ខេត្តកំពង់ចាម ៖ រថយន្តមួយគ្រឿងដឹកខ្សាច់ បើកបរនៅលើដងផ្លូវជាតិលេខ៧ ដោយអ្នកបើកបរខ្វះការប្រុងប្រយ័ត្នបានបង្កគ្រោះថ្នាក់ បុកគោងាប់២ក្បាល កាលពីវេលាម៉ោង៤ល្ងាច ថ្ងៃទី០២ កុម្ភៈ ២០២១…
ខេត្តកំពង់ចាម ៖ រថយន្តមួយគ្រឿងដឹកខ្សាច់ បើកបរនៅលើដងផ្លូវជាតិលេខ៧ ដោយអ្នកបើកបរខ្វះការប្រុងប្រយ័ត្នបានបង្កគ្រោះថ្នាក់ បុកគោងាប់២ក្បាល កាលពីវេលាម៉ោង៤ល្ងាច ថ្ងៃទី០២ កុម្ភៈ ២០២១ នៅចំណុចស្ពានត្រីក្រាញ់ស្ថិតនៅភូមិអណ្តូងច្រុះ ឃុំអំពិល ស្រុកកំពង់សៀម។ រថយន្តបានជ្រុលល្បឿនទៅកៀររថយន្ត១គ្រឿងទៀត និងជ្រុលទៅបុកម៉ូតូសរុបបណ្ដាលឱ្យមនុស្សរងគ្រោះដល់ទៅ៥នាក់ចំណែកអ្នកបើកបររថយន្តបង្ក បានរត់គេចខ្លួនបាត់។
នគរបាលចរាចរណ៍ស្រុកកំពង់សៀម ប្រាប់ឲ្យដឹងថា រថយន្តម៉ាកហ៊ីយ៉ាន់ដាយពណ៌ស ពាក់ស្លាកលេខ កំពង់ធំ 3A-2175 អ្នកបើកបរមិនស្គាល់អត្តសញ្ញាណ មិនស្គាល់ភូមិ ឃុំស្រុកខេត្តបើកបរពីទិសខាងកើតទៅទិសខាងលិច បានបុកសត្វគោចំនួន០២ក្បាលកំពុងដើរឆ្លងកាត់ផ្លូវ ហើយជ្រុលចង្កូតទៅប៉ះកៀជាមួយរថយន្ត ម៉ាកហ៊ីយ៉ាន់ដាយ(មួយតោនកន្លះ)ពណ៌ខៀវ ពាក់ស្លាកលេខ កំពង់ចាម 2A- 6803 បើកបរដោយ ឈ្មោះ ស្រូយ សុខឡេង ភេទប្រុស អាយុ៤០ឆ្នាំ ជាតិខ្មែរ និងអ្នករួមដំណើរក្នុងរថយន្ត០២នាក់ទៀត ទី១-ឈ្មោះ សៅ ស្រីអូន ភេទស្រី អាយុ៤៥ឆ្នាំ ជាតិខ្មែរ, ទី២-ឈ្មោះ ខន ស្រីម៉ាក់ ភេទស្រីអាយុ២០ឆ្នាំ ជាតិខ្មែរ អ្នកទាំង០៣ មានទីលំនៅភូមិរលៀក ឃុំអំពិល ស្រុកកំពង់សៀម ខេត្តកំពង់ចាម បើកបរពីទិសខាងលិចទៅកើតច្រាសទិសគ្នា។
នគរបាលចរាចរណ៍ស្រុកកំពង់សៀម ប្រាប់បន្តថា រថយន្តម៉ាកហ៊ីយ៉ាន់ដាយដដែលបានជ្រុលទៅបុកម៉ូតូមួយគ្រឿងទៀត ម៉ាកហុងដាសេ125 ពណ៌ខ្មៅ ពាក់ស្លាកលេខ កំពង់ចាម 1Y-7224 បើកបរដោយឈ្មោះ តារ៉ា ហ្វុងលីន ភេទប្រុស អាយុ១៩ឆ្នាំ និងរួមដំណើរ០១នាក់ទៀតឈ្មោះ ចាន់ ថា ភេទប្រុស អាយុ១៩ឆ្នាំ អ្នកទាំងពីររស់នៅភូមិជ័យយោ ឃុំជ័យយោ ស្រុកចំការលើ ខេត្តកំពង់ចាម បើកបរពីទិសខាងលិចទៅកើតច្រាសទិសគ្នា។ បន្ទាប់ពីកើតហេតុរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ធំ 3A- 2175 ទុករថយន្តចោលហើយរត់គេចខ្លួនបាត់។
មូលហេតុអ្នកបើកបររថយន្តម៉ាក ហ៊ីយ៉ាន់ដាយមានការធ្វេសប្រហែសខ្វះការប្រុងប្រយ័ត្នបណ្តាលឲ្យងាប់សត្វគោចំនួន០២ក្បាល និងរងរបួសមនុស្ស០៥នាក់ កម្រិតស្រាល។ ខូចខាតរថយន្តចំនួន០២គ្រឿងកម្រិតស្រាល និងម៉ូតូចំនួន០១គ្រឿងកម្រិតធ្ងន់។វត្ថុតាងទាំង០៣គ្រឿងជំនាញយកមករក្សាទុកនៅអធិការដ្ឋាននគរបាលស្រុកកំពង់សៀមដើម្បីធ្វើការស្រាវជ្រាវបន្តរកម្ចាស់រថយន្តបង្កហេតុ៕ ដោយ ៖ យ៉ាន់ ចាន់ថេត
ចែករំលែកព័តមាននេះ