រាជធានីភ្នំពេញ ៖ រថយន្ដដឹកទំនិញរបស់ក្រុមហ៊ុនវីរៈប៊ុនថាំ បានបើកក្នុងល្បឿនលឿនពេក គេចម៉ូតូមួយគ្រឿងនៅពីមុខរថយន្តមិនទាន់ ក៏ជ្រុលឡើងឃឿនសួនច្បារពុះចែកទ្រូងផ្លូវ រួចទៅបុកបង្គោលស្លាកប៉ាណូផ្សាយពាណិជ្ជកម្ម ពេញទំហឹង បណ្តាលឲ្យរថយន្តរួញស្រុញកាប៊ីនខាងមុខកៀបជាប់អ្នកបើកបររបួសធ្ងន់បាក់ជើងស្តាំតែម្តង ហេតុការណ៍នេះបានកើតឡើងកាលពីវេលាម៉ោង3រំលងអធ្រាត្រឈានចូលថ្ងៃទី៣០ ខែមករា ឆ្នាំ២០២១នៅតាមបណ្ដោយផ្លូវជាតិលេខ៦ ជិតនឹងរង្វង់មូលព្រហ្មមុខបួន ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វា ។
![](https://kohsantepheapdaily.com.kh/wp-content/images/2021/01/6364d3f0f495b6ab9dcf8d3b5c6e0b01-46.jpg)
រថយន្ដបង្កខាងលើជាប្រភេទរថយន្តដឹកទំនិញធន់តូច របស់ក្រុមហ៊ុន វីរៈប៊ុនថាំ ពណ៌ស្លាទុំ ពាក់ស្លាកលេខភ្នំពេញ 3F-5773 ។
បើតាមប្រភពពីអ្នករួមដំណើរក្នុងរថយន្តបង្កខាងលើបានប្រាប់ឱ្យដឹងថា មុនកើតហេតុ គឺពួកគាត់មានគ្នា២នាក់បានបើករថយន្តដឹកទំនិញដែលផ្ញើពីខេត្តសៀមរាបមកក្រុងភ្នំពេញ ខណៈពេលធ្វើដំណើរតាមបណ្តោយជាតិលេខ៦ ក្នុងល្បឿនលឿន លុះមកដល់កន្លែងកើតហេតុបើកគេចម៉ូតូមួយគ្រឿងមិនចាំម៉ាក ក៏ងាកចង្កូតគេចមកខាងឆ្វេង។
![](https://kohsantepheapdaily.com.kh/wp-content/images/2021/01/182be0c5cdcd5072bb1864cdee4d3d6e-43.jpg)
ប្រភពដដែលបន្តថា ក្នុងគ្រានោះផ្លូវមានលក្ខណៈកោងខ្លាំងផង ក៏បួងចង្កូតមកវិញតែមិនទាន់ ក៏ជ្រុលឡើងឃឿនសួនច្បារពុះចែកទ្រូងផ្លូវ រួចក៏បន្តទៅបុកផ្ទប់នឹងបង្គោលស្លាកប៉ាណូផ្សាយពាណិជ្ជកម្មពេញទំហឹងតែម្តង បណ្តាលឲ្យរថយន្តរួញស្រុញកាប៊ីនខាងមុខ និងកៀបអ្នកបើកបរជាប់ក្នុងរថយន្ត បណ្តាលឱ្យរបួសបាក់ជើងស្តាំ ហើយប្រើពេលវេលាសង្គ្រោះជាងមួយម៉ោង ទើបអាចទាញជនរងគ្រោះចេញពីក្នុងរថយន្ត រួចបញ្ជូនសង្គ្រោះនៅមន្ទីរពេទ្យបាន ចំណែករូបគាត់ដែលរួមដំណើរជាមួយមិនមានរងរបួសទេ ។
![](https://kohsantepheapdaily.com.kh/wp-content/images/2021/01/e369853df766fa44e1ed0ff613f563bd-44.jpg)
ក្រោយពេលកើតហេតុ ជនរងគ្រោះត្រូវបានបញ្ជូនទៅសង្គ្រោះនៅគ្លីនិក សម្ភពពន្លឺ ចំណែករថយន្តបង្កត្រូវបានសមត្ថកិច្ចជំនាញវាស់វែងយកទៅរក្សាទុកបណ្តោះអាសន្ននៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយបន្តនៅពេលក្រោយ ៕
![](https://kohsantepheapdaily.com.kh/wp-content/images/2021/01/1c383cd30b7c298ab50293adfecb7b18-45.jpg)
ចែករំលែកព័តមាននេះ