្នាដើរលើវិថីជីវិតដ៏សែនវែងឆ្ងាយ ដោយមិនដឹងថា ត្រូវរស់នៅបែបណាឱ្យសមបំណងដូចគេ។
ប្ដីប្រពន្ធមួយគូខាងលើ មានទីលំនៅបច្ចុប្បន្នក្នុងភូមិថ្លុកដូនទុំ ឃុំបានកាម ស្រុកព្រៃកប្បាស ខេត្តតាកែវ ដោយប្ដីឈ្មោះ មុត ថា អាយុ៤០ឆ្នាំ រីឯប្រពន្ធឈ្មោះ យឿ វ៉ា អាយុ៣០ឆ្នាំ និងមានកូនស្រីម្នាក់ក្នុងបន្ទុកឈ្មោះ សែរ ស្រីវី អាយុ៨ឆ្នាំ រៀនថ្នាក់ទី៣ នៃសាលាបឋមសិក្សាបានកាម។
បើតាមការរៀបរាប់ពីលោកមុត ថា ដែលជាប្ដីពិការភ្នែកបានឱ្យដឹងថា លោកមានតែម្ដាយជរាម្នាក់ឈ្មោះ ឈឹង ម៉ិ អាយុ៧៥ឆ្នាំ ដោយឪពុករបស់លោកបានបាត់បង់ជីវិតជាយូរណាស់មកហើយ។ លោកបានបន្តថា លោកមានបងប្អូនចំនួន៦នាក់ ក្នុងនោះប្រុស៣នាក់ និងស្រី៣នាក់ ហើយលោកគឺជាកូនទី៥។
លោកមុត ថា បាននិយាយទាំងក្ដុកក្ដួលអួលដើម.កលាយឡំនឹងទឹកភ្នែកថា លោកពិតជាពិបាករស់មែនទែន ដោយភ្នែកទាំងគូររបស់គាត់មើលឃើញប្រហែល១០ភាគរយទេ ហើយលោកដើរធ្វើការជាកម្មករលីបាវស្រូវ និយាយឱ្យខ្លីគឺលោកស៊ីឈ្នួលគេដោយប្រើកម្លាំងសុទ្ធ ហើយអ្វីដែលលោកធ្វើទៅបាន មិនមែនប្រើភ្នែកទាំងស្រុងនោះទេ គឺលោកប្រើវិញ្ញាណខ្លះក្នុងការដឹងអំពីផ្លូវដើរ ឬផ្លូវទៅកន្លែងស៊ីឈ្នួលគេ និងផ្លូវត្រូវទៅផ្ទះវិញ។
លោកបានបង្ហាញពីជីវិតគូរស្រកររបស់លោកវិញថា នៅឆ្នាំ២០១០ លោកមានអាយុ៣០ឆ្នាំ ត្រូវបានបងប្អូនឪពុកម្ដាយនាំទៅស្ដីដណ្ដឹងស្ត្រីម្នាក់ឈ្មោះ យឿ វ៉ា មានអាយុ២០ឆ្នាំ រស់នៅភូមិសំរោងម្រះ ឃុំបានកាម ស្រុកព្រៃកប្បាស ខេត្តតាកែវ ។ បើទោះជាលោកដឹងថា ស្ត្រីនោះមានសតិមិនគ្រប់ក៏ដោយ ក៏លោកនៅតែព្រមស្ម័គ្រស្មោះដោយបានរៀបមង្គលការយ៉ាងអធឹកអធ័ម និងប្រើប្រាស់ជីវិតប្ដីប្រពន្ធដោយពឹងផ្អែកលើការស៊ីឈ្នួលអ្នកភូមិ ដើម្បីផ្គត់ផ្គង់ជីវភាពប្រចាំថ្ងៃ។
បើយោងតាមសម្ដីប្រពន្ធរបស់លោក មុត ថា ដែលមានឈ្មោះយឿ វ៉ា បានឱ្យដឹងថា នាងមានម្ដាយឈ្មោះ មន់ ឡង អាយុ៧០ឆ្នាំ ដោយឪពុករបស់នាងបានបាត់បង់ជីវិតចោលនាងជាយូរមកហើយ ហើយនាងមានបងប្អូន១០នាក់ នាងជាកូនទី៨ក្នុងគ្រួសារ។ ក្រោយពេលចាស់ទុំផ្សំផ្គុំជាប្ដីប្រពន្ធរួចមក នាងត្រូវបានប្ដីសម្លាញ់យកមករស់នៅជាមួយឪពុកម្ដាយខាងប្ដី ដោយមានតួនាទីនាំផ្លូវប្ដីសម្លាញ់ទៅដើរស៊ីឈ្នួលអ្នកភូមិដូចជា ទៅអូសទឹកលក់ លើកបាវស្រូវ ចាក់ពាងលក់ ដឹកពាង បូមទឹកធ្វើស្រែ បោះចំប៉ើងដាក់គោយន្តកែច្នៃ និងធ្វើការងារផ្សេងៗជាច្រើនទៀតតាមតែអាចធ្វើទៅបាន។
មកដល់ត្រឹមនេះ ប្រពន្ធលោកមុត ថា បាននិយាយរឿងក្រោយរៀបការបាន២ឆ្នាំ នាងបានប្រសូត្រ កូនស្រីមួយជាត្រួយបណ្ដូលចិត្ត និងជាចំណងដៃដោយមិនអាចកាត់ថ្លៃបាន ហើយសព្វថ្ងៃកូននាងបានចូលរៀនថ្នាក់ទី៣ហើយ ដោយព្រឹកៗឡើងនាងជាអ្នកជូនកូនទៅរៀន។
បច្ចុប្បន្ននេះ គ្រួសាររបស់នាងត្រូវបានអង្គការមួយសង់កូនផ្ទះតូចមួយឱ្យរស់នៅដាច់ដោយឡែកពីកូនផ្ទះម្ដាយជរា ហើយជារឿយៗក៏មានក្រុមអាជ្ញាធរឃុំ-ស្រុកផ្ដល់គ្រឿងឧបភោគបរិភោគ និងថវិការមួយចំនួន ដើម្បីដោះស្រាយជីវភាពខ្វះខាតដែរ តែការជួយរបស់អាជ្ញាធរបានតែមួយគ្រាៗនោះទេ ។ ក្រៅពីនេះគឺប្ដីពិការសំណព្វចិត្តរបស់នាងចេញស្វែងរកស៊ីឈ្នួលគេបន្ថែមទៀត ហើយបច្ចុប្បន្ននេះពេលថ្ងៃប្ដីសម្លាញ់របស់នាងស៊ីឈ្នួលគេ ចំណែកពេលយប់ គឺដើរច្រៀងតាមពីធីមង្គលការ ឬកម្មវិធីផ្សេងៗ ក្រែងមានបងប្អូនអាណិតជួយជាលុយកាក់បានខ្លះសម្រាប់ចិញ្ចឹមជីវិត។
បើតាមសម្ដីលោកយាយ ឈឹង ម៉ិ ត្រូវជាម្ដាយជរារស់ក្បែរកូន និងចៅ បានឱ្យដឹងថា រឿងក្រសម្រាប់គ្រួរសារគាត់ និងកូនរបស់គាត់មធ្យមទេ តែសំខាន់កូនពិការភ្នែក រីឯប្រពន្ធត្រូវជាកូនប្រសារស្រីវិញ គ្នាមានសតិមិនសូវគ្រប់តាំងពីកំណើតមកម្ល៉េះ ហើយលោកយាយមិនមានអីចែកឱ្យកូនៗទេ មានតែណែនាំឱ្យខិតខំតស៊ូក្នុងឆាកជីវិត ហើយកើតជាតិណាៗ ប្រាថ្នាកុំឱ្យជួបបែបនេះទៀត។
ចែករំលែកព័តមាននេះ