រាជធានីភ្នំពេញ ៖ មានការភ្ញាក់ផ្អើលចំនួន៣លើកជាបន្តបន្ទាប់ ជុំវិញករណីភ្លើងឆេះកាលពីយប់ថ្ងៃទី២ ខែកុម្ភៈ ឆ្នាំ២០២១ ។ ករណីទី១ កើតឡើងនៅផ្ទះលក់ឧបករណ៍ជាងទងនិងម៉ាស៊ីនយីហោ«គីម ងួន»…
រាជធានីភ្នំពេញ ៖ មានការភ្ញាក់ផ្អើលចំនួន៣លើកជាបន្តបន្ទាប់ ជុំវិញករណីភ្លើងឆេះកាលពីយប់ថ្ងៃទី២ ខែកុម្ភៈ ឆ្នាំ២០២១ ។
ករណីទី១ កើតឡើងនៅផ្ទះលក់ឧបករណ៍ជាងទងនិងម៉ាស៊ីនយីហោ«គីម ងួន» ដោយ សារការឆ្លងចរន្តអគ្គិសនី តែម្ចាស់ផ្ទះបានរាយការណ៍ប្រាប់សមត្ថកិច្ចសុំរថយន្តពន្លត់អគ្គិភ័យ ទៅធ្វើអន្តរាគមន៍បាញ់ពន្លត់ទប់ស្កាត់ទាន់ពេលវេលា ។ ហេតុការណ៍នេះ កើត ឡើងនាវេលាម៉ោងប្រមាណ៩និង៣០នាទីយប់ ដែលផ្ទះខាងលើលេខ២០១ ស្ថិតនៅតាមផ្លូវលេខ២១៧ ជិតស្តុបស្ហាលដីហ្គោល ក្នុងសង្កាត់អូរឫស្សីទី៣ ខណ្ឌ៧មករា ។
ម្ចាស់ផ្ទះបានប្រាប់សមត្ថកិច្ចថា ផ្ទះដែលគាត់បើកលក់ឧបករណ៍ជាងទងនិងម៉ាសុីននោះពុំមានមនុស្សស្នាក់នៅទេ ។ លុះនៅវេលាម៉ោងជាង៩យប់ មានអ្នករស់នៅក្បែរនោះឃើញមានផ្សែងហុយចេញពីក្នុងផ្ទះខាងលើ ក៏ទូរស័ព្ទទៅប្រាប់គាត់ដែលស្នាក់នៅជិតនោះដែរឲ្យបើកទ្វារក៏ឃើញមានអណ្ដាតភ្លើងកំពុងឆាបឆេះឧបករណ៍នៅក្នុងនោះ ។
ភ្លាមៗ បាននាំគ្នាយកបំពង់ពន្លត់អគ្គិភ័យជាច្រើនបំពង់ទៅបាញ់ទប់ស្កាត់ និងទាក់ទងហៅរថយន្ដពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញមកជួយអន្តរា គមន៍បាញ់ទឹកទប់ស្កាត់ទាន់ពេលវេលា ។ ក្នុងហេតុការណ៍នេះ សមត្ថកិច្ចប្រើប្រាស់ រថយន្តពន្លត់អគ្គិភ័យចំនួន១គ្រឿងបាញ់ទឹកពន្លត់ និងមិនមានអ្នករងរបួសឡើយ ។ ឯការខូចខាតមានតែម៉ូទ័រស្វានចំនួន៥គ្រឿងប៉ុណ្ណោះ ។
ករណីទី២ បង្គោលភ្លើងមួយកន្លែងបានឆ្លងចរន្តទុស្សេបណ្តាលឱ្យឆេះផ្អើលដល់អ្នករស់ក្បែរនោះ ទាក់ទងទៅសមត្ថកិច្ចឲ្យជួយអន្តរាគមន៍ផ្តាច់ចរន្តទើបរលត់ទៅវិញ ។ ហេតុ ការណ៍នេះ កើតឡើងកាលពីវេលាម៉ោងប្រមាណ៩និង៥០នាទីយប់ នៅខ្លោង ទ្វារវត្តពោធិ៍ ជិតមហាវិថីឈ្នះ ឈ្នះ សង្កាត់សំរោងក្រោម ខណ្ឌពោធិ៍សែនជ័យ ។
ប្រភពព័ត៌ មានពីអ្នករស់ជិតកន្លែងកើតហេតុនោះថា ដំបូងពួកគាត់ឮសំឡេងផ្ទុះចេញពីបង្គោលខាងលើហើយក៏មានភ្លើងឆាបឆេះឡើង ទើបនាំគ្នាផ្អើលឆោឡោព្រោះខ្លាចរាលដាលឆេះដល់ផ្ទះ និងបានទាក់ទងទៅសមត្ថកិច្ចឲ្យមកជួយអន្តរាគមន៍ភ្លាមៗ ។ លុះពេលនគរបាលប៉ុស្តិ៍សំរោងក្រោមទៅដល់ ក៏បានទាក់ទងបន្តទៅខាងអគ្គិសនីឲ្យមកជួយអន្តរាគមន៍និងស្រាវជ្រាវរកមូលហេតុ ។
ភ្លាមៗនោះដែរ សមត្ថកិច្ចក៏បានសហការជាមួយនឹងប្រជាពលរដ្ឋនាំគ្នាទៅកាច់ប៉ារែតផ្តាច់ចរន្តភ្លើង ដើម្បីទប់ស្កាត់កុំឲ្យឆេះរាលដាលបន្តទៀត ហើយភ្លើងឆេះក៏ចុះខ្សោយរហូតរលត់អស់ទៅវិញទាំងស្រុង ។ ក្រោយពេលកើតហេតុ មន្ត្រីខាងអគ្គិសនីបានទៅដល់និងធ្វើការពិនិត្យស្រាវជ្រាវក៏រកមើលឃើញថា មូលហេតុដែលនាំឲ្យឆាបឆេះគឺមកពីឆ្លងចរន្តខ្សែកាប ក៏បណ្ដាលឲ្យផ្ទុះប្រអប់ភ្លើង ។
ករណីទី៣ គឺឆាបឆេះនៅបន្ទប់ក្រោមដីដាក់សម្ភារក្នុងហាងមួយ ដោយមានផ្សែងខ្មៅខ្មួលហុយឡើងទៅលើអាកាស បង្កការភ្ញាក់ផ្អើលដល់ម្ចាស់ហាងទាក់ទងហៅសមត្ថកិច្ចចេញរថយន្តពន្លត់អគ្គិភ័យទៅធ្វើអន្តរាគមន៍បាញ់ទឹកពន្លត់ ។ហេតុការណ៍នេះ កើតឡើងកាលពីវេលាម៉ោងប្រមាណ១១និង៣០នាទីយប់ នៅហាងទុកចោលគ្មានឈ្មោះមួយស្ថិតនៅចំណុចកែងរវាងផ្លូវលេខ១៨០និងផ្លូវលេខ៦៣ ភូមិ៨ សង្កាត់បឹងរាំង ខណ្ឌដូនពេញ ។
ម្ចាស់ហាងឈ្មោះ ហួត អៀងឡេង ភេទប្រុស អាយុ៤០ឆ្នាំ បានឲ្យដឹងថា បន្ទប់ក្រោម
ដីនោះគឺជាបន្ទប់ទុកចោល ដាក់តែចានឆ្នាំងតិចតួចប៉ុណ្ណោះ ។ មុនកើតហេតុ ពួកគាត់សម្រាកនៅជាន់លើស្រាប់តែធំក្លិនឈ្ងៀម និងមានផ្សែងហុយពេញក្នុងហាង ក៏នាំដើររកមើលទើបដឹងថា មានភ្លើងកំពុងឆាបឆេះបន្ទប់ក្រោមដីដាក់សម្ភារ ។ ភ្លាមៗ គាត់បានរាយការណ៍ប្រាប់សមត្ថកិច្ច ចេញរថយន្តពន្លត់អគ្គិភ័យទៅធ្វើអន្តរាគមន៍បាញ់ពន្លត់ភ្លាមៗដែរ ៕
ចែករំលែកព័តមាននេះ